ഇന്നു രാത്രി ധോണിയുടെ വിരമിക്കൽ? അഞ്ചു വർഷം മുൻപേ ‘തല’ അക്കാര്യം പറഞ്ഞു; ആകാംക്ഷയോടെ ആരാധകർ

ചെന്നൈ∙ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിങ്സ് നിർണായക പോരാട്ടത്തിനിറങ്ങുമ്പോൾ രക്ഷകനായി മഹേന്ദ്ര സിങ് ധോണി അവതരിക്കുമോ? ഇന്ന് ചെപ്പോക്ക് സ്റ്റേഡിയത്തിൽ സൺറൈസേഴ്സ് ഹൈദരാബാദ് കളിക്കാനിറങ്ങുമ്പോൾ ആരാധകർ കാത്തിരിക്കുന്നത് ഇക്കാര്യം അറിയാനാണ്. ഗ്രൂപ്പ് ഘട്ടത്തിൽ ചെന്നൈയുടെ അവസാന ഹോം മത്സരമാണ് ഇന്നത്തേത്. 44 വയസ്സുകാരനായ ധോണി പരുക്കുകാരണം സീസണിലെ ഒരു മത്സരവും കളിച്ചിരുന്നില്ല. പരുക്കു മാറി പരിശീലനം തുടങ്ങിയെങ്കിലും കഴിഞ്ഞ മത്സരങ്ങളിലും ധോണി ഇംപാക്ട് പ്ലേയറായി പോലും ഇറങ്ങിയില്ല. അടുത്ത സീസണിൽ താരം കളിക്കാൻ സാധ്യത കുറവായതിനാൽ, ഐപിഎലിൽ ചെന്നൈയിൽ ആരാധകരോട് യാത്ര പറയാനുള്ള അവസാന അവസരമാകും ഇന്നത്തേത്. അതുകൊണ്ടു തന്നെ ച‍െപ്പോക്കിൽ ഇംപാക്ട് പ്ലേയറായെങ്കിലും ‘തല’ ഇറങ്ങുമെന്ന പ്രതീക്ഷയിലാണ് ആരാധകർ.

കരിയറിലെ അവസാന ട്വന്റി20 മത്സരം ചെന്നൈയിലാണ് കളിക്കുകയെന്ന് ധോണി വർ‍ഷങ്ങൾക്കു മുൻപു തന്നെ പറഞ്ഞിട്ടുള്ളതാണ്. ‘‘കരിയറിലെ അവസാന ഏകദിനം ഞാൻ കളിച്ചത് ജന്മനാടായ റാഞ്ചിയിലാണ്. ട്വന്റി20യിലെ അവസാന മത്സരം ചെന്നൈയില്‍ ആകുമെന്നു പ്രതീക്ഷിക്കുന്നു. അതു ചിലപ്പോൾ അടുത്ത വർഷമാകാം, അല്ലെങ്കിൽ അഞ്ചു വർഷങ്ങൾക്ക് അപ്പുറമാകാം.’’– അഞ്ചു വർഷങ്ങൾക്കു മുൻപ് 2021 ൽ ചെന്നൈയിലെ ടീമിന്റെ വിജയാഘോഷങ്ങൾക്കിടെയായിരുന്നു ധോണി ഇങ്ങനെ പറഞ്ഞത്. ചെന്നൈ സൂപ്പർ കിങ്സിലും ഇന്ത്യൻ ടീമിലും വർഷങ്ങളോളം ധോണിക്കു കീഴിൽ കളിച്ചിട്ടുള്ള സ്പിന്നർ ആർ. അശ്വിനും ഇന്നു ധോണി കളിക്കുമെന്ന പ്രതീക്ഷയിലാണ്.

‘‘സൺറൈസേഴ്സിനെതിരെ ധോണി കളിക്കുമെന്നാണ് എനിക്കു തോന്നുന്നത്. എന്താണു സംഭവിക്കുന്നതെന്നു നമുക്കു നോക്കാം. ധോണി കളിക്കാനുള്ള ഫിറ്റ്നസ് വീണ്ടെടുത്തെന്നാണു ഞാൻ മനസ്സിലാക്കിയത്. അതുകൊണ്ടുതന്നെ ചെന്നൈയുടെ അവസാന മത്സരങ്ങളിൽ അദ്ദേഹം കളിക്കാൻ സാധ്യതയുണ്ട്.’’– അശ്വിൻ വ്യക്തമാക്കി. ചെന്നൈയുടെ നിലവിലെ ടീം കോംബിനേഷനിൽ മാറ്റം വരുത്താൻ താൽപര്യം ഇല്ലാത്തതിനാൽ ധോണി തന്നെ സ്വയം വിട്ടുനിൽക്കുകയാണെന്നു നേരത്തേ റിപ്പോർട്ടുകളുണ്ടായിരുന്നു. എന്നാൽ ചെന്നൈയിൽ ടീമിന്റെ അവസാന ഹോം മത്സരം നടക്കുന്ന സാഹചര്യത്തിൽ ധോണി കളിക്കാനുള്ള സാധ്യത ഏറെയാണ്.

പ്ലേ ഓഫ് ഉറപ്പിക്കാൻ ചെന്നൈ സൂപ്പർ കിങ്സിന് ഇനി രണ്ടു മത്സരങ്ങളാണു ബാക്കിയുള്ളത്. കഴിഞ്ഞ കളിയിൽ ലക്നൗവിനോടു തോറ്റതോടെ അടുത്ത രണ്ടു കളികളിലും ചെന്നൈയ്ക്ക് വിജയം അനിവാര്യമാണ്. 12 മത്സരങ്ങൾ പൂർത്തിയായപ്പോൾ, ആറു വീതം വിജയങ്ങളും തോൽവിയുമായി 12 പോയിന്റാണ് ചെന്നൈയ്ക്കുള്ളത്.