അടുത്ത കളിക്ക് മുൻപ് രാജസ്ഥാൻ റോയൽസിന് കനത്ത തിരിച്ചടി; സൂപ്പർ താരത്തിന്റെ കാര്യത്തിൽ സുപ്രധാന അപ്ഡേറ്റ് പുറത്ത്

Curated byഗോകുൽ എസ് | Samayam Malayalam | Updated: 30 Apr 2025, 12:35 am

2025 സീസൺ ഇന്ത്യൻ പ്രീമിയർ ലീഗിൽ അഞ്ച് മത്സരങ്ങളിൽ തുടർച്ചയായി പരാജയപ്പെട്ടതിന് ശേഷം വിജയ വഴിയിലേക്ക് തിരിച്ചെത്തിയിരിക്കുകയാണ് രാജസ്ഥാൻ റോയൽസ്. കഴിഞ്ഞ ദിവസം നടന്ന മത്സരത്തിൽ ഗുജറാത്ത് ടൈറ്റൻസിനെയാണ് റോയൽസ് വീഴ്ത്തിയത്. കൗമാര താരം വൈഭവ് സൂര്യവംശിയുടെ ഹീറോയിസം കണ്ട മത്സരത്തിൽ എട്ട് വിക്കറ്റിനായിരുന്നു രാജസ്ഥാന്റെ വിജയം. ഈ ജയത്തോടെ പ്ലേ ഓഫ് പ്രതീക്ഷകൾ സജീവമായി നിലനിർത്താനും റോയൽസിനായി. മെയ് ഒന്നാം തീയതി കരുത്തരായ മുംബൈ ഇന്ത്യൻസിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. ഈ കളിക്ക് മുൻപ് ടീമിനെ ആശങ്കപ്പെടുത്തുന്ന റിപ്പോർട്ടുകളാണ് പുറത്തുവരുന്നത്.

നിലവിൽ പരിക്കിന്റെ പിടിയിലുള്ള രാജസ്ഥാൻ റോയൽസ് നായകൻ സഞ്ജു സാംസണ് മുംബൈ ഇന്ത്യൻസിന് എതിരായ കളിയും നഷ്ടമായേക്കുമെന്നാണ് വിവരം. നേരത്തെ ഡെൽഹി ക്യാപിറ്റൽസിന് എതിരായ കളിക്കിടെയായിരുന്നു സഞ്ജുവിന് പരിക്കേറ്റത്. ഇതിന് ശേഷം താരം കളിക്കാൻ ഇറങ്ങിയിട്ടില്ല‌.

കഴിഞ്ഞ കളിക്ക് മുൻപ് സഞ്ജു പരിശീലനം പുനരാരംഭിച്ചെങ്കിലും പൂർണ ഫിറ്റ്നസിലേക്ക് എത്തിയിട്ടില്ലെന്നാണ് വിവരം. താരത്തിന്റെ കാര്യത്തിൽ റിസ്കെടുക്കാൻ റോയൽസ് തയ്യാറാകില്ലെന്നും അതിനാൽ മുംബൈ ഇന്ത്യൻസിന് എതിരെയും സഞ്ജുവില്ലാതെ റോയൽസ് ഇറങ്ങുമെന്നുമാണ് സൂചനകൾ. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണങ്ങളൊന്നും വന്നിട്ടില്ല.


സഞ്ജു സാംസണെ സംബന്ധിച്ച് തിരിച്ചടികളുടെ സീസണാണ് ഇത്തവണത്തേത്. ഇംഗ്ലണ്ടിന് എതിരായ ടി20 പരമ്പരക്കിടെ സംഭവിച്ച പരിക്കിനെത്തുടർന്ന് സീസണിലെ ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായിട്ടായിരുന്നു സഞ്ജു സാംസൺ കളിച്ചത്‌. ഈ മത്സരങ്ങളിൽ റിയാൻ പരാഗാണ് ടീമിനെ നയിച്ചത്. ഡെൽഹിക്ക് എതിരായ കളിക്കിടെ സംഭവിച്ച പരിക്കിനെത്തുടർന്ന് കഴിഞ്ഞ മൂന്ന് മത്സരങ്ങൾ താരത്തിന് നഷ്ടമാവുകയും ചെയ്തു. ഈ സീസണിൽ കളിച്ച ഏഴ് മത്സരങ്ങളിൽ 37.33 ബാറ്റിങ് ശരാശരിയിൽ 224 റൺസാണ് സഞ്ജുവിന്റെ സമ്പാദ്യം.

വൈഭവ് സൂര്യവംശി ഉടൻ ഇന്ത്യയുടെ ടി20 ടീമിലെത്തും, കിടിലൻ സെഞ്ചുറിക്ക് പിന്നാലെ പ്രതീക്ഷകളുമായി താരത്തിന്റെ പരിശീലകൻ
സഞ്ജു സാംസണിന്റെ അഭാവം കനത്ത തിരിച്ചടിയാണെങ്കിലും അദ്ദേഹത്തിന് പകരം ഓപ്പണിങിലേക്ക് വന്ന വൈഭവ് സൂര്യവംശിയുടെ പ്രകടനം രാജസ്ഥാൻ റോയൽസിന് വലിയ പ്രതീക്ഷ നൽകുന്നതാണ്. ലക്നൗ സൂപ്പർ ജയന്റ്സിന് എതിരെ കളിച്ചുകൊണ്ട് ഐപിഎല്ലിൽ അരങ്ങേറിയ താരം മൂന്ന് കളികളിൽ 151 റൺസ് നേടിക്കഴിഞ്ഞു. ഇതിൽ ഗുജറാത്ത് ടൈറ്റൻസിന് എതിരെയാണ് താരത്തിന്റെ ബാറ്റിങ് വിസ്ഫോടനം കണ്ടത്. 38 പന്തിൽ 101 റൺസാണ് ഈ കളിയിൽ താരം നേടിയത്. ഇതോടെ ഐപിഎല്ലിൽ സെഞ്ചുറി നേടുന്ന ഏറ്റവും പ്രായം കുറഞ്ഞ താരമായും വൈഭവ് മാറി.

2025 സീസൺ ഇന്ത്യൻ പ്രീമിയർ ലീഗിൽ നിലവിൽ എട്ടാം സ്ഥാനത്താണ് രാജസ്ഥാൻ റോയൽസ്. 10 കളികളിൽ നിന്ന് ആകെ മൂന്ന് പോയിന്റ് മാത്രമാണ് അവരുടെ സമ്പാദ്യം. മൂന്ന് കളികളിൽ മാത്രം ജയിക്കാനായ റോയൽസ് ഏഴ് കളികളിൽ തോറ്റു‌. ഇനി നാല് കളികളാണ് സീസണിൽ രാജസ്ഥാന് ബാക്കിയുള്ളത്. ഈ മത്സരങ്ങൾ എല്ലാം വിജയിക്കുകയും കുറച്ച് മത്സരഫലങ്ങൾ അനുകൂലമാവുകയും ചെയ്താലാണ് ഇനി റോയൽസിന് പ്ലേ ഓഫിലേക്ക് നേരിയ സാധ്യതകളുള്ളത്.

'എനിക്ക് ഒരു പേടിയുമില്ല'- ചരിത്ര സെഞ്ചുറിക്ക് പിന്നാലെ 14കാരന്‍; അഭിനന്ദിക്കാന്‍ വീല്‍ചെയറില്‍ നിന്ന് ചാടി എഴുന്നേറ്റ് രാഹുല്‍ ദ്രാവിഡ്
10 കളികളിൽ 14 പോയിന്റുള്ള റോയൽ ചലഞ്ചേഴ്സ് ബംഗളൂരുവാണ് നിലവിൽ ഐപിഎൽ പോയിന്റ് പട്ടികയിൽ ഒന്നാം സ്ഥാനത്ത്. 10 കളികളിൽ 12 പോയിന്റുള്ള മുംബൈ ഇന്ത്യൻസ് രണ്ടാമതും, ഗുജറാത്ത് ടൈറ്റൻസ് മൂന്നാമതുമുണ്ട്.