ഇങ്ങനെ ഇതുവരെ നിക്കോളാസ് പൂരനെ കണ്ടിട്ടില്ല; ആരാധകരും ഞെട്ടി; വൈറലായി ഡ്രസിങ് റൂമിലെ ദൃശ്യങ്ങൾ

Authored by: അനുഷ ഗംഗാധരൻ|Samayam Malayalam•20 May 2025, 9:27 am

ഇന്ത്യൻ പ്രീമിയർ ലീഗ് 2025 സീസണിൽ നിന്ന് ഒടുവിൽ ലക്‌നൗ സൂപ്പർ ജെയ്ന്റ്‌സും പുറത്തായിരിക്കുകയാണ്. കഴിഞ്ഞ ദിവസം സൺറൈസേഴ്‌സ് ഹൈദരാബാദുമായി നടന്ന മത്സരത്തിൽ പരാജയപ്പെട്ടതോടെയാണ് ലക്‌നൗ പ്ലേ ഓഫ് കാണാതെ പുറത്തായത്. ആദ്യം ബാറ്റ് ചെയ്ത ലക്‌നൗ മുന്നോട്ടുവെച്ച 205 റൺസ് എന്ന ലക്ഷ്യം സൺറൈസേഴ്‌സ് ഹൈദരാബാദ് 10 പന്തുകൾ ബാക്കി നിൽക്കെ മറികടന്നു.
വിവാദത്തിന് തിരികൊളുത്തി വീണ്ടും 'നോട്ട്ബുക്ക് സെലിബ്രേഷന്‍'; ദിഗ്വേശിനെതിരെ നടപടി വന്നേക്കും, ചുട്ട മറുപടിയുമായി അഭിഷേക് ശര്‍മ
20 പന്തിൽ 59 റൺസ് നേടിയ അഭിഷേക് ശർമയും 28 പന്തിൽ 47 റൺസ് നേടിയ ഹെൻറിച്ച് ക്ലാസനും ആണ് ഹൈദരാബാദിനെ അതിവേഗം ലക്ഷ്യത്തിലേക്ക് എത്താൻ സഹായിച്ചത്. ഇവർക്കൊപ്പം ഇഷാൻ കിഷനും കമിന്ദു മെൻഡിസും കൂടിയതോടെ ലക്‌നൗ മുന്നോട്ടു വെച്ച ലക്ഷ്യം നിസാരമായി ഹൈദരാബാദ് മറികടന്നു.

എന്നാൽ കഴിഞ്ഞ ദിവസം മത്സരം നടക്കുന്ന സമയത്ത് നാടകീയ രംഗങ്ങൾക്കും കാണികൾ സാക്ഷ്യം വഹിച്ചിരുന്നു. ലക്‌നൗ താരത്തിന്റെ നോട്ട് ബുക്ക് സെലിബ്രേഷൻ എല്ലാം വിവാദങ്ങൾക്ക് തിരികൊളുത്തുകയും ചെയ്‌തു. ഇപ്പോഴിതാ ലക്‌നൗവിന്റെ വിക്കറ്റ് നഷ്ട്ടമായപ്പോഴുള്ള നിക്കോളാസ് പൂരന്റെ പ്രതികരണവും വൈറലാവുകയാണ്. അമ്പത് റൺസ് തികയുന്നതിന് തൊട്ടുമുമ്പ് റണ്ണൗട്ടായതിനെ തുടർന്നാണ് നിക്കോളാസ് പൊട്ടിത്തെറിച്ചത്. 26 പന്തിൽ നിന്ന് 45 റൺസ് നേടിയ ശേഷം മറ്റൊരു റൺ നേടാൻ ശ്രമിക്കവെയാണ് പൂരൻ റൺ ഔട്ട് ആകുന്നത്. ഇത് താരത്തെ നന്നേ നിരാശപ്പെത്തിയിരുന്നു. താരത്തിന്റെ പുറത്താകലിന് ശേഷം അബ്ദുൾ സമദിന്റെയും വിക്കറ്റ് നഷ്ടമായതോടെ ഡ്രസിങ് റൂമിൽ ക്ഷുഭിതനായ പൂരനെ ആണ് കാണാൻ സാധിച്ചത്.

അവസാന പന്തിൽ അബ്ദുൾ സമദ് വിക്കറ്റ് നഷ്ടപ്പെട്ടപ്പോൾ പൂരൻ ദേഷ്യത്തോടെ തന്റെ ഗ്ലൗസ് എറിഞ്ഞു. ഈ വീഡിയോ സോഷ്യൽ മീഡിയയിൽ അതിവേഗം പ്രചരിക്കുകയാണ്‌. 2025 ലെ ഐപിഎല്ലിൽ ലക്‌നൗവിന് വേണ്ടി പൂരൻ മികച്ച പ്രകടനം ആണ് കാഴ്ചവെച്ചത്. 12 മത്സരങ്ങളിൽ നിന്ന് 455 റൺസ് നേടി. ഈ സീസണിൽ ഇതുവരെ ഒരു ലക്‌നൗ ബാറ്റ്സ്മാൻ നേടുന്ന ഏറ്റവും കൂടുതൽ റൺസ് ആണ് ഇത്.

അതേസമയം, ഋഷഭ് പന്ത് ആറ് പന്തിൽ ഏഴ് റൺസിന് പുറത്തായതും ലക്‌നൗ ടീമിനെയും ആരാധകരെയും നിരാശപെടുത്തുന്നതായിരുന്നു. ലക്‌നൗ 27 കോടി രൂപയ്ക്ക് ടീമിലെത്തിച്ച പന്തിൽ നിന്ന് ഇതായിരുന്നില്ല ടീമും ആരാധകരും പ്രതീക്ഷിച്ചിരുന്നു. ഐപിഎല്ലിലെ ചരിത്രത്തിലെ തന്നെ ഏറ്റവും വലിയ തുകയ്ക്ക് സ്വന്തമാക്കിയ താരം മറ്റേത് ഐപിഎൽ സീസണെക്കാളും മോശം പ്രകടനം കാഴ്ചവെച്ചതും ഈ സീസണിൽ ആണ്.

12 മത്സരങ്ങളിൽ നിന്ന് 100 സ്ട്രൈക്ക് റേറ്റിൽ 135 റൺസ് നേടിയ പന്ത്, ഒരു ഫിഫ്റ്റി മാത്രം ആണ് ഈ സീസണിൽ സ്വന്തമാക്കിയത്. അതേസമയം തുടർച്ചയായി രണ്ടാം വർഷമാണ് പ്ലേ ഓഫിലേക്ക് എത്താതെ ലക്‌നൗ ഐപിഎല്ലിൽ നിന്ന് പുറത്താകുന്നത്. ഇനി ഈ സീസണിൽ രണ്ട് മത്സരങ്ങൾ ആണ് ലക്‌നൗവിന് ബാക്കിയുള്ളത്.