MI vs RCB: ആർസിബിയുടെ കുറ്റി തെറിക്കുമോ? തകർപ്പൻ യോർക്കറുമായി ബുംറയെത്തി; ഇന്ന് തീപാറും പോരാട്ടം

Edited byലിജിൻ കടുക്കാരം | Samayam Malayalam | Updated: 7 Apr 2025, 12:49 pm

Samayam Malayalamവിരാട് കോഹ്ലി, ജസ്പ്രിത് ബുംറ, ഹർദിക് പാണ്ഡ്യ

മുംബൈ: തുടർ തോൽവികളുമായി നിരാശപ്പെടുത്തുന്ന മുംബൈ ഇന്ത്യൻസ് ഇന്ന് സ്വന്തം കാണികൾക്ക് മുന്നിൽ റോയൽ ചലഞ്ചേഴ്സ് ബാംഗ്ലൂരുമായി ഏറ്റുമുട്ടും. സൂപ്പർതാരം ജസ്പ്രീത് ബുംറ പരിക്കിൽ നിന്ന് മോചിതനായി തിരികെ എത്തുന്ന സന്തോഷത്തിലാണ് മുംബൈ ആരാധകരുള്ളത്. ബുംറയുടെ മടങ്ങിവരവിൻ്റെ കരുത്തിൽ ബെംഗളൂരുവിനെ വീഴ്ത്തി സീസണിലെ രണ്ടാം ജയം നേടാനാകുമെന്ന പ്രതീക്ഷയിലാണ് മുംബൈ. മറുവശത്ത്, മുംബൈയെ വീഴ്ത്തി വിജയവഴിയിൽ തിരികെ എത്താനാകും ബെംഗളൂരുവിൻ്റെയും ശ്രമം.ഐപിഎൽ 18ാം സീസണിൽ നാല് മത്സരങ്ങൾ കളിച്ച മുംബൈ മൂന്നിലും പരാജയപ്പെട്ടിരുന്നു. കൊൽക്കത്തയ്ക്കെതിരെ മാത്രമാണ് അവർക്ക് ജയിക്കാനായത്. രണ്ട് പോയിൻ്റുകളുമായി പട്ടികയിൽ എട്ടാമതാണ് മുംബൈയുടെ സ്ഥാനം. മറുവശത്ത് മൂന്ന് മത്സരങ്ങൾ കളിച്ച ആർസിബി രണ്ടിലും വിജയിച്ചിരുന്നു. നാല് പോയിൻ്റുകളുമായി പട്ടികയിൽ മൂന്നാമതാണ് ബാംഗ്ലൂർ റോയൽ ചലഞ്ചേഴ്സ് നിലവിലുള്ളത്.
ഇന്നത്തെ കളിക്ക് മുൻപ് ടീമുകൾക്ക് ആശങ്ക നൽകി ഈ രണ്ട് താരങ്ങൾ; മുംബൈ ഇന്ത്യൻസിനും ലക്നൗ സൂപ്പർ ജയന്റ്സിനും വലിയ തലവേദന

ഓപ്പണർമാരുടെ മോശം ഫോം ആണ് മുംബൈയുടെ പ്രധാന തലവേദന. പ്രധാന താരങ്ങൾക്കൊന്നും താളം കണ്ടെത്താൻ കഴിഞ്ഞിട്ടില്ല. മുംബൈ ബാറ്റിങ് നിരയിൽ സൂര്യകുമാർ യാദവും റയാൻ റിക്കൾട്ടണും മാത്രമാണ് നിലവിൽ അർധ സെഞ്ച്വറി നേടിയിട്ടുള്ളത്. സൂപ്പർ താരം ബുംറ മടങ്ങിയെത്തുന്ന വാർത്ത മാത്രമാണ് മുംബൈ ആരാധകർക്ക് പ്രതീക്ഷയേകുന്നത്.

ആര്‍സിബിക്കെതിരെ ബുംറ കളിക്കുമെന്നാണ് മുംബൈ ഇന്ത്യന്‍സ് കോച്ച് മഹേല ജയവര്‍ധന പറഞ്ഞിരിക്കുന്നത്. ഇന്നലെ പരിശീലനം നടത്തിയിരുന്നെന്നും പൂർണ കായികക്ഷമത വീണ്ടെടുത്തിട്ടുമുണ്ടെന്നുമാണ് ജയവർധന പറഞ്ഞിരിക്കുന്നത്. പരിശീലനത്തിനിടെ തകർപ്പൻ യോർക്കറിൽ സ്റ്റംപ് പിഴുതെടുക്കുന്ന ബുംറയുടെ ദൃശ്യം മുംബൈ സോഷ്യൽ മീഡിയയിലൂടെ പുറത്തുവിടുകയും ചെയ്തിട്ടുണ്ട്. ഓസ്ട്രേലിയൻ പര്യടനത്തിനിടെ തോളിനു പരിക്കേറ്റ ബുംറ ഈ വർഷം ജനുവരി മുതൽ ചികിത്സയിലും വിശ്രമത്തിലുമായിരുന്നു.

മുംബൈ ആർസിബി മുഖാമുഖം

ഐപിഎൽ ചരിത്രത്തിൽ മുംബൈയും ബാംഗ്ലൂരും ഇതുവരെ 33 തവണയാണ് ഏറ്റുമുട്ടിയിരിക്കുന്നത്. 19 മത്സരങ്ങളിൽ മുംബൈ വിജയിച്ചപ്പോൾ 14 എണ്ണത്തിലാണ് ആർസിബിയ്ക്ക് ജയിക്കാനയത്. എന്നാൽ അവസാന ആറ് മത്സരത്തിൽ നാലെണ്ണത്തിൽ ജയം ബാംഗ്ലൂരിനായിരുന്നു.

മുംബൈ Vs ആർസിബി സാധ്യതാ ഇലവൻ

മുംബൈ: റയൻ റിക്കൾടൺ, വിൽജാക്സ്, സൂര്യകുമാർ യാദവ്, തിലക് വർമ, ഹർദിക് പാണ്ഡ്, നമൻ ദിർ, മിച്ചൽ സാൻ്റനർ, ജസ്പ്രീത് ബുംറ, ട്രെൻ്റ് ബോൾട്ട്, അശ്വനി കുമാർ, വിഗ്നേഷ് പുത്തൂർ

ആർസിബി: സാൾട്ട്, വിരാട് കോഹ്ലി, ദേവദത്ത് പടിക്കൽ, രജത് പടിദാർ, ലിവിങ്സ്റ്റൺ, ജിതേഷ് ശർമ, ടിം ഡേവിഡ്, ക്രുണാൽ പാണ്ഡ്യ, ഭൂവനേശ്വർ കുമാർ, ഹേസൽവുഡ്, യഷ് ദയാൽ