Vaibhav Sooryavanshi: പ്രഫുലിനോട് വീട്ടിയത് പ്രതികാരം, ഡക്കിന് പുറത്താക്കിയത് മാനസികമായി ബാധിച്ചു; തുറന്ന് പറഞ്ഞ് വെെഭവ് സൂര്യവംശി

ഇന്ത്യൻ പ്രീമിയർ ലീഗിന്റെ 2026 സീസണിൽ തകർപ്പൻ സെഞ്ചുറി പ്രകടനത്തോടെ കെെയടി നേടിയ താരമാണ് വെെഭവ് സൂര്യവംശി . സൺറെെസേഴ്സ് ഹെെദരാബാദിനെതിരേ 36 പന്തിൽ സെഞ്ചുറിയിലേക്കെത്തിയ വെെഭവ് പല ചരിത്ര റെക്കോഡുകളും സ്വന്തം പേരിലാക്കി. എന്നാൽ ഇതിൽ വെെഭവ് പ്രഫുൽ ഹിൻഗെയ്ക്കെതിരേ ആദ്യ ഓവറിൽ നേടിയ നാല് സിക്സുകൾ വളരെയധികം ചർച്ചയാക്കപ്പെട്ടു. സീസണിൽ ആദ്യം നേർക്കുനേർ എത്തിയപ്പോൾ വെെഭവിനെ ഡക്കിനാണ് പ്രഫുൽ പുറത്താക്കിയത്. ഗോൾഡൻ ഡക്കായി വെെഭവിനെ പുറത്താക്കണമെന്ന് താൻ നേരത്തെ പദ്ധതിയിട്ടിരുന്നുവെന്നും പ്രഫുൽ അന്ന് പറഞ്ഞിരുന്നു. ഇതിന് ശേഷം അവസരത്തിനായി കാത്തിരുന്നത് പോലെയാണ് വെെഭവ് പ്രഫുലിനെ നേരിട്ടത്. ആദ്യ ഓവർ എറിയാനെത്തിയ പ്രഫുലിനെ നാല് സിക്സറോടെയാണ് വെെഭവ് വരവേറ്റത്.

ഇത് വെെഭവിന്റെ പ്രതികാരണം ആണെന്ന തരത്തിൽ വളരെയധികം ചർച്ച ചെയ്യപ്പെട്ടിരുന്നു. ഇപ്പോഴിതാ പ്രഫുലിനോട് പ്രതികാരം വീട്ടാൻ കാത്തിരിക്കുകയായിരുന്നോ എന്നതിനോട് പ്രതികരിച്ചിരിക്കുകയാണ് രാജസ്ഥാൻ റോയൽസിന്റെ യുവതാരം. പ്രഫുൽ തന്നെ ഡക്കിന് പുറത്താക്കിയത് മാനസികമായി ബാധിച്ചിരുന്നുവെന്നാണ് വെെഭവ് തുറന്ന് പറഞ്ഞിരിക്കുന്നത്. അതുകൊണ്ടുതന്നെ രണ്ടാം തവണ മുന്നൊരുക്കത്തോടെയാണ് ഇറങ്ങിയതെന്നും വെെഭവ് വെളിപ്പെടുത്തിയിരിക്കുകയാണ്.

'പ്രഫുലിനെതിരേ കൃത്യമായ പദ്ധതികളോടെയാണ് ഇറങ്ങിയത്. അവസാന മത്സരത്തിൽ എന്നെ ഡക്കിന് പുറത്താക്കിയതിന് പിന്നാലെ ഞാൻ തിരിച്ചെത്തി ഫോൺ പരിശോധിച്ചിരുന്നു. എനിക്ക് നിരവധി കാര്യങ്ങൾ കാണാനായി. പൊതുവേ ഞാൻ ഇത്തരം കാര്യങ്ങൾക്ക് വലിയ പരിഗണന കൊടുക്കാറില്ല. എന്നാൽ ചിലർ വ്യക്തിപരമായ പരാമർശങ്ങൾ നടത്തുമ്പോൾ അത് എന്നെ ചെറുതായി ബാധിക്കാറുണ്ട്.
IPL 2026: സഞ്ജു ഫ്ളോപ്പായാൽ സിഎസ്കെ തോൽക്കും? ഇതെന്ത് ദുർവിധി; മിന്നൽ സ്റ്റംപിങ്ങുകൊണ്ടും കാര്യമുണ്ടായില്ല, കണക്കുകളിതാ
ഞാൻ ബാറ്റുകൊണ്ട് മാത്രം മറുപടി പറയാനാണ് ആഗ്രഹിക്കുന്നത്. പരിശീലനത്തിൽ ചെയ്യുന്നത് ആവർത്തിക്കാനാണ് ഞാൻ‌ ശ്രമിക്കുന്നത്. ആദ്യ പന്ത് മുതൽ സ്വാതന്ത്ര്യത്തോടെ കളിക്കാൻ ആഗ്രഹിക്കുന്നു. അതാണ് ഹെെദരാബാദിനെതിരേയും ചെയ്തത്' വെെഭവ് സൂര്യവംശി പറഞ്ഞു. പ്രഫുൽ വെെഭവിനെ പുറത്താക്കിയതിന് ശേഷം നടത്തിയ പ്രതികരണങ്ങൾ യുവതാരത്തെ പ്രകോപിപ്പിച്ചു എന്ന് അദ്ദേഹം തന്നെ തുറന്ന് പറഞ്ഞിരിക്കുകയാണ്.

വെെഭവ് സൂര്യവംശി ഇതിനോടകം പ്രധാന ബൗളർമാരെയെല്ലാം തല്ലിപ്പറത്തി വിറപ്പിച്ച് കഴിഞ്ഞു. ജസ്പ്രീത് ബുംറയും ട്രന്റ് ബോൾട്ടും ഉൾപ്പെടെ പല സീനിയർ ബൗളർമാരും വെെഭവിന്റെ ബാറ്റിങ് ചൂടറിഞ്ഞു. ഏറ്റവും ഒടുവിലായി ഹെെദരാബാദിന്റെ ക്യാപ്റ്റനും ഓസീസ് സൂപ്പർ താരവുമായ പാറ്റ് കമ്മിൻസാണ് വെെഭവിന്റെ മികവിന് മുന്നിൽ സുല്ലിട്ടത്.
IPL 2026: അത് എങ്ങനെ ഔട്ടാവും? അൻകൃഷ് രഘുവംശിയുടെ പുറത്താകലിൽ വിവാദം കത്തുന്നു; ഋഷഭിനെതിരേ ആരാധക രോഷം

വെെഭവിന്റെ ബാറ്റിങ് പ്രകടനംകണ്ട് ഞാൻ വെെഭവിന്റെ ആരാധകനായി മാറിയെന്നാണ് കമ്മിൻസ് തുറന്ന് പറഞ്ഞത്. അത്രത്തോളം മികവ് കാട്ടാൻ യുവതാരത്തിന് സാധിക്കുന്നുണ്ടെന്നതാണ് എടുത്തു പറയേണ്ടത്. വെെഭവ് സൂര്യവംശി വെെകാതെ ഇന്ത്യൻ ടീമിലും അരങ്ങേറ്റം കുറിക്കാൻ പോവുകയാണ്. വരാനിരിക്കുന്ന അയർലൻഡ് ടി20 പരമ്പരയിൽ ഇന്ത്യൻ ടീമിനൊപ്പം വെെഭവും ഉണ്ടാവും എന്നാണ് വിവരം.

എന്തായാലും വെെഭവ് ഇതിനോടകം വലിയ പ്രതീക്ഷ നൽകുന്ന താരമായി മാറിക്കഴിഞ്ഞു. ഇനി എത്രത്തോളം മുന്നോട്ട് പോകാൻ വെെഭവിന് സാധിക്കുമെന്നത് മാത്രമാണ് കണ്ടറിയേണ്ടത്. എന്തായാലും രാജസ്ഥാൻ റോയൽസിന്റെ വജ്രായുധമായി ഇതിനോടകം മാറാൻ വെെഭവിന് സാധിച്ചിരിക്കുകയാണ്.