അടുത്ത കളിയിൽ രാജസ്ഥാൻ റോയൽസ് കാത്തിരിക്കുന്നത് അക്കാര്യം; നടന്നാൽ സഞ്ജുവും ടീമും വേറെലെവലാകും

Curated byഗോകുൽ എസ് | Samayam Malayalam | Updated: 30 Mar 2025, 1:20 am

Samayam Malayalamരാജസ്ഥാൻ റോയൽസ്

2025 സീസൺ ഇന്ത്യൻ പ്രീമിയർ ലീഗിലെ ആദ്യ രണ്ട് കളികളിലും തോൽവി നേരിടേണ്ടി വന്ന രാജസ്ഥാൻ റോയൽസ് ഞായറാഴ്ച അവരുടെ മൂന്നാം മത്സരം കളിക്കാൻ ഇറങ്ങുകയാണ്. രണ്ടാം ഹോം ഗ്രൗണ്ടായ ഗുവാഹത്തിയിൽ നടക്കാനിരിക്കുന്ന കളിയിൽ ചെന്നൈ സൂപ്പർ കിങ്സിനെയാണ് രാജസ്ഥാൻ റോയൽസ് നേരിടുക. നിലവിൽ പോയിന്റ് പട്ടികയിൽ അവസാന സ്ഥാനത്തുള്ള രാജസ്ഥാൻ റോയൽസിന് അതിനിർണായക മത്സരമാണിത്.സീസണിലെ ആദ്യ കളികളിൽ ആരാധകരെ വലിയ രീതിയിൽ നിരാശപ്പെടുത്തിയ രാജസ്ഥാൻ റോയൽസിന് ഒരു തിരിച്ചുവരവ് ഒട്ടും എളുപ്പമാകില്ല എന്ന കാര്യം ഉറപ്പ്. ആദ്യ കളികളിൽ ഫ്ലോപ്പായ ചില പ്രധാന കളിക്കാർ ഫോമിലേക്ക് മടങ്ങിയെത്തിയാൽ മാത്രമേ രാജസ്ഥാൻ റോയൽസിന്റെ ജയപ്രതീക്ഷകൾ വർധിക്കൂ. പ്രധാനമായും മൂന്ന് താരങ്ങളുടെ ഫോമിലേക്കുള്ള തിരിച്ചുവരവാണ് ഞായറാഴ്ച രാജസ്ഥാൻ റോയൽസ് ആഗ്രഹിക്കുന്നത്. ഞായറാഴ്ച റോയൽസ് ആരാധകർ ആഗ്രഹിക്കുന്ന തിരിച്ചുവരവ് ഏതൊക്കെ താരങ്ങളുടേത് നോക്കാം.

ഞായറാഴ്ച രാജസ്ഥാൻ റോയൽസ് ഏറ്റവുമധികം കാത്തിരിക്കുന്നത് യശസ്വി ജയ്സ്വാൾ ഫോമിലേക്ക് തിരിച്ചെത്തുന്നത് കാണാനാണ്. രാജസ്ഥാൻ റോയൽസിന്റെ ഏറ്റവും പ്രധാന താരങ്ങളിൽ ഒരാളായ ജയ്സ്വാൾ സീസണിലെ രണ്ട് കളികളിലും നിരാശപ്പെടുത്തിയിരുന്നു. സൺ റൈസേഴ്സ് ഹൈദരാബാദിനെതിരെ ഒറ്റയക്കത്തിൽ പുറത്തായ ജയ്സ്വാൾ, കൊൽക്കത്ത നൈറ്റ് റൈഡേഴ്സിന് എതിരായ കളിയിൽ 29 റൺസിന് വീണു. ഓപ്പണിങ്ങിൽ ജയ്സ്വാൾ ഫോമിലേക്ക് ഉയരാതിരുന്നത് രണ്ട് കളികളിലും രാജസ്ഥാൻ റോയൽസിനെ ബാധിച്ചിരുന്നു. ചെന്നൈ സൂപ്പർ കിങ്സിന് എതിരെ താരത്തിന്റെ ഗംഭീര തിരിച്ചുവരവാണ് റോയൽസ് പ്രതീക്ഷിക്കുന്നത്.

Also Read: രാജസ്ഥാൻ റോയൽസ് കാണിച്ചത് വലിയ മണ്ടത്തരം, ആ നീക്കം സഞ്ജുവിൻ്റെ ടീമിന് ഒരു ഗുണവും ചെയ്തില്ല; കനത്ത വിമർശനങ്ങൾ

2025 സീസൺ ഐപിഎല്ലിലെ ആദ്യ രണ്ട് കളികളിലും രാജസ്ഥാൻ റോയൽസ് നിരയിൽ നിരാശപ്പെടുത്തിയ താരമാണ് നിതീഷ് റാണ. ഹൈദരാബാദിന് എതിരെ 11 റൺസിൽ വീണ അദ്ദേഹം കെകെആറിന് എതിരെ പുറത്തായത് വെറും എട്ട് റൺസിനാണ്. മധ്യനിരയിൽ നിതീഷ് റാണ ഫോമിലേക്ക് തിരിച്ചെത്തേണ്ടത് രാജസ്ഥാൻ റോയൽസിന് വളരെ പ്രധാനമാണ്. ഇക്കഴി‌ഞ്ഞ ഐപിഎൽ മെഗാ ലേലത്തിൽ 4.2 കോടി രൂപക്ക് രാജസ്ഥാ‌ റോയൽസ് സ്വന്തമാക്കിയ താരമാണ് നിതീഷ് റാണ. റോയൽസിന്റെ തന്ത്രങ്ങളിൽ പ്രധാനികളിൽ ഒരാളായ നിതീഷ് ഞായറാഴ്ച ഫോമിലേക്ക് മടങ്ങിയെത്തുമെന്ന പ്രതീക്ഷയിലാണ് ആരാധകർ.

Also Read: സഞ്ജുവിന്റെ രാജസ്ഥാൻ റോയൽസിന് ഇരട്ട തലവേദന നൽകി ഇക്കാര്യം; ഈ മൂന്ന് താരങ്ങൾ ഫോമിലേക്ക് വന്നില്ലെങ്കിൽ തിരിച്ചടി

ഇക്കഴിഞ്ഞ മെഗാ ലേലത്തിൽ രാജസ്ഥാൻ റോയൽസ് ഏറ്റവും വലിയ പ്രതീക്ഷയോടെ സ്വന്തമാക്കിയ താരമാണ് ജോഫ്ര ആർച്ചർ. 12.5 കോടി രൂപക്കായിരുന്നു ഈ ഇംഗ്ലീഷ് പേസർ രാജസ്ഥാൻ റോയൽസിൽ എത്തിയത്. പക്ഷേ ആദ്യ രണ്ട് കളികളിലും അദ്ദേഹം വൻ പരാജയമായി. ഹൈദരാബാദിന് എതിരെ 4 ഓവറുകളിൽ 76 റൺസ് വഴങ്ങിയ ആർച്ചർ കൊൽക്കത്ത നൈറ്റ് റൈഡേഴ്സിന് എതിരെ 2.3 ഓവറുകളിൽ 33 റൺസാണ് വിട്ടുകൊടുത്തത്.

ഈ രണ്ട് കളികളിലും ഒറ്റ വിക്കറ്റ് പോലും സ്വന്തമാക്കാൻ അദ്ദേഹത്തിനായില്ല. രാജസ്ഥാൻ റോയൽസിന്റെ ബൗളിങ് ആക്രമണത്തിലെ ഏറ്റവും പ്രധാനിയാണ് ആർച്ചർ. അതുകൊണ്ടു തന്നെ അദ്ദേഹം എത്രയും വേഗം ഫോമിലേക്ക് മടങ്ങിയെത്തേണ്ടത് രാജസ്ഥാന് പ്രധാനമാണ്.

അതേ സമയം ഞായറാഴ്ച രാജസ്ഥാൻ റോയൽസിന്റെ എതിരാളികളായ ചെന്നൈ സൂപ്പർ കിങ്സും സീസണിലെ മൂന്നാം മത്സരമാണ് കളിക്കാൻ ഒരുങ്ങുന്നത്. മുംബൈ ഇന്ത്യൻസിന് എതിരെയായിരുന്നു‌ സിഎസ്കെയുടെ ആദ്യ കളി. ഈ മത്സരത്തിൽ നാല് വിക്കറ്റ് വിജയം നേടാൻ അവർക്ക് കഴിഞ്ഞു. ആർസിബിക്ക് എതിരെയായിരുന്നു അവരുടെ രണ്ടാം മത്സരം. ഈ കളിയിൽ 50 റൺസിന്റെ കനത്ത പരാജയമാണ് ചെന്നൈ നേരിട്ടത്.