Shubman Gill: ഋഷഭ് പന്തിൻ്റെ റെക്കോഡ് പഴങ്കഥയാക്കി ഐപിഎല്ലിൽ പുതു ചരിത്രം കുറിച്ച് ശുഭ്മാൻ ഗിൽ

Edited byഅനുഷ ഗംഗാധരൻ | Samayam Malayalam | Updated: 22 Apr 2025, 10:19 am

കൊൽക്കത്ത: ഐപിഎൽ 2025 ഗുജറാത്ത് ടൈറ്റൻസ് - കൊൽക്കത്ത നൈറ്റ് റൈഡേഴ്‌സ് മത്സരത്തിൽ ചരിത്രം കുറിച്ചിരിക്കുകയാണ് ഗുജറാത്ത് ടൈറ്റൻസ് ക്യാപ്റ്റൻ ശുഭ്മാൻ ഗിൽ. ലോകത്ത് തന്നെ ഇത്തരമൊരു നേട്ടം സ്വന്തമാക്കുന്ന ആദ്യ ക്രിക്കറ്റ് താരമാണ് ഗിൽ ഇപ്പോൾ. കഴിഞ്ഞ മത്സരത്തിൽ 90 റൺസ് നേടി തൻ്റെ ഐപിഎൽ കരിയറിൽ 3500 റൺസ് സ്വന്തമാക്കിയിരിക്കുകയാണ് ഗിൽ, അതും വെറും 25 വയസിനുള്ളിൽ. ഈ പ്രായത്തിനുള്ളിൽ ആരും സ്വന്തമാക്കാത്ത നേട്ടമാണ് ഗിൽ സ്വതമാക്കിയിരിക്കുന്നത്. കൊൽക്കത്തയുടെ താരമായാണ് ഗിൽ ഐപിഎല്ലിൽ അരങ്ങേറുന്നത്. 2018ൽ കൊൽക്കത്തയിൽ എത്തിയ താരം 58 മത്സരങ്ങളിൽ നിന്ന് 1417 റൺസ് സ്വന്തമാക്കി. ശേഷം 2022ൽ ഗുജറാത്ത് ടൈറ്റൻസിനൊപ്പം എത്തിയ താരം 2104 റൺസ് സ്വന്തമാക്കി. ഇതോടെ 25 വയസിനുള്ളിൽ 3521 റൺസ് സ്വന്തമാക്കിയിരിക്കുകയാണ് ഇന്ത്യയുടെ ഏകദിന ടീം വൈസ് ക്യാപ്റ്റൻ ശുഭ്മാൻ ഗിൽ.
ഗില്ലും ബട്‌ലറും സുദര്‍ശനും ഒരേ വെട്ട്; 2025 ഐപിഎല്ലില്‍ ഞെട്ടിച്ച് ഗുജറാത്ത് ടൈറ്റന്‍സ്, ചാമ്പ്യന്‍മാരെയും വീഴ്ത്തി
ഐപിഎൽ ചരിത്രത്തിൽ 3500 റൺസ് തികയ്ക്കുന്ന ഏറ്റവും പ്രായം കുറഞ്ഞ കളിക്കാരനും 25-ാം വയസ്സിൽ ഈ നേട്ടം കൈവരിക്കുന്ന ആദ്യ താരവുമാണ് ഗുജറാത്ത് ടൈറ്റൻസ് നായകൻ. ലീഗിൻ്റെ ചരിത്രത്തിൽ 26 വയസ്സ് തികയുന്നതിന് മുമ്പ് ഒരു കളിക്കാരനും 3000 റൺസ് പോലും നേടിയിരുന്നില്ല.

25 വയസിനുള്ളിൽ ഐപിഎല്ലിൽ ഏറ്റവും കൂടുതൽ റൺസ് നേടിയ താരം എന്ന പട്ടികയിൽ രണ്ടാം സ്ഥാനത്ത് ഉള്ളത് ഋഷഭ് പന്ത് ആണ്. 2838 റൺസാണ് താരം സ്വന്തമാക്കിയിരിക്കുന്നത്. ഗില്ലിന് മുൻപ് 2016 ൽ റോയൽ ചലഞ്ചേഴ്‌സ് ബാംഗ്ലൂർ സ്റ്റാർ പ്ലേയർ വിരാട് കോഹ്ലിയാണ് ഈ പട്ടികയിൽ ഒന്നാമതുണ്ടായിരുന്നത്. അന്ന് രണ്ടാം സ്ഥാനക്കാരനായി സഞ്ജു സാംസണും ഉണ്ടായിരുന്നു. അതേസമയം 25 വയസിനുള്ളിൽ ഏറ്റവും കൂടുതൽ സെഞ്ചുറി നേടുന്ന താരവും ഗിൽ തന്നെയാണ്. നാല് തവണയാണ് ഗിൽ 25 വയസിനുള്ളിൽ സെഞ്ചുറി നേടിയത്. സഞ്ജു സാംസൺ, യശസ്വി ജയ്‌സ്വാൾ, ഡേവിഡ് വാർണർ എന്നിവർ മാത്രമാണ് ഈ പ്രായത്തിനുള്ളിൽ ഒന്നിലധികം സെഞ്ചുറികൾ നേടിയ മറ്റ് താരങ്ങൾ.
നിര്‍ണായക മാച്ചിനും സഞ്ജു ഇല്ല; ബെംഗളൂരുവിലേക്ക് ടീമിനൊപ്പം യാത്ര ചെയ്യില്ലെന്ന് രാജസ്ഥാന്‍ റോയല്‍സ്
അതേസമയം തൻ്റെ കരിയറിൽ ഇതാദ്യമായാണ് കെകെആറിനെതിരെ ഗിൽ ഗുജറാത്തിനെ നയിക്കുന്നത്, കഴിഞ്ഞ വർഷം ഇരുടീമുകളും തമ്മിൽ നടന്ന ഒരേയൊരു മാച്ച് അഹമ്മദാബാദിൽ മഴ കാരണം ഒഴിവാക്കിയിരുന്നു. കഴിഞ്ഞ ദിവസം നടന്ന മത്സരത്തിൽ കൊൽക്കത്തയ്ക്കാണ് ടോസ് ലഭിച്ചത്. ഗുജറാത്തിനെ ബാറ്റിങ്ങിന് അയച്ച കൊൽക്കത്ത ഫീൽഡിങ് തിരഞ്ഞെടുക്കുകയായിരുന്നു. നിശ്ചിത 20 ഓവറുകളിൽ 3 വിക്കറ്റ് നഷ്ടത്തിൽ 198 റൺസ് ഗുജറാത്ത് സ്വന്തമാക്കി. മറുപടി ബാറ്റിങ്ങിൽ 20 ഓവറുകളിൽ 159 റൺസ് നേടാനേ കൊൽക്കത്തയ്ക്ക് സാധിച്ചിരുന്നുള്ളു. ഗുജറാത്തിനായി 90 റൺസ് നേടിയ ഗിൽ ആണ് കഴിഞ്ഞ മത്സരത്തിലെ ടോപ് സ്‌കോറർ.