Sanju Samson: എന്തുകൊണ്ട് സിഎസ്കെ ക്യാപ്റ്റനായില്ല? അവസരം കിട്ടാത്തതുകൊണ്ടല്ല; കാരണം പറഞ്ഞ് സഞ്ജു സാംസൺ

ഇന്ത്യൻ പ്രീമിയർ ലീഗിന്റെ 2026 സീസണിൽ ചെന്നെെ സൂപ്പർ കിങ്സിനൊപ്പം തകർത്ത് കളിക്കുകയാണ് സഞ്ജു സാംസൺ . രാജസ്ഥാൻ റോയൽസിന്റെ ക്യാപ്റ്റൻ സ്ഥാനമടക്കം ഉപേക്ഷിച്ച് സഞ്ജു സാംസൺ സിഎസ്കെയിലേക്കെത്തിയപ്പോൾ പല ചോദ്യങ്ങളുമുണ്ടായിരുന്നു. രാജസ്ഥാനിൽ രാജാവിനെപ്പോലെ വാണ സഞ്ജു സിഎസ്കെയിൽ വെറും താരമെന്ന നിലയിൽ ഒതുങ്ങുന്നതിൽ ആരാധകർക്കും നിരാശയുണ്ടായിരുന്നു. എന്നാൽ സഞ്ജു സാംസൺ ബാറ്റുകൊണ്ട് സിഎസ്കെയ്ക്കായി കസറി ആരാധകരെ ത്രില്ലടിപ്പിച്ചു. രണ്ട് സെഞ്ചുറിയും ഒരു ഫിഫ്റ്റിയും സഞ്ജു നേടി. വിക്കറ്റിന് പിന്നിലും മികവ് കാട്ടിയ സഞ്ജു ഇതിനോടകം സിഎസ്കെ ആരാധകരുടെ ഹൃദയം കീഴടക്കിക്കഴിഞ്ഞു. എന്നാൽ സഞ്ജു എന്ന് സിഎസ്കെയുടെ നായകസ്ഥാനത്തേക്ക് എത്തും എന്ന ചോദ്യം ഇപ്പോഴും ആരാധക മനസിലുണ്ട്.

ഇപ്പോഴിതാ സിഎസ്കെയുടെ നായകസ്ഥാനം മോഹിച്ചിരുന്നോ എന്നതിനെപ്പറ്റി സഞ്ജു സാംസൺ തുറന്ന് പറഞ്ഞിരിക്കുകയാണ്. 'ഇതുവരെ സിഎസ്കെയുടെ നായകസ്ഥാനത്തെക്കുറിച്ച് ചിന്തിച്ചിട്ടില്ല. എനിക്ക് നേരത്തെ ഒരു ടീമുണ്ടായിരുന്നു. അവിടെ നിന്നാണ് മറ്റൊരു ടീമിലേക്ക് എത്തിയത്. അത്തരമൊരു മാറ്റത്തിൽ എനിക്ക് നിബന്ധനകൾ വെക്കാൻ സാധിക്കില്ല. സത്യസന്ധമായി പറഞ്ഞാൽ ഒരു വീട്ടിൽ നിന്ന് മറ്റൊരു വീട്ടിലേക്ക് മാറുമ്പോൾ അത്തരം നിബന്ധനകൾവെച്ച് മുന്നോട്ട് പോകാനാവില്ല.

അതാണ് ഞാൻ പഠിച്ചത്. നിങ്ങൾ അവിടേക്ക് ചെന്ന് നിങ്ങളുടെ മൂല്യമെന്താണെന്ന് കാട്ടിക്കൊടുക്കുക. ഏറ്റവും മികച്ച പ്രകടനത്തോടെ നിങ്ങൾ‌ ആരാണെന്ന് കാട്ടിക്കൊടുക്കുക. നിരവധി മലയാളികൾ ചെന്നെെയിൽ ജോലി ചെയ്യുന്നുണ്ട്. മലയാളികളെ എല്ലാവരും പരിഗണിക്കാൻ കാരണം വിശ്വാസത്തിന് പകരം ജീവൻ കൊടുക്കാൻ അവർ തയ്യാറാകുന്നതുകൊണ്ടാണ്. സിഎസ്കെ എന്നെ വിശ്വസിച്ച് ഇങ്ങോട്ട് വിളിച്ചതാണ്. അതുകൊണ്ടുതന്നെ എന്റെ എല്ലാം നൽകാൻ ഞാൻ തയ്യാറാണ്' സഞ്ജു സാംസൺ സിഎസ്കെ പോഡ്കാസ്റ്റിൽ സംസാരിക്കവെ പറഞ്ഞു.
IPL 2026: ആദ്യ 4 മത്സരത്തിലും ജയം, പിന്നെ തുടർ തോൽവി; ഇപ്പോൾ നൂൽപ്പാലത്തിൽ, രാജസ്ഥാന്റെ പ്രശ്നം സഞ്ജുവിന്റെ അഭാവമോ?
എംഎസ് ധോണി നയിച്ചുകൊണ്ടിരുന്ന സിഎസ്കെയെ ഇപ്പോൾ നയിക്കുന്നത് റുതുരാജ് ഗെയ്ക് വാദാണ്. ക്യാപ്റ്റനെന്ന നിലയിൽ ഭേദപ്പെട്ട് നിൽക്കുന്നുണ്ടെങ്കിലും അഞ്ച് തവണ കിരീടം നേടിയ സിഎസ്കെയെ പഴയ നിലവാരത്തിലേക്കുയർത്താൻ റുതുരാജിന് സാധിച്ചിട്ടില്ല. സഞ്ജു സിഎസ്കെയുടെ നായകനാവണമെന്ന് ആഗ്രഹിക്കുന്നവർ ഏറെയാണ്. എന്നാൽ റുതുരാജ് ബെസ്റ്റാണെന്നാണ് സഞ്ജു പറയുന്നത്.

'റുതുരാജ് മികച്ചൊരു താരമാണ്. വ്യതസ്തനായൊരു ഇന്ത്യൻ ക്രിക്കറ്റ് സൂപ്പർസ്റ്റാറാണവൻ. ഏറ്റവും വലിയ ഫ്രാഞ്ചെെസികളിലൊന്നിനെയാണ് അവൻ നയിക്കുന്നത്. എന്നാൽ സാധാരണ സൂപ്പർ താരങ്ങളെപ്പോലെയല്ല അവൻ പെരുമാറുന്നത്. അധികം ശബ്ദമുണ്ടാക്കുകയോ വലിയ ആത്മവിശ്വാസം ഉള്ള താരത്തെപ്പോലെ പെരുമാറുകയോ ചെയ്യില്ല. എന്നാൽ ഏറ്റവും ആത്മവിശ്വാസമുള്ള ക്രിക്കറ്റ് താരങ്ങളിലൊരാളായാണ് അവനെ തോന്നിയിട്ടുള്ളത്. ഒരു വർഷം മാത്രമാണ് അവൻ സിഎസ്കെയെ നയിച്ചിരിക്കുന്നത്.

ഇന്ത്യയുടെ ടി20 നായകസ്ഥാനം, സഞ്ജുവിന് അനുകൂലമായി 7 കാര്യങ്ങൾ, ശ്രേയസിന്റെ വില്ലനാകുന്നത് ഗൗതം ഗംഭീർ? തെളിവുകൾ ഇതാ

മറ്റൊരു ടീമിനെ അഞ്ച് വർഷം നയിച്ചവനാണ് ഞാൻ. എന്നെ പെട്ടെന്നാണ് അവന്റെ ടീമിലേക്ക് ക്ഷണിച്ചത്. ഇത്തരമൊരു നീക്കം നടത്താൻ വലിയ ആത്മവിശ്വാസമുള്ള താരമാണവൻ. ഇത്തരം നീക്കങ്ങളാണ് എന്നെ ആകർഷിക്കുന്നത്. ഇന്നത്തെ കാലത്ത് ആളുകൾ അത് ചെയ്യും ഇത് ചെയ്യും എന്നെല്ലാം പറയുന്നതാണ് കൂടുതൽ. എന്നാൽ‌ ഇത്തരം സംസാരങ്ങളെക്കാൾ പ്രവർത്തനങ്ങളാണ് കൂടുതൽ വിലയിരുത്തപ്പെടുന്നത്' സഞ്ജു സാംസൺ കൂട്ടിച്ചേർത്തു.

സഞ്ജു സാംസൺ സിഎസ്കെയുടെ നായകസ്ഥാനത്തേക്കെത്താൻ കഴിവുള്ള താരങ്ങളിലൊരാളാണ്. റുതുരാജിന് കീഴിൽ ഈ സീസണിലും സിഎസ്കെയ്ക്ക് പ്ലേ ഓഫിലേക്കെത്താനായില്ലെങ്കിൽ ചിലപ്പോൾ സിഎസ്കെ ടീം മാനേജ്മെന്റ് സഞ്ജുവിനെ നായകസ്ഥാനത്തേക്ക് കൊണ്ടുവന്നേക്കും. എംഎസ് ധോണിയുടെ പിന്തുണയും സഞ്ജുവിനാണുള്ളത്. ധോണിയുടെ ഇടപെടലാണ് സഞ്ജുവിനെ സിഎസ്കെയിലേക്ക് കൊണ്ടുവന്നതെന്ന് തന്നെ പറയാം.

എന്തായാലും സഞ്ജുവിന്റെ നായക മികവ് പരമാവധി ഉപയോഗപ്പെടുത്താൻ സിഎസ്കെയ്ക്ക് സാധിക്കണം. സഞ്ജുവിന്റെ വരവ് സിഎസ്കെയുടെ ആരാധക പിന്തുണ വീണ്ടും ഉയർത്തിയിട്ടുണ്ട്. സഞ്ജുവിനെ നായകനായി പിന്തുണച്ച് മുന്നോട്ട് പോകുന്നതാണ് സിഎസ്കെയ്ക്ക് കൂടുതൽ ഗുണം ചെയ്യുകയെന്ന് തന്നെ പറയാം.