അർജന്റീനയെ ‘ഇരുണ്ട ദിനം’ ഓർമിപ്പിക്കുന്ന റഫറി, ഗ്രൗണ്ടിലെ കടുപ്പക്കാരൻ, മെസ്സിപ്പടയ്ക്ക് ആശങ്കയേറും, സ്പെയിൻ ഹാപ്പിയാണ്!

2022 നവംബർ 22. ഖത്തറിലെ ലുസൈൽ സ്റ്റേഡിയം. ലോകകപ്പ് ചരിത്രത്തിലെ ഏറ്റവും വലിയ അട്ടിമറികളിലൊന്നിന് അന്ന് ആഗോള ഫുട്ബോൾ സാക്ഷ്യം വഹിച്ചു. കരിയറിലെ അവസാന ലോകകപ്പിനായി മൈതാനത്തേക്ക് ബൂട്ട് കെട്ടിയിറങ്ങിയ ലയണൽ മെസ്സിയെയും കിരീടം മാത്രം ലക്ഷ്യമിട്ടെത്തിയ അർജന്റീനയെയും സൗദി അറേബ്യ ഒന്നിനെതിരെ രണ്ട് ഗോളുകൾക്ക് അമ്പരപ്പിച്ചു കളഞ്ഞു. അന്ന് ആ മത്സരത്തിന്റെ നിയന്ത്രണം കയ്യിലുണ്ടായിരുന്ന റഫറിയുടെ പേര് സ്ലാവ്കോ വിൻസിച്ച് എന്നായിരുന്നു.

വർഷങ്ങൾ നാല് കഴിഞ്ഞിരിക്കുന്നു. കഥാ പശ്ചാത്തലം ഖത്തറിൽ നിന്നും യുഎസിലെ ന്യൂജഴ്സിയിലേക്ക് മാറിയിരിക്കുന്നു. ലോക ഫുട്ബോളിന്റെ സിംഹാസനം ആർക്കെന്ന് നിശ്ചയിക്കുന്ന 2026 ലോകകപ്പിന്റെ ഫൈനൽ പോരാട്ടത്തിൽ അർജന്റീന സ്പെയിനെ നേരിടാൻ ഒരുങ്ങുമ്പോൾ, ഫിഫ വീണ്ടും ആ സ്ലോവേനിയക്കാരന്റെ കൈകളിലേക്ക് തന്നെ വിസിൽ ഏൽപ്പിച്ചിരിക്കുന്നു. മെറ്റ്‍ലൈഫ് സ്റ്റേഡിയത്തിൽ നടക്കുന്ന ഈ മഹാപോരാട്ടത്തിൽ സ്ലാവ്കോ വിൻസിച്ച് റഫറിയായി എത്തുമ്പോൾ, അർജന്റീനിയൻ ആരാധകരുടെ മനസ്സിൽ ലുസൈലിലെ ആ കറുത്ത ഓർമകൾ വീണ്ടും നിഴൽ വീഴ്ത്തുകയാണ്.

∙ ലുസൈലിലെ ആ രാത്രി: വിൻസിച്ചും അർജന്റീനയും

അർജന്റീന ആരാധകർക്ക് സ്ലാവ്കോ വിൻസിച്ച് എന്ന പേര് സമ്മാനിക്കുന്നത് അത്ര സുഖമുള്ള ഓർമകളല്ല. 2022 ലോകകപ്പിലെ ഗ്രൂപ്പ് ഘട്ടത്തിലെ ആദ്യ മത്സരത്തിലായിരുന്നു വിൻസിച്ച് അർജന്റീനയുടെ മത്സരം നിയന്ത്രിക്കാൻ എത്തിയത്. കളി തുടങ്ങി എട്ടാം മിനിറ്റിൽ തന്നെ അർജന്റീനയ്ക്ക് അനുകൂലമായി പെനാൽറ്റി വിധിച്ച് വിൻസിച്ച് മെസ്സിപ്പടയ്ക്ക് അനുകൂലമായ തുടക്കം നൽകിയിരുന്നു. മെസ്സി അത് ലക്ഷ്യത്തിലെത്തിക്കുകയും ചെയ്തു. മത്സരത്തിലുടനീളം സൗദി താരങ്ങൾക്ക് ആറ് മഞ്ഞക്കാർഡുകൾ വരെ അദ്ദേഹം നൽകി.

എന്നാൽ രണ്ടാം പകുതിയിൽ കളി മാറി മറിഞ്ഞു. സൗദിയുടെ പ്രത്യാക്രമണങ്ങൾക്ക് മുന്നിൽ അർജന്റീന പ്രതിരോധം തകർന്നപ്പോൾ, ഒടുവിൽ വിൻസിച്ച് ഫൈനൽ വിസിൽ മുഴക്കുമ്പോൾ സ്കോർ ബോർഡ് 2-1 എന്ന് സൗദിക്ക് അനുകൂലമായിരുന്നു. മെസ്സിയുടെയും സംഘത്തിന്റെയും ആ ടൂർണമെന്റിലെ ഏക പരാജയമായിരുന്നു അത്. ആ കടുത്ത തോൽവിക്ക് ശേഷം അർജന്റീന കിരീടം ചൂടിയെങ്കിലും, വിൻസിച്ചിന്റെ വിസിലിന് കീഴിൽ വഴങ്ങിയ ആ അട്ടിമറി ഇന്നും ആരാധകരുടെ നെഞ്ചിലെ ഒരു വിങ്ങലാണ്. ആ ഒരൊറ്റ മത്സരം മാത്രമാണ് അർജന്റീന വിൻസിച്ചിന്റെ നിയന്ത്രണത്തിൽ കളിച്ചിട്ടുള്ളത് എന്നതും ശ്രദ്ധേയമാണ്.

∙ കണ്ണീരോടെ വിൻസിച്ച്, ഇത് ചരിത്ര നിയോഗം

ഇത്തവണ ഫൈനൽ നിയന്ത്രിക്കാനുള്ള റഫറിമാരുടെ പട്ടിക പ്രഖ്യാപിച്ചപ്പോൾ പലരെയും അദ്ഭുതപ്പെടുത്തിക്കൊണ്ടാണ് വിൻസിച്ചിന്റെ പേര് മുന്നിലെത്തിയത്. ഫൈനൽ നിയന്ത്രിക്കാനുള്ള ഔദ്യോഗിക റഫറി കിറ്റ് ഏറ്റുവാങ്ങുമ്പോൾ വിൻസിച്ച് വികാരാധീനനായി കണ്ണീരണിഞ്ഞ ദൃശ്യങ്ങൾ ഫുട്ബോൾ ലോകം ഏറ്റെടുത്തു കഴിഞ്ഞു. തന്റെ കരിയറിലെ ഏറ്റവും വലിയ സ്വപ്ന സാക്ഷാത്കാര നിമിഷമാണിതെന്ന് 46-കാരനായ ഈ റഫറി തെളിയിക്കുന്നു. ലോകകപ്പിന്റെ ചരിത്രത്തിൽ ഫൈനൽ നിയന്ത്രിക്കുന്ന ആദ്യ സ്ലോവേനിയൻ റഫറിയെന്ന റെക്കോർഡും ഇതോടെ വിൻസിച്ച് സ്വന്തം പേരിൽ കുറിക്കും.

സഹപ്രവർത്തകരായ ടോമാസ് ക്ലാൻക്നിക്കും ആൻഡ്രാസ് കോവാചിച്ചും അസിസ്റ്റന്റ് റഫറിമാരായി ഫൈനലിൽ അദ്ദേഹത്തോടൊപ്പമുണ്ടാകും. ക്ലബ് തലത്തിലും രാജ്യാന്തര തലത്തിലും വലിയ മത്സരങ്ങൾ നിയന്ത്രിച്ചു പരിചയമുള്ള വിൻസിച്ച് 2024-ലെ റയൽ മാഡ്രിഡ് - ബോറൂസിയ ഡോർട്മുണ്ട് ചാംപ്യൻസ് ലീഗ് ഫൈനലും, 2022ലെ യൂറോപ്പാ ലീഗ് ഫൈനലും നിയന്ത്രിച്ച വ്യക്തിയാണ്.

∙ സ്പെയിനുമായുള്ള ബന്ധം: ലാമിൻ യമാലിന്റെ സാന്നിധ്യം

മറുഭാഗത്ത് സ്പെയിൻ ക്യാംപിനും വിൻസിച്ചിനെക്കുറിച്ച് കൃത്യമായ ധാരണയുണ്ട്. യൂറോപ്യൻ ഫുട്ബോളിലെ സ്പെയിന്റെ പല നിർണായക മത്സരങ്ങളും വിൻസിച്ച് നിയന്ത്രിച്ചിട്ടുണ്ട്. 2024ലെ യൂറോ കപ്പിൽ ഫ്രാൻസിനെതിരെ സ്പെയിൻ വിജയിച്ച സെമി ഫൈനലിലും, ഇറ്റലിക്കെതിരെയുള്ള ഗ്രൂപ്പ് മത്സരത്തിലും വിസിൽ ഊതിയത് വിൻസിച്ച് ആയിരുന്നു. സ്പെയിന്റെ കൗമാര വിസ്മയം ലാമിൻ യമാൽ സീനിയർ ടീമിൽ സ്ഥിരസാന്നിധ്യമായ ശേഷമുള്ള പല പ്രധാന വിജയങ്ങളിലും വിൻസിച്ചിന്റെ സാന്നിധ്യമുണ്ടായിരുന്നു എന്നത് സ്പാനിഷ് ആരാധകർക്ക് ആത്മവിശ്വാസം നൽകുന്ന ഒന്നാണ്. എന്നാൽ റയൽ മാഡ്രിഡ് ആരാധകർക്ക് അദ്ദേഹത്തോട് കടുത്ത അമർഷമുണ്ട്. ചാംപ്യൻസ് ലീഗിൽ എഡ്വേർഡോ കാമവിംഗയ്ക്ക് നൽകിയ വിവാദപരമായ ചുവപ്പ് കാർഡ് ഇപ്പോഴും സ്പാനിഷ് മാധ്യമങ്ങളിൽ ചർച്ചയാണ്.

∙ കടുത്ത തീരുമാനങ്ങളെടുക്കുന്ന റഫറി‌

ഈ ലോകകപ്പിൽ ഇതിനകം മൂന്ന് മത്സരങ്ങൾ വിൻസിച്ച് നിയന്ത്രിച്ചു കഴിഞ്ഞു. ബ്രസീൽ - മൊറോക്കോ മത്സരവും, അൾജീരിയ - ജോർദാൻ മത്സരവും കൂടാതെ മെക്സിക്കോ - ഇക്വഡോർ പ്രീ-ക്വാർട്ടർ പോരാട്ടവും നിയന്ത്രിച്ചത് ഇദ്ദേഹമായിരുന്നു. ഇതിൽ മെക്സിക്കോ - ഇക്വഡോർ മത്സരത്തിലാണ് വിൻസിച്ച് ഈ ടൂർണമെന്റിലെ ഏറ്റവും വിവാദപരമായ തീരുമാനമെടുത്തത്.

ഫിഫയുടെ പുതിയ 'വിനീഷ്യസ് റൂൾ' (കളിക്കാർ റഫറിയെയോ മറ്റ് കളിക്കാരെയോ ചീത്തവിളിക്കുന്നത് മറയ്ക്കാൻ വായ കൈകൊണ്ട് പൊത്തിപ്പിടിക്കുന്നത് തടയുന്ന നിയമം) അനുസരിച്ച് ഇക്വഡോറിന്റെ പിയറോ ഹിൻകാപിയേക്ക് വിൻസിച്ച് നേരിട്ട് ചുവപ്പ് കാർഡ് നൽകി പുറത്താക്കി. രാജ്യാന്തര കരിയറിൽ അതുവരെ വലിയ ടൂർണമെന്റുകളിൽ ചുവപ്പ് കാർഡ് എടുക്കാതിരുന്ന വിൻസിച്ചിന്റെ ഈ കടുത്ത തീരുമാനം വലിയ ചർച്ചയായിരുന്നു. കാർഡുകൾ നൽകുന്നതിൽ സാധാരണയായി അൽപം മടി കാണിക്കാറുള്ള റഫറിയാണെങ്കിലും (ശരാശരി 3 മഞ്ഞക്കാർഡ് ഒരു മത്സരത്തിൽ), ആവശ്യമെങ്കിൽ കടുത്ത തീരുമാനങ്ങൾ എടുക്കാൻ തനിക്ക് മടിയില്ലെന്ന് അദ്ദേഹം തെളിയിച്ചു കഴിഞ്ഞു.

∙ സമ്മർദത്തിലാകുമോ വിസിൽ?

ന്യൂയോർക്കിലെ മെറ്റ്ലൈഫ് സ്റ്റേഡിയത്തിൽ ഞായറാഴ്ച ഉച്ചയ്ക്ക് ശേഷം (പ്രാദേശിക സമയം 3ന്) കളി തുടങ്ങുമ്പോൾ ലോകം മുഴുവൻ ഉറ്റുനോക്കുന്നത് രണ്ട് കാര്യങ്ങളിലേക്കായിരിക്കും. ഒന്ന്, മെസ്സിയുടെ കിരീട സംരക്ഷണമോ അതോ സ്പെയിന്റെ യുവരക്തത്തിന്റെ കിരീടധാരണമോ? രണ്ട്, സ്ലാവ്കോ വിൻസിച്ച് എന്ന റഫറിയുടെ തീരുമാനങ്ങൾ കളിയെ എങ്ങനെ സ്വാധീനിക്കും? അർജന്റീനയുടെ മത്സരങ്ങളിൽ സമീപകാലത്തുണ്ടായ റഫറിയിങ് തീരുമാനങ്ങൾ വലിയ രീതിയിൽ നിരീക്ഷിക്കപ്പെടുന്ന സാഹചര്യത്തിൽ, വിൻസിച്ചിന് മേലുള്ള സമ്മർദം ഇരട്ടിയാണ്. 2022ൽ തങ്ങൾക്ക് കരിയറിലെ ഏറ്റവും വലിയ ആഘാതം സമ്മാനിച്ച റഫറിക്ക് മുന്നിൽ, മെസ്സിയും കൂട്ടരും പ്രതികാരം വീട്ടുമോ അതോ ചരിത്രം ആവർത്തിക്കുമോ? കാത്തിരുന്ന് കാണാം.