RCB vs KKR IPL 2026: 0, 0, 105*, കോഹ്ലിയുടെ കിടിലൻ തിരിച്ചുവരവ്; സൃഷ്ടിച്ചത് ലോക റെക്കോഡ്, ക്രിസ് ​ഗെയ്ലിനെ പിന്നിലാക്കി

ഇന്ത്യൻ പ്രീമിയർ ലീഗിന്റെ 2026 സീസണിൽ കൊൽക്കത്ത നെെറ്റ് റെെഡേഴ്സിനെതിരായ രണ്ടാം പാദ മത്സരത്തിൽ കിടിലൻ സെഞ്ചുറി നേടിയിരിക്കുകയാണ് വിരാട് കോഹ്ലി . കെകെആർ മുന്നോട്ടുവെച്ച 193 റൺസ് വിജയലക്ഷ്യം പിന്തുടർന്നിറങ്ങിയ ആർസിബിക്കായി 60 പന്ത് നേരിട്ട് പുറത്താവാതെ 105 റൺസാണ് വിരാട് കോഹ്ലി നേടിയത്. 11 ഫോറും മൂന്ന് സിക്സും ഉൾപ്പെടെ 175 സ്ട്രെെക്ക് റേറ്റിലായിരുന്നു കോഹ്ലിയുടെ പ്രകടനം. കെകെആറിനെതിരേ ആർസിബി പിന്തുടർന്ന് വിജയം നേടുന്ന ഏറ്റവും ഉയർന്ന സ്കോർകൂടിയാണിത്.കഴിഞ്ഞ രണ്ട് മത്സരത്തിലും ഡക്കിനായിരുന്നു വിരാട് കോഹ്ലി പുറത്തായത്. അതുകൊണ്ടുതന്നെ കെകെആറിനെതിരേ എന്ത് വിലകൊടുത്തും കോഹ്ലിക്ക് തിരിച്ചുവരേണ്ടതായുണ്ടായിരുന്നു. ഇപ്പോഴിതാ കിടിലൻ സെഞ്ചുറിയോടെ രാജകീയമായിത്തന്നെ കോഹ്ലി മടങ്ങിവരവ് നടത്തിയിരിക്കുകയാണ്. ഈ പ്രകടനത്തോടെ കോഹ്ലി 14,000 ടി20 റൺസ് ക്ലബ്ബിൽ പേരുചേർത്തു. ലോക ക്രിക്കറ്റിൽ ഈ നേട്ടത്തിലെത്തുന്ന ഏഴാമത്തെ താരമാണ് കോഹ്ലി. മറ്റൊരു ഇന്ത്യക്കാരനും ഈ റെക്കോഡ് ക്ലബ്ബിൽ ഇല്ലെന്നതാണ് എടുത്തു പറയേണ്ടത്.

ഇന്ത്യക്കാരിൽ രണ്ടാം സ്ഥാനത്തുള്ള രോഹിത് ശർമയുടെ പേരിൽ 12491 റൺസാണുള്ളത്. 14000 റൺസ് ക്ലബ്ബിലേക്കുള്ള കോഹ്ലിയുടെ വരവ് രാജകീയമായിരുന്നു. ഏറ്റവും വേഗത്തിൽ ഈ നേട്ടം കെെവരിക്കുന്ന താരമാകാൻ കോഹ്ലിക്ക് സാധിച്ചു. 407 ഇന്നിങ്സാണ് ഈ നേട്ടത്തിലെത്താൻ കോഹ്ലിക്ക് വേണ്ടി വന്നത്. 423 ഇന്നിങ്സിൽ നിന്ന് ഈ നേട്ടം സ്വന്തമാക്കിയ യൂനിവേഴ്സൽ ബോസ് ക്രിസ് ഗെയ്ലിന്റെ റെക്കോഡാണ് കോഹ്ലി തകർത്തത്. ഡേവിഡ് വാർണർ (431), ജോസ് ബട്ലർ (468), അലക്സ് ഹെയ്ൽസ് (505), കറൻ പൊള്ളാർഡ് (633) എന്നിവരാണ് പിന്നാലെയുള്ളത്.

ഐപിഎല്ലിൽ‌ കോഹ്ലി നേടുന്ന 9ാം സെഞ്ചുറി പ്രകടനമാണിത്. രണ്ടാം സ്ഥാനത്തുള്ള ജോസ് ബട്ലർ ഏഴ് സെഞ്ചുറികളാണ് നേടിയത്. കെ എൽ രാഹുൽ ആറും സഞ്ജു സാംസൺ അഞ്ചും സെഞ്ചുറികൾ നേടിയിട്ടുണ്ട്. ടി20 ക്രിക്കറ്റിലെ കോഹ്ലിയുടെ 10ാം സെഞ്ചുറിയാണിത്. ഇന്ത്യക്കായി ടി20യിൽ ഒരു സെഞ്ചുറി നേടാൻ അദ്ദേഹത്തിന് സാധിച്ചിട്ടുണ്ട്.
IND vs IRE: അയർലൻഡിനെതിരേ സൂര്യ തന്നെ നയിക്കും? സഞ്ജുവിന് ലഭിക്കുക ആ റോൾ മാത്രം; ബിസിസിഐ നീക്കം ഇങ്ങനെ, റിപ്പോർട്ട് പുറത്ത്
കെകെആറിനെതിരേ കൂടുതൽ 50 പ്ലസ് സ്കോർ നേടുന്ന താരമായി മാറാനും കോഹ്ലിക്കായി. ഇത് ഒമ്പതാം തവണയാണ് കോഹ്ലി ഈ നേട്ടത്തിലേക്കെത്തുന്നത്. എട്ട് തവണ ഈ നേട്ടം സ്വന്തമാക്കിയ രോഹിത് ശർമയുടെ റെക്കോഡിനെ കോഹ്ലി മറികടന്നു. സുരേഷ് റെയ്നയും ഡേവി‍ഡ് വാർണറും എട്ട് തവണ വീതം ഈ നേട്ടത്തിലേക്കെത്തിയിട്ടുണ്ട്. ഐപിഎല്ലിൽ 20 സെഞ്ചുറികൾ പിറക്കുന്ന ആദ്യത്തെ ടീമായും ആർസിബി മാറി.

രാജസ്ഥാൻ റോയൽസ് 19 സെഞ്ചുറികളോടെ രണ്ടാം സ്ഥാനത്തുമുണ്ട്. ഐപിഎല്ലിൽ 21ാം തവണ മാൻ ഓഫ് ദി മാച്ച് പുരസ്കാരം നേടിയ കോഹ്ലി രോഹിത്തിന്റെ റെക്കോഡിനൊപ്പമെത്തി. അന്താരാഷ്ട്ര ടി20യിൽ നിന്ന് വിരമിച്ച കോഹ്ലി 37ാം വയസിലും ഐപിഎല്ലിൽ ശോഭിക്കുന്നു എന്നതാണ് എടുത്തു പറയേണ്ട കാര്യം. ഐപിഎൽ റൺചേസിൽ മൂന്നാം സെഞ്ചുറി നേട്ടത്തോടെ ജോസ് ബട്ലർക്കൊപ്പം ഒന്നാം സ്ഥാനം പങ്കിടാനും കോഹ്ലിക്കായിരിക്കുകയാണ്.

‌IPL 2026: ഇങ്ങനെ തുടർന്നാൽ കാര്യം ഉണ്ടാകില്ല, വെെഭവിന് മുന്നറിയിപ്പുമായി ഡിവില്ലിയേഴ്സ്; നൽകിയ ഉപദേശം ഇതാണ്

കെകെആറിനെതിരായ ജയത്തോടെ ആർസിബി പോയിന്റ് പട്ടികയിൽ തലപ്പത്തേക്കെത്തി. 12 മത്സരത്തിൽ നിന്ന് 16 പോയിന്റാണ് നിലവിലെ ചാമ്പ്യന്മാർക്കുള്ളത്. രണ്ട് മത്സരം ശേഷിക്കെ ഒരു ജയം നേടിയാൽ ആർസിബിക്ക് പ്ലേ ഓഫ് ഉറപ്പിക്കാൻ സാധിക്കും. അതേ സമയം ആർസിബിയോട് തോറ്റതോടെ മൂന്ന് തവണ ചാമ്പ്യന്മാരായ കെകെആർ പ്ലേ ഓഫ് കാണാതെ പുറത്തായിരിക്കുകയാണ്.