RCB vs SRH IPL 2026: ആർസിബി എന്താണ് കാട്ടിയത്? ​ക്രുണാലിനെ അഞ്ചാം നമ്പറിൽ എന്തിന് ഇറക്കി; വിമർശനവുമായി ആരാധകർ

ഇന്ത്യൻ പ്രീമിയർ ലീഗിന്റെ 2026 സീസണിലെ 67ാം മത്സരത്തിൽ റോയൽ ചലഞ്ചേഴ്സ് ബംഗളൂവിനെ സൺറെെസേഴ്സ് ഹെെദരാബാദ് തോൽപ്പിച്ചിരിക്കുകയാണ്. 55 റൺസിന്റെ വമ്പൻ ജയമാണ് ഹെെദരാബാദ് നേടിയെടുത്തിരിക്കുന്നത്. ആദ്യം ബാറ്റ് ചെയ്ത ഹെെദരാബാദ് നാല് വിക്കറ്റിന് 255 റൺസെടുത്തപ്പോൾ മറുപടിക്കിറങ്ങിയ ആർസിബിക്ക് നാല് വിക്കറ്റിന് 200 റൺസാണ് നേടാനായത്.ആർസിബിയുടെ തോൽവിക്ക് പിന്നാലെ വലിയ വിമർശനം ആരാധകർ ഉയർത്തുകയാണ്. ഇതിന് കാരണം ആർസിബി കാട്ടിയ വലിയൊരു പിഴവാണ്. മത്സരത്തിൽ ആർസിബിക്ക് ജയിക്കാൻ സാധിക്കുമായിരുന്നുവെന്നും ക്രുണാൽ പാണ്ഡ്യയെ അഞ്ചാം നമ്പറിൽ ബാറ്റ് ചെയ്യാൻ‍ ഇറക്കിയതാണ് ടീമിന് തിരിച്ചടിയായതെന്നുമാണ് ആരാധകർ പറയുന്നത്. അഞ്ചാം നമ്പറിലിറങ്ങിയ ക്രുണാൽ 31 പന്തിൽ 41 റൺസോടെ പുറത്താവാതെ നിന്നു. 132.26 മാത്രമായിരുന്നു ക്രുണാലിന്റെ സ്ട്രെെക്ക് റേറ്റ്.

256 റൺസ് വിജയലക്ഷ്യം മുന്നോട്ടുവെച്ചിറങ്ങിയ ആർസിബിക്ക് ഒരിക്കലും അംഗീകരിക്കാൻ സാധിക്കാത്ത ബാറ്റിങ് പ്രകടനമാണിത്. ആർസിബിയുടെ ടീം മാനേജ്മെന്റാണ് ഇതിന് കുറ്റക്കാരെന്ന് പറയാം. ജയിക്കാൻ ഉയർന്ന റൺസ് വേണ്ട സാഹചര്യത്തിൽ ടിം ഡേവിഡിനെ എന്തുകൊണ്ട് അഞ്ചാം നമ്പറിൽ കളിപ്പിച്ചില്ലെന്നതാണ് പ്രധാനപ്പെട്ട ചോദ്യം. ആറാമനായെത്തിയ ടിം ഡേവിഡ് ഏഴ് പന്തിൽ 15 റൺസെടുത്ത് പുറത്താവാതെ നിന്നു.

ക്രുണാലിന് പകരം ഡേവിഡിനെ കളിപ്പിച്ചിരുന്നെങ്കിൽ ആർസിബി ജയിക്കാൻ സാധ്യതയുണ്ടായിരുന്നുവെന്നാണ് ആരാധകർ പറയുന്നത്. ടിം ഡേവിഡും ജിതേഷ് ശർമയും റൊമാരിയോ ഷെഫേർഡും അതിവേഗം റൺസുയർത്തുന്നവരാണ്. ഇവർക്കെല്ലാം കാമിയോകളിലൂടെ മത്സരഫലത്തെ മാറ്റി മറിക്കാനും ശേഷിയുണ്ട്. എന്നിട്ടും എന്തുകൊണ്ടാണ് ക്രുണാലിനെ അഞ്ചാം നമ്പറിൽ കളിപ്പിച്ചത് എന്നതാണ് ആരാധകരുടെ ചോദ്യം.
RCB vs SRH IPL 2026: റൺചേസിൽ ഇത്തവണ കിങ് ആയില്ല, കോഹ്ലിയെ പൂട്ടി സാക്കിബ്, ആ റെക്കോഡിൽ തലപ്പത്തെത്താൻ‌ ഇനിയും കാത്തിരിക്കണം
ആർസിബി ഇതിനോടകം പ്ലേ ഓഫ് ഉറപ്പിച്ച് കഴിഞ്ഞ ടീമാണ്. അതുകൊണ്ടുതന്നെ ഹെെദരാബാദിനെതിരേ ഇത്തരമൊരു നീക്കം നടത്താതെ ചില പരീക്ഷണങ്ങൾക്ക് ധെെര്യം കാട്ടാമായിരുന്നു. പക്ഷെ ആർസിബി ക്രുണാലിനെ ഇറക്കി കളി തോൽപ്പിക്കുകയാണ് ചെയ്തത്. ക്രുണാൽ നേരിട്ട 31 പന്തിൽ നിന്ന് 70 റൺസിലേക്ക് എങ്കിലും എത്താൻ സാധിച്ചിരുന്നെങ്കിൽ മത്സരഫലം മറ്റൊന്നാകുമായിരുന്നു. ആർസിബിക്കൊപ്പം വെടിക്കെട്ട് ബാറ്റ്സ്മാൻമാരുണ്ടായിട്ടും അതിനെ വേണ്ടവിധം ഉപയോഗിക്കാൻ ആർസിബിക്കായില്ല.

ആർസിബിക്കായി വെങ്കടേഷ് അയ്യർ തകർപ്പൻ തുടക്കമാണ് നൽകിയത്. 19 പന്തിൽ നിന്ന് 44 റൺസാണ് വെങ്കടേഷ് നേടിയത്. വിരാട് കോഹ്ലിക്കും കാര്യമായ പ്രകടനം നടത്താൻ സാധിക്കാതെ പോയി. 11 പന്തിൽ 15 റൺസാണ് കോഹ്ലി നേടിയത്. ദേവ്ദത്ത് പടിക്കൽ 14 പന്തിൽ 21 റൺസാണ് നേടിയത്. രജത് പാട്ടീധാർ 39 പന്തിൽ 56 റൺസാണ് നേടിയത്. അർധ സെഞ്ചുറി നേടിയെങ്കിലും ഹെെദരാബാദിലെ ബാറ്റിങ് പിച്ചിൽ അത്ര മികച്ച പ്രകടനമാണിതെന്ന് പറയാൻ സാധിക്കില്ല.
RCB vs SRH IPL 2026: സഞ്ജുവിനെ മറികടന്ന് ഇഷാൻ; ആർസിബിക്കെതിരേ ചരിത്ര നേട്ടം; ഇന്ത്യൻ വിക്കറ്റ് കീപ്പർമാരിൽ തലപ്പത്ത്

എന്തായാലും ഇപ്പോഴും പോയിന്റ് പട്ടികയിൽ ആർസിബി തലപ്പത്താണുള്ളത്. അതുകൊണ്ടുതന്നെ പ്ലേ ഓഫിൽ ആർസിബിക്ക് ഇത് ഗുണകരമായി മാറും. ഭുവനേശ്വർ കുമാറും ജോഷ് ഹെയ്സൽവുഡ് ഹെെദരാബാദിനെതിരേ നന്നായി തല്ലുവാങ്ങി. ആർസിബിയുടെ ഫീൽഡിങ് പ്രകടനവും മെച്ചപ്പെടേണ്ടതായുണ്ട്.