ആദ്യ ജയം നേടിയിട്ടും അക്കാര്യത്തിൽ മുംബൈ ഇന്ത്യൻസ് ഹാപ്പിയല്ല; അടുത്ത കളിയിൽ മാറ്റം വന്നില്ലെങ്കിൽ തിരിച്ചടി ഉറപ്പ്

Curated byഗോകുൽ എസ് | Samayam Malayalam | Updated: 1 Apr 2025, 12:08 am

Samayam Malayalamമുംബൈ ഇന്ത്യൻസ്

2025 സീസൺ ഇന്ത്യൻ പ്രീമിയർ ലീഗിലെ ആദ്യ ജയം നേടിയിരിക്കുകയാണ് മുംബൈ ഇന്ത്യൻസ്. തിങ്കളാഴ്ച നടന്ന മത്സരത്തിൽ കൊൽക്കത്ത നൈറ്റ് റൈഡേഴ്സിനെ എട്ട് വിക്കറ്റിനാണ് മുംബൈ തകർത്തത്. മത്സരത്തിൽ ആദ്യം ബാറ്റ് ചെയ്ത കെകെആർ 116 റൺസിന് ഓളൗട്ടായപ്പോൾ, മുംബൈ ഇന്ത്യൻസ് 12.5 ഓവറുകളിൽ വിജയലക്ഷ്യം മറികടന്നു. ആദ്യ ജയത്തോടെ രണ്ട് പോയിന്റായ അവർ പോയിന്റ് പട്ടികയിൽ ആറാം സ്ഥാനത്തേക്ക് കയറുകയും ചെയ്തു.അതേ സമയം സീസണിലെ ആദ്യ ജയം നേടിയതിന്റെ ആവേശത്തിനിടെയും മുംബൈ ഇന്ത്യൻസിനെ ആശങ്കപ്പെടുത്തുന്നത് സൂപ്പർ താരം രോഹിത് ശർമയുടെ മോശം ഫോമാണ്‌. ആദ്യ രണ്ട് കളികളിലും നിരാശപ്പെടുത്തിയിരുന്ന രോഹിത്, കെകെആറിന് എതിരെയും ഫ്ലോപ്പായി. 12 പന്തുകളിൽ നിന്ന് 13 റൺസ് മാത്രമെടുത്താണ് താരം പുറത്തായത്. തുടർച്ചയായ മൂന്നാമത്തെ കളിയിലും രോഹിതിന് തിള‌ങ്ങാൻ സാധിക്കാതെ വന്നത് മുംബൈ ഇന്ത്യൻസിന് നൽകുന്ന തലവേദന ചെറുതല്ല. വരാനിരിക്കുന്ന കളികളിൽ രോഹിത് ഫോമിലേക്ക് തിരിച്ചുവന്നില്ലെങ്കിൽ മുംബൈയുടെ കരുത്തിനെയും അത് പ്രതികൂലമായി ബാധിക്കും.

ചെന്നൈ സൂപ്പർ കിങ്സിന് എതിരെയായിരുന്നു 2025 സീസൺ ഇന്ത്യൻ പ്രീമിയർ ലീഗിൽ മുംബൈ ഇന്ത്യൻസിന്റെ ആദ്യ മത്സരം. അക്കൗണ്ട് തുറക്കാതെയാണ് ഈ കളിയിൽ രോഹിത് ശർമ പുറത്തായത്. ഗുജറാത്ത് ടൈറ്റൻസിന് എതിരെയായിരുന്നു മുംബൈയുടെ രണ്ടാമത്തെ മത്സരം. ഈ കളിയിൽ രോഹിത് വീണത് എട്ട് റൺസിനാണ്. കൊൽക്കത്ത നൈറ്റ് റൈഡേഴ്സിനെതിരെ ഇപ്പോൾ 13 റൺസെടുത്താണ് താരം പുറത്തായത്.

Also Read: അടുത്ത കളിക്ക് മുൻപ് സുപ്രധാന നീക്കവുമായി സഞ്ജു സാംസൺ; രാജസ്ഥാൻ റോയൽസ് ഡബിൾ സ്ട്രോങ്ങാവാൻ പോകുന്നു

2025 സീസൺ ഐപിഎല്ലിലെ ആദ്യ മൂന്ന് കളികളിൽ നിന്ന് ആകെ 21 റൺസ് മാത്രമാണ് രോഹിത് ശർമക്ക് നേടാനായത് എന്നത് പരിതാപകരമാ‌ണ്. നിലവിൽ ടീം വിജയവഴിയിലേക്ക് വന്നെങ്കിലും രോഹിത് ശർമ കൂടി ഫോമിലേക്ക് ഉയരാതെ ടീമിന് ആശ്വസിക്കാൻ സാധിക്കില്ല. വരും മത്സരങ്ങളിൽ രോഹിത് ഫോമിലേക്ക് മട‌ങ്ങിയെത്തുമെന്ന പ്രതീക്ഷയിലാണ് ആരാധകർ.

മുംബൈ ഇന്ത്യൻസ് - കൊൽക്കത്ത നൈറ്റ് റൈഡേഴ്സ് മത്സരം ഇങ്ങനെ: മുംബൈ ഇന്ത്യൻസിന്റെ ഹോം ഗ്രൗണ്ടിൽ നടന്ന മത്സരത്തിൽ ആദ്യം ബാറ്റ് ചെയ്ത കൊൽക്കത്ത നൈറ്റ് റൈഡേഴ്സ് തുടക്കം തന്നെ ബാറ്റിങ് തകർച്ച നേരിട്ടു. 45 റൺസെടുക്കുന്നതിനിടെ അഞ്ച് വിക്കറ്റുകൾ നഷ്ടമായ അവർ 16.2 ഓവറുകളിൽ ഓളൗട്ടാവുകയായിരുന്നു. 26 റൺസെടുത്ത അംഗ്ക്രിഷ് രഘുവംശിയാണ് അവരുടെ ടോപ് സ്കോറർ. മുംബൈ ഇന്ത്യൻസിന് വേണ്ടി അശ്വനി കുമാർ നാല് വിക്കറ്റുകളും ദീപക് ചകർ രണ്ട് വിക്കറ്റുകളും വീഴ്ത്തി.

Also Read: ആദ്യ ജയത്തിന് പിന്നാലെ രാജസ്ഥാൻ റോയൽസിന് തിരിച്ചടി, ക്യാപ്റ്റ‌ൻ റിയാൻ പരാഗിന് പണി കിട്ടി; വമ്പൻ തുക പിഴ ഒടുക്കണം

117 റൺസ് വിജയലക്ഷ്യം പിന്തുടർന്ന മുംബൈ ഇന്ത്യൻസ് വെറും 12.5 ഓവറുകളിൽ വിജയത്തിലേക്ക് എത്തുകയായിരുന്നു. 13 റൺസെടുത്ത രോഹിത് ശർമയുടെയും, 16 റൺസ് നേടിയ വിൽ ജാക്സിന്റെയും വിക്കറ്റുകൾ അവർക്ക് വേഗത്തിൽ നഷ്ടമായെങ്കിലും റിയാൻ റിക്കിൾട്ടണും സൂര്യകുമാർ യാദവും ചേർന്ന് ടീമിനെ അനായാസ ജയത്തിലേക്ക് നയിച്ചു. റിക്കിൾട്ടൺ 41 പന്തിൽ 62 റ‌ൺസ് നേടിയും, സൂര്യകുമാർ യാദവ് ഒൻപത് പന്തിൽ 27 റൺസ് നേടിയും പുറത്താകാതെ നിന്നു. ഏപ്രിൽ നാലാം തീയതിയാണ് മുംബൈയുടെ അടുത്ത മത്സരം. ലക്നൗ സൂപ്പർ ജയന്റ്സാണ് എതിരാളികൾ.