ആ തീരുമാനം തെറ്റിയോ, തോൽവിക്ക് ശേഷം തുറന്ന് പറഞ്ഞ് ഹാർദിക് പാ‌ണ്ഡ്യ; മുംബൈ ഇന്ത്യൻസിന് തിരിച്ചടിയായത് ഇക്കാര്യം

Curated by: ഗോകുൽ എസ്|Samayam Malayalam•2 Jun 2025, 3:17 am

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) ഫൈനലിൽ പ്രവേശിച്ചിരിക്കുകയാണ് പഞ്ചാബ് കിങ്സ്. രണ്ടാം ക്വാളിഫയറിൽ മുംബൈ ഇന്ത്യൻസിനെ അഞ്ച് വിക്കറ്റിന് വീഴ്ത്തിയാണ് പഞ്ചാബിന്റെ ഫൈനൽ പ്രവേശം. മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത 20 ഓവറിൽ 203/6 റൺസ് നേടിയപ്പോൾ, പഞ്ചാബ് കിങ്സ് 19 ഓവറിൽ വിജയലക്ഷ്യം മറികടന്നു.പഞ്ചാബ് കിങ്സ് നായകൻ ശ്രേയസ് അയ്യരുടെ അഴിഞ്ഞാട്ടമായിരുന്നു ക്വാളിഫയറിൽ അവർക്ക് ചേസിങ് അനായാസമാക്കിയത്. പ്രധാന തുറുപ്പുചീട്ടായ ജസ്പ്രിത് ബുംറക്ക് ഫൈനലിൽ മികവിലേക്ക് ഉയരാൻ സാധിക്കാതെ പോയത് മുംബൈ ഇന്ത്യൻസിന് തിരിച്ചടിയാവുകയും ചെയ്തു. അതേ സമയം ബുംറയുടെ അവസാന ഓവർ വേണ്ട സമയത്ത് ഉപയോഗിക്കാൻ മുംബൈ ഇന്ത്യൻസ് നായകൻ ഹാർദിക് പാണ്ഡ്യക്ക് കഴിഞ്ഞില്ലെന്ന തരത്തിൽ മത്സരശേഷം സമൂഹ മാധ്യമങ്ങളിൽ സംസാരം ഉയർന്നിരുന്നു.


പതിനെട്ടാം ഓവറിലായിരുന്നു ബുംറ തന്റെ അവസാന ഓവർ എറിയാൻ എത്തിയത്. ഈ സമയം പഞ്ചാബിന് മൂന്ന് ഓവറിൽ 31 റൺസായിരുന്നു ജയിക്കാൻ വേണ്ടിയിരുന്നത്. കളി കുറച്ചുകൂടി മുന്നേ വരുതിയിലേക്ക് കൊണ്ടു വരാൻ പതിനേഴാം ഓവറിൽ ബുംറയെ മുംബൈ ഇന്ത്യൻസ് ഉപയോഗിക്കേണ്ടതായിരുന്നുവെന്ന തരത്തിൽ ആരാധകർ പറയുന്നുണ്ട്.

തോൽവിക്ക് ശേഷം സംസാരിക്കവെ, ബുംറ പതിനേഴാമത് ഓവർ എറിയണമായിരുന്നോ എന്ന കാര്യത്തിൽ മുംബൈ ഇന്ത്യൻസ് നായകൻ ഹാർദിക് പാണ്ഡ്യ മനസ് തുറന്നു. തിരിഞ്ഞുനോക്കുമ്പോൾ അത് വ്യത്യസ്തമാകുമായിരുന്നുവെന്നും എന്നാൽ അതേ സമയം തന്നെ നേരത്തെയാകുമായിരുന്നുവെന്നുമാണ് ഹാർദിക് പറഞ്ഞത്. 18 പന്തുകൾ ബാക്കിയുണ്ടെങ്കിലും ബുംറക്ക് കളി മാറ്റാനും എന്തെങ്കിലും സ്പെഷ്യൽ കാര്യം ചെയ്യാനും സാധിക്കുമെന്ന് സൂചിപ്പിച്ച ഹാർദിക്, എന്നാൽ ഇന്ന് അത് സംഭവിച്ചില്ലെന്നും ചൂണ്ടിക്കാട്ടി.

Also Read: മുംബൈ ഇന്ത്യസിനെ വീഴ്ത്തി പഞ്ചാബ് കിങ്‌സ് ഐപിഎല്‍ 2025 ഫൈനലില്‍.

ജസ്പ്രിത് ബുംറയെക്കൊണ്ട് പതിനേഴാമത് ഓവർ എറിയിപ്പിക്കുന്നത് കുറച്ച് നേരത്തെയാകുമെന്ന് കരുതിയ ഹാർദിക് പാ‌‌ണ്ഡ്യ ട്രെന്റ് ബോൾട്ടിനാണ് പതിനേഴാം ഓവർ നൽകിയത്. പിന്നാലെ ബുംറ പതിനെട്ടാം ഓവർ എറിയാനുമെത്തി. ഈ ഓവറിൽ എട്ട് റൺസാണ് ബുംറ വഴങ്ങിയത്. വിക്കറ്റുകളൊന്നും നേടാൻ സാധിച്ചുമില്ല.

Also Read: രോഹിത് ശര്‍മയെ വീഴ്ത്തിയത് ശ്രേയസ് അയ്യരുടെ തന്ത്രം; പ്രശംസിച്ച് സുനില്‍ ഗവാസ്‌കര്‍

അതേ സമയം ജസ്പ്രിത് ബുംറക്ക് തിളങ്ങാൻ സാധിക്കാതിരുന്നത് തന്നെയായിരുന്നു രണ്ടാം ക്വാളിഫയറിൽ മുംബൈ ഇന്ത്യൻസിന് തിരിച്ചടിയായതും. ബുംറയുടെ ആദ്യ ഓവറിൽ 20 റ‌ൺസ് അടിച്ചുകൂട്ടി ജോഷ് ഇംഗ്ലീസ് തുടക്കം തന്നെ പഞ്ചാബ് കിങ്സിന് മുൻ തൂക്കം നേടിക്കൊടുത്തിരുന്നു.‌ പിന്നീട് എറിഞ്ഞ മൂന്ന് ഓവറുകളിൽ 20 റൺസ് മാത്രമാണ് വഴങ്ങിയതെങ്കിലും വിക്കറ്റുകളൊന്നും നേടാൻ താരത്തിനായില്ല.

4-0-40-0 എന്ന ബൗളിങ് ഫിഗറായിരുന്നു ഈ കളിയിൽ ബുംറയുടേത്. പ്രധാന ബൗളറായ ബുംറക്ക് വിക്കറ്റുകളൊന്നും നേടാൻ സാധിക്കാതെ പോയത് രണ്ടാം ക്വാളിഫയറിൽ മുംബൈ ഇന്ത്യൻസിന്റെ പരാജയത്തിന് പ്രധാന കാരണം തന്നെയാണെന്ന് പറയുന്നതിൽ തെറ്റില്ല.