അക്കാര്യത്തിൽ ആശങ്കയില്ല, പഞ്ചാബ് കിങ്സിന് എതിരായ കളിക്ക് മുൻപ് സൂപ്പർ താരത്തി‌ന് പി‌ന്തുണയുമായി സഞ്ജു സാംസൺ

Curated byഗോകുൽ എസ് | Samayam Malayalam | Updated: 5 Apr 2025, 1:29 pm

Samayam Malayalamസഞ്ജു സാംസൺ

2025 സീസൺ ഇന്ത്യ‌ൻ പ്രീമിയർ ലീഗിലെ തങ്ങളുടെ നാലാം മത്സരത്തിൽ ഇന്ന് പഞ്ചാബ് കിങ്സിനെ നേരിടാൻ ഒരു‌ങ്ങുകയാണ് രാജസ്ഥാൻ റോയൽസ്. ആദ്യ മൂന്ന് കളികളിൽ ഒന്നിൽ മാത്രം ജയിക്കാനായ രാജസ്ഥാൻ റോയൽസിന് ഇന്നത്തെ കളി സുപ്രധാനമാണ്. സഞ്ജു സാംസൺ രാജസ്ഥാൻ റോയൽസ് ക്യാപ്റ്റനായി തിരിച്ചെത്തുന്നു എന്നതാണ് ഇന്നത്തെ കളിയുടെ ഏറ്റവും വലിയ പ്രത്യേകത. ഫിറ്റ്നസ് പ്രശ്നങ്ങളെത്തുടർന്ന് ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായിട്ടായിരുന്നു സഞ്ജു കളിച്ചത്. സഞ്ജു നായകനായി മടങ്ങിയെത്തുന്നത് രാജസ്ഥാൻ റോയൽസിന് ആവേശം സമ്മാനിക്കുന്നുണ്ടെങ്കിലും അതിനിടെയും ടീമിന് വലിയ ആശങ്ക സമ്മാനിക്കുന്നതാണ് സൂപ്പർ താരം യശസ്വി ജയ്സ്വാളിന്റെ ഫോമൗട്ട്. ആദ്യ മൂന്ന് കളികളിൽ നിന്ന് ആകെ 34 റൺസ് മാത്രമാണ് ജയ്സ്വാളിന് നേടാനായത്. സ്റ്റാർ ഓപ്പണറുടെ മോശം ഫോം ആദ്യ കളികളിൽ റോയൽസിനെ ബാധിക്കുകയും‌ ചെയ്തു. എന്നാൽ പഞ്ചാബ് കിങ്സിന് എതിരായ കളിക്ക് മുൻപ് മാധ്യമങ്ങളോട് സംസാരിക്കവെ മോശം ഫോമിലുള്ള യശസ്വിക്ക് സഞ്ജു സാസൺ പിന്തുണ അറിയിച്ചു.


ഫോമിലേക്ക് മടങ്ങിയെത്താൻ സാധ്യമായ എല്ലാം തന്നെ യശസ്വി ചെയ്യുന്നുണ്ടെന്ന്‌ ചൂണ്ടിക്കാട്ടിയ സഞ്ജു, ടീമിന് ആവശ്യമുള്ള സമയത്ത് അദ്ദേഹം ഫോമിലേക്ക് എത്തുമെന്നും വ്യക്തമാക്കി. കഠിനമായ പരിശീലനമാണ് താരം നടത്തുന്നതെന്നും ഇതിനൊപ്പം സഞ്ജു കൂട്ടിച്ചേർത്തു. യശസ്വിയുടെ മോശം ഫോമിൽ തനിക്ക് ഒട്ടും ആശങ്കയില്ലെന്ന് പ്രകടമാക്കുന്നതാണ് സഞ്ജുവിന്റെ വാക്കുകൾ.

Also Read: അടുത്ത കളിക്ക് മുൻപ് സഞ്ജുവിന്റെ രാജസ്ഥാൻ റോയൽസിന് തലവേദന നൽകി ഇക്കാര്യങ്ങൾ; ടീമിന്റെ പ്രധാന ആശങ്ക ഇങ്ങനെ

"നെറ്റ്സിൽ ഏറ്റവും കൂടുതൽ സമയം ബാറ്റ് ചെയ്യുന്നത് അവനാണ്. അവൻ നെറ്റ്സിൽ നിന്ന് പുറത്തുവരാൻ മണിക്കൂറുകളോളം ഞങ്ങൾക്ക് കാത്തിരിക്കേണ്ടി വരും. റൺസ് നേടാനും ടീമിനെ കളികൾ ജയിപ്പിക്കാനും തന്റെ ഭാഗത്ത് നിന്ന് ചെയ്യാവുന്നതിന്റെ പരമാവധി അദ്ദേഹം ചെയ്യുന്നുണ്ട്. നമുക്ക് എല്ലാവർക്കും അറിയുന്നത് പോലെ ഐപിഎൽ വെല്ലുവിളി നിറഞ്ഞ ഒരു ഫോർമാറ്റാണ്. ഒരു ഓപ്പണർ എന്ന നിലയിൽ അദ്ദേഹത്തിന്റെ കളി ആക്രമണാത്മകമാണ്‌. ഞങ്ങൾക്ക് ഒരു പോസിറ്റീവ് തുടക്കം നൽകാൻ അദ്ദേഹം ആഗ്രഹിക്കുന്നു. അവൻ ബൗണ്ടറികൾക്കായും സിക്സറുകൾക്കായും ശ്രമിക്കുന്നു, അതിനിടയിൽ വിക്കറ്റ് നഷ്ടപ്പെടാം." യശസ്വിയെക്കുറിച്ച് സഞ്ജു പറഞ്ഞുനിർത്തി.

Also Read: ഇന്ന് സഞ്ജു സാംസൺ സ്വന്തമാക്കുക ആ സ്പെഷ്യൽ റെക്കോഡ്, ഇക്കാര്യത്തിൽ നമ്പർ വൺ ആകും; കാത്തിരിക്കുന്നത് കിടിലൻ നേട്ടം

ഐപിഎല്ലിൽ രാജസ്ഥാൻ റോയൽസിന്റെ തന്ത്രങ്ങളിലെ പ്രധാനിയായ യശസ്വി ജയ്സ്വാൾ ഫോമിലേക്ക് മടങ്ങിയെത്തിയാൽ ടീമിന്റെ പകുതി പ്രശ്നങ്ങൾക്ക് അവസാനമാകും. ഇത്തവണ കളിച്ച ആദ്യ മൂന്ന് കളികളിൽ രണ്ടെണ്ണത്തിലാണ് അദ്ദേഹം രണ്ടക്കം പോലും കാണാതെ പുറത്തായത്. സൺ റൈസേഴ്സ് ഹൈദരാബാദിന് എതിരായ ആദ്യ കളിയിൽ ഒരു റൺസിൽ വീണ യശസ്വി കൊൽക്കത്ത നൈറ്റ് റൈഡേഴ്സിന് എതിരെ 29 റൺസ് നേടിയാണ് പുറത്തായത്. മൂന്നാമത്തെ മത്സരത്തിൽ ചെന്നൈ സൂപ്പർ കിങ്സിന് എതിരെ നാല് റൺസ് നേടിയാണ് അദ്ദേഹം പുറത്തായത്.