അടുത്ത കളിയിൽ രാജസ്ഥാൻ റോയൽസ് ടീമിൽ ഈ രണ്ട് മാറ്റങ്ങൾ അനിവാര്യം; യുവതാരങ്ങൾക്ക് അവസരം നൽകണമെന്ന് ആരാധകർ

Curated byഗോകുൽ എസ് | Samayam Malayalam | Updated: 1 May 2025, 12:59 am

2025 സീസൺ ഇന്ത്യൻ പ്രീമിയർ ലീഗിൽ ആരാധകരുടെ പ്രതീക്ഷകൾക്ക് ഒത്തുയരാൻ സാധിച്ചിട്ടില്ലാത്ത ടീമാണ് രാജസ്ഥാൻ റോയൽസ്. 10 കളികളിൽ മൂന്ന് ജയം മാത്രമാണ് ഇതുവരെ ടീമിന്റെ സമ്പാദ്യം. അവസാന കളിയിൽ ഗുജറാത്ത് ടൈറ്റൻസിനെ തകർത്ത അവരുടെ അടുത്ത മത്സരം മെയ് ഒന്നിന് കരുത്തരായ മുംബൈ ഇന്ത്യൻസിന് എതിരെയാണ്. സ്വന്തം തട്ടകമായ ജയ്പൂരിലെ സവായ് മാൻസിങ് സ്റ്റേഡിയത്തിലാണ് ഈ മത്സരം രാജസ്ഥാൻ കളിക്കുന്നത്.2025 സീസണിൽ രാജസ്ഥാൻ റോയൽസിന്റെ പതിനൊന്നാമത് മത്സരം കൂടിയാണ് ഇത്. ഈ കളിയിൽ പരാജയപ്പെട്ടാൽ ടീം പ്ലേ ഓഫ് കാണാതെ പുറത്താകും. അതേ സമയം ജീവന്മരണ പോരാട്ടത്തിൽ രാജസ്ഥാൻ റോയൽസ് ടീമിൽ ചില നിർണായക മാറ്റങ്ങൾ ആരാധകർ ആഗ്രഹിക്കുന്നുണ്ട്. ഈ സീസണിൽ ഇതുവരെ അവസരം ലഭിക്കാത്ത രണ്ട് യുവതാരങ്ങളെ പ്ലേയിങ് ഇലവനിൽ കാണാൻ ആരാധകർക്ക് ആഗ്രഹമു‌ണ്ട്. സമൂഹ മാധ്യമങ്ങളിൽ ആരാധകർ ഇക്കാര്യം പരസ്യമായി പറയുന്നുമുണ്ട്.


ടീമിന്റെ ഇന്ത്യൻ യുവതാരങ്ങളായ ആകാശ് മധ്വാൽ, കുനാൽ സിങ് റാത്തോർ എന്നിവർക്ക് മുംബൈ ഇന്ത്യൻസിന് എതിരെ രാജസ്ഥാൻ റോയൽസ് അവസരം നൽകണമെന്നാണ് ആരാധക ആവശ്യം. അഭ്യന്തര ക്രിക്കറ്റിൽ മികച്ച പ്രകടനം നടത്തുന്ന ഈ താരങ്ങൾക്ക് രാജസ്ഥാൻ റോയൽസ് ടീമിൽ ഇതുവരെ അവസരം ലഭിച്ചിട്ടില്ല.

വലം കൈയ്യൻ പേസറായ ആകാശ് മധ്വാലിനെ കഴിഞ്ഞ ഐപിഎൽ മെഗാ ലേലത്തിൽ നിന്ന് 1.2 കോടി രൂപക്കായിരുന്നു രാജസ്ഥാൻ റോയൽസ് സ്വന്തമാക്കിയത്. മുൻ സീസണുകളിൽ മുംബൈ ഇന്ത്യൻസിനായി കാഴ്ച വെച്ച മികച്ച പ്രകടനങ്ങളാണ് രാജസ്ഥാൻ റോയൽസിനെ മധ്വാലിനെ സ്വന്തമാക്കുന്നതിലേക്ക് എത്തിച്ചത്.

രോഹിതിന് കോളടിച്ചു, മറ്റൊരു സൂപ്പർ താരം ടീമിൽ നിന്ന് പുറത്താകും; 35 അംഗ ചുരുക്ക പട്ടിക തെരഞ്ഞെടുത്ത് ബിസിസിഐ
2023 സീസൺ ഐപിഎല്ലിൽ 14 വിക്കറ്റുകളും 2024 ൽ അഞ്ച് വിക്കറ്റുകളുമാണ് മുംബൈ ഇന്ത്യൻസ് ജേഴ്സിയിൽ ഈ യുവ പേസർ സ്വന്തമാക്കിയത്. എന്നാൽ ഈ സീസണിലെ ആദ്യ 10 കളികളിലും റോയൽസ് താരത്തെ പുറത്തിരുത്തി. തുഷാർ ദേഷ്പാണ്ടെ വൻ ഫ്ലോപ്പായിട്ടും മധ്വാലിനെ പരീക്ഷിക്കാൻ റോയൽസ് തയ്യാറായില്ല. ദേഷ്പാണ്ടെക്ക് പകരം പരീക്ഷിച്ച യുധ്വീർ സിങ്ങും പരാജയമായ പശ്ചാത്തലത്തിൽ അടുത്ത കളിയിൽ ആകാശ് മധ്വാലിനെ റോയൽസ് നിരയിൽ കണ്ടാൽ അത്ഭുതപ്പെടാനില്ല.

യുവ വിക്കറ്റ് കീപ്പർ ബാറ്ററായ കുനാൽ സിങ് റാത്തോറും റോയൽസിന്റെ പ്ലേയിങ് ഇലവനിൽ സ്ഥാനം അർഹിക്കുന്ന താരമാണ്‌. അഭ്യന്തര ക്രിക്കറ്റിൽ രാജസ്ഥാന് വേണ്ടി കളിക്കുന്ന താരമാണ് കുനാൽ സിങ്. ധ്രുവ് ജൂറൽ ഈ സീസണിൽ നിരാശപ്പെടുത്തുന്ന സാഹചര്യത്തിൽ അദ്ദേഹത്തിന് പകരം ഈ യുവ വിക്കറ്റ് കീപ്പറെ റോയൽസിന് പരീക്ഷിക്കാവുന്നതാണ്. അടുത്ത കളിയിൽ ഈയൊരു മാറ്റവും ആരാധകർ ആഗ്രഹിക്കുന്നുണ്ട്.

രോഹിത് ശർമയുടെ ആസ്തി വിവരങ്ങൾ കണ്ട് ഞെട്ടി ആരാധകർ; കാറുകളോട് പ്രിയമുള്ള താരത്തിന്റെ ഗാരേജിലുള്ളത് ലക്ഷ്വറി കാറുകൾ
ഇനി നാല് മത്സരങ്ങളാണ് 2025 സീസണിൽ രാജസ്ഥാൻ റോയൽസിന് ബാക്കിയുള്ളത്. ഇതിൽ ആദ്യത്തേതാണ് മുംബൈ ഇന്ത്യൻസിന് എതിരെയുള്ളത്. ഇതിന് ശേഷം മെയ് നാലാം തീയതി കൊൽക്കത്ത നൈറ്റ് റൈഡേഴ്സ്, മെയ് 12 ന് ചെന്നൈ സൂപ്പർ കിങ്സ്, മെയ് 16 ന് പഞ്ചാബ് കിങ്സ് എന്നിവർക്ക് എതിരെയുമാണ് രാജസ്ഥാൻ റോയൽസിന് മത്സരങ്ങൾ.