ആ ക്രിക്കറ്റ് നിയമം മുംബൈ ഇന്ത്യൻസിന് പണി കൊടുത്തു, അമ്പയർ ശിക്ഷ നൽകിയത് ഇങ്ങനെ; സുപ്രധാന കളിയിൽ നടന്നത് ഇക്കാര്യം

Curated by: ഗോകുൽ എസ്|Samayam Malayalam•22 May 2025, 2:51 am

2025 സീസൺ ഇന്ത്യൻ പ്രീമിയർ ലീഗിൽ പ്ലേ ഓഫിലേക്ക് യോഗ്യത നേടുന്ന നാലാമത്തെ ടീമായിരിക്കുകയാണ് മുംബൈ ഇന്ത്യൻസ്. നിർണായക മത്സരത്തിൽ ഡെൽഹി ക്യാപിറ്റൽസിനെ 59 റൺസിന് തകർത്തതോടെയാണ് ഹാർദിക് പാണ്ഡ്യ നയിക്കുന്ന മുംബൈയുടെ പ്ലേ ഓഫ് പ്രവേശനം ഉറപ്പായത്. മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത 20 ഓവറുകളിൽ 180/5 എന്ന സ്കോർ നേടിയപ്പോൾ, ഡെൽഹിയുടെ മറുപടി 121 ൽ അവസാനിച്ചു.അതേ സമയം ഈ മത്സരത്തിനിടെ ഒരു അപൂർവ കാഴ്ചക്കും ക്രിക്കറ്റ് ലോകം സാക്ഷ്യം വഹിച്ചു.‌ മുംബൈ ഇന്ത്യൻസ് നായകൻ ഹാർദിക് പാണ്ഡ്യക്ക് സംഭവിച്ച പിഴവിൽ മുംബൈ ഇന്ത്യൻസിന് എതിരെ അമ്പയർ നോബോൾ വിളിക്കുകയായിരുന്നു. ഓഫ് സൈഡിൽ മൂന്ന് ഫീൽഡർമാരെ മാത്രം നിർത്തിയ മുംബൈ ഇന്ത്യൻസിന്റെ തീരുമാനമാണ് അവർക്ക് പണി കൊടുത്തത്.

മുംബൈ ഇന്ത്യൻസ് എറിഞ്ഞ അഞ്ചാം ഓവറിലെ മൂന്നാം പന്തിലായിരുന്നു സംഭവം. വിൽ ജാക്സ് ഈ പന്തെറിയുമ്പോൾ, ആകെ മൂന്ന് ഫീൽഡർമാർ മാത്രമായിരുന്നു ഓഫ് സൈഡിൽ ഉണ്ടായിരുന്നത്‌. ലെഗ് സൈഡിലാകട്ടെ ആറ് ഫീൽഡർമാരും അണിനിരന്നു. ഇത് ശ്രദ്ധയിൽപ്പെട്ട അമ്പയർ മുംബൈക്ക് എതിരെ നോ ബോൾ വിളിക്കുക യായിരുന്നു.


ക്രിക്കറ്റ് നിയമം അനുസരിച്ച് ഒരു ടീമിന് അഞ്ച് ഫീൽഡർമാരിൽ കൂടുതൽ ലെഗ് സൈഡിൽ നിർത്താൻ സാധിക്കില്ല. നിയമം അനുവദിക്കുന്നതിലും കൂടുതൽ ഫീൽഡർമാരെ ലെഗ് സൈഡിൽ അണിരത്തിയതോടെയാണ് ഇവിടെ മുംബൈ ഇന്ത്യൻസിന് പണി കിട്ടിയത്. അതേ സമയം ക്യാപ്റ്റൻ ഹാർദിക് പാണ്ഡ്യക്ക് പറ്റിയ ഈ അബദ്ധം ഡെൽഹി ക്യാപിറ്റൽസ് ശരിക്കും മുതലാക്കി. ഫ്രീഹീറ്റ് ലഭിച്ച പന്ത് ഡെൽഹി താരം വിപ്രജ് നിഗം തകർപ്പൻ സിക്സറിന് പറത്തുകയായിരുന്നു.

ലോക ക്രിക്കറ്റ് ചരിത്രത്തിൽ ഇത് ആദ്യം; വാങ്കഡെ സ്റ്റേഡിയത്തിൽ ബുംറ കുറിച്ചത് പുത്തൻ റെക്കോഡ്
അതേ സമയം പ്ലേ ഓഫ് യോഗ്യതക്ക് വിജയം അനിവാര്യമായിരുന്ന കളിയിൽ മുംബൈ ഇന്ത്യൻസ്, ഡെൽഹിയെ തകർത്തു. വാംഖഡെയിൽ നടന്ന മത്സരത്തിൽ ടോസ് നേടിയ ഡെൽഹി ക്യാപിറ്റൽസ് ആദ്യം ബൗൾ ചെയ്യാൻ തീരുമാനിക്കുകയായിരുന്നു. വെടിക്കെട്ട് ബാറ്റി‌ങ്ങുമായി സൂര്യകുമാർ യാദവ് തിളങ്ങിയ കളിയിൽ 180/5 എന്ന മികച്ച സ്കോറാണ് അവർ നേടിയത്. 43 പന്തുകളിൽ ഏഴ് ഫോറും നാല്‌ സീക്സറുമടക്കം 73 റൺസാണ് സ്കൈ നേടിയത്. 13 പന്തിൽ 21 റൺസ് നേടിയ വിൽ ജാക്സും, എട്ട് പന്തിൽ 24 റൺസ് നേടിയ നമൻ ധിറും മുംബൈ ബാറ്റിങ് നിരയിൽ തിളങ്ങി.

181 റൺസ് വിജയലക്ഷ്യം പിന്തുടർന്ന ഡെൽഹി ക്യാപിറ്റൽസ് 18.2 ഓവറിൽ 121 റൺസിന് ഓളൗട്ടാവുകയായിരുന്നു. 39 റൺസെടുത്ത‌ സമീർ റിസ്വിയാണ് അവരുടെ ടോപ് സ്കോറർ‌. മുംബൈ ഇന്ത്യൻസിന് വേണ്ടി മിച്ചൽ സാന്റ്നറും ജസ്പ്രിത് ബും റയും മൂന്ന് വിക്കറ്റുകൾ വീതം വീഴ്ത്തി.