Sanju Samson: ധോണിക്ക് പോലും ഇത് സാധിച്ചിട്ടില്ല? സിഎസ്കെയിൽ സർവ്വം സഞ്ജു മയം; ഈ കണക്കുകൾ നിങ്ങളെ അത്ഭുതപ്പെടുത്തും

ഇന്ത്യൻ പ്രീമിയർ ലീഗിന്റെ 2026 സീസണിൽ രണ്ട് സെഞ്ചുറികളോടെ മലയാളി താരം സ‍ഞ്ജു സാംസൺ എല്ലാവരേയും അത്ഭുതപ്പെടുത്തുകയാണ്. ഡൽഹി ക്യാപിറ്റൽസിനെതിരേ ചെന്നെെ ചെപ്പോക്കിൽ സെഞ്ചുറി നേടിയ സഞ്ജു ഇപ്പോൾ മുംബെെ ഇന്ത്യൻസിനെതിരേ മുംബെെയിൽ സെഞ്ചുറി നേടി ഞെട്ടിച്ചിരിക്കുകയാണ്. രാജസ്ഥാൻ റോയൽസിന്റെ നായകസ്ഥാനമടക്കം ഉപേക്ഷിച്ചാണ് സഞ്ജു സിഎസ്കെയിലേക്കെത്തിയത്.എന്നാൽ സിഎസ്കെ ജഴ്സിയിൽ തുടക്കം പ്രതീക്ഷിച്ചപോലെയായില്ല. ആദ്യ മൂന്ന് മത്സരത്തിൽ സഞ്ജു സാംസൺ നിരാശപ്പെടുത്തിയപ്പോൾ വലിയ വിമർശനമാണ് ഉയർന്നത്. എന്നാൽ പിന്നീടുള്ള നാല് മത്സരത്തിൽ സഞ്ജുവിന്റെ കിടിലൻ തിരിച്ചുവരവാണ് സഞ്ജു നടത്തിയിരിക്കുന്നത്. സീസണിലെ മൂന്നാം ജയത്തോടെ സിഎസ്കെ പോയിന്റ് പട്ടികയിൽ അഞ്ചാം സ്ഥാനത്തേക്കുയരുമ്പോൾ സിഎസ്കെയുടെ നട്ടെല്ലായി സഞ്ജു മാറിയിരിക്കുകയാണ്.

സിഎസ്കെ ഇത്തവണ ജയിച്ച മൂന്ന് മത്സരത്തിലും സഞ്ജു തിളങ്ങിയിരുന്നുവെന്നതാണ് എടുത്തു പറയേണ്ടത്. സഞ്ജു ഫ്ളോപ്പായ മത്സരങ്ങളിലെല്ലാം സിഎസ്കെ തോൽക്കുകയും ചെയ്തു. സിഎസ്കെയിൽ എംഎസ് ധോണിയെപ്പോലും ഇത്രത്തോളം ടീം ആശ്രയിച്ചിട്ടില്ലെന്ന് പറയാം. സഞ്ജുവിന്റെ ബാറ്റിങ്ങിനെയാണ് ഇപ്പോൾ സിഎസ്കെ പൂർണ്ണമായും ആശ്രയിക്കുന്നതെന്ന് പറയാം.

സിഎസ്കെ ഈ സീസണിൽ ആദ്യ ജയം നേടിയത് ഡൽഹി ക്യാപിറ്റൽസിനെതിരേയാണ്. 23 റൺസിനായിരുന്നു സിഎസ്കെയുടെ ജയം. ഈ മത്സരത്തിൽ സെഞ്ചുറിയോടെ സഞ്ജു തിളങ്ങി. 56 പന്തിൽ 115 റൺസോടെ സഞ്ജു പുറത്താവാതെ നിന്നു. 15 ഫോറും നാല് സിക്സുമാണ് സഞ്ജു പറത്തിയത്. ഈ പ്രകടനത്തിന്റെ കരുത്തിലാണ് സിഎസ്കെ ഡൽഹിയെ വീഴ്ത്തിയത്.
IPL 2026: ചേട്ടൻ തകർത്തു, സെഞ്ചുറിത്തിളക്കത്തിൽ സഞ്ജു സാംസൺ; സീസണിൽ ഇത് രണ്ടാം തവണ; വമ്പൻ റെക്കോഡ്
രണ്ടാം ജയം നേടുന്നത് കൊൽക്കത്ത നെെറ്റ് റെെഡേഴ്സിനെതിരേയാണ്. 32 റൺസിനായിരുന്നു സിഎസ്കെയുടെ ജയം. ഈ മത്സരത്തിൽ 32 പന്തിൽ 48 റൺസുമായി സിഎസ്കെയുടെ ടോപ് സ്കോറർ സഞ്ജുവായിരുന്നു. നാല് ഫോറും മൂന്ന് സിക്സും ഉൾപ്പെടെ 150 സ്ട്രെെക്ക് റേറ്റിലാണ് സഞ്ജു കളിച്ചത്. ഈ മത്സരത്തിലും സിഎസ്കെയുടെ ജയത്തിൽ നിർണ്ണായകമായത് സഞ്ജുവാണ്.

ഇപ്പോൾ മുംബെെ ഇന്ത്യൻസിനെ 103 റൺസിന് സിഎസ്കെ തോൽപ്പിച്ചപ്പോഴും കരുത്തുകാട്ടുന്നത് സഞ്ജുവാണ്. 54 പന്തിൽ 101 റൺസോടെയാണ് സഞ്ജു പുറത്താവാതെ നിന്നത്. 10 ഫോറും ആറ് സിക്സുമാണ് സഞ്ജു നേടിയത്. സഞ്ജു ഫോമിലേക്കെത്തിയാൽ സിഎസ്കെ ജയിക്കുമെന്നതാണ് ഇപ്പോഴത്തെ കണക്കുകൾ വ്യക്തമാക്കുന്നത്. സിഎസ്കെയുടെ ബാറ്റിങ് നിരയിൽ സഞ്ജു സാംസണാണ് ഏറ്റവും വിശ്വസ്തനെന്ന് തന്നെ പറയാം.

IPL 2026: ഒറ്റക്ക് പൊരുതുന്ന സഞ്ജു, റുതുരാജും ദുബെയും വീണ്ടും ഫ്ളോപ്പ്; ഏഴ് മത്സരത്തിലും മികവില്ല, നിരാശപ്പെടുത്തി ഈ കണക്ക്

സിഎസ്കെയ്ക്കായി വെറും ഏഴ് ഇന്നിങ്സിൽ നിന്ന് രണ്ട് സെഞ്ചുറികൾ നേടാൻ സഞ്ജുവിന് സാധിച്ചു. എംഎസ് ധോണിക്ക് ഇതുവരെ ഐപിഎല്ലിൽ സെഞ്ചുറി നേടാൻ സാധിച്ചിട്ടില്ലെന്നതാണ് എടുത്തു പറയേണ്ടത്. സിഎസ്കെയ്ക്കൊപ്പമുള്ള അരങ്ങേറ്റ സീസണിൽത്തന്നെ സഞ്ജു തന്റെ കരുത്ത് കാട്ടിയിരിക്കുകയാണ്. ധോണി ഈ സീസണിൽ‌ ഇനി തിരിച്ചെത്തുമോയെന്ന കാര്യത്തിൽ ഇപ്പോഴും വ്യക്തതയില്ല.

അതുകൊണ്ടുതന്നെ വരുന്ന മത്സരങ്ങളിലും സഞ്ജുവിന്റെ ബാറ്റിങ്ങിലേക്ക് തന്നെയാണ് ആരാധകർ ഉറ്റുനോക്കുന്നത്. വെെകാതെ തന്നെ സിഎസ്കെയുടെ നായകസ്ഥാനത്തേക്കും സഞ്ജു എത്താൻ സാധ്യത കൂടുതലാണ്. എന്തായാലും സിഎസ്കെയിൽ ഇപ്പോൾ സർവ്വം സഞ്ജുവാണെന്ന് പറഞ്ഞാലും അത് തെറ്റാകില്ല. അത്രത്തോളം മികച്ച പ്രകടനമാണ് ഇപ്പോൾ മലയാളി താരം കാഴ്ചവെക്കുന്നത്.