എന്തൊരു പതനം...! രാജസ്ഥാന്‍ റോയല്‍സ് നാണംകെട്ടു; റെക്കോഡ് തോല്‍വിയുമായി ഐപിഎല്ലില്‍ നിന്ന് പുറത്ത്

Authored byനിഷാദ് അമീന്‍ | Samayam Malayalam | Updated: 2 May 2025, 12:08 am

ഐപിഎല്‍ 2025ല്‍ (IPL 2025) വമ്പന്‍ തോല്‍വിയുമായി രാജസ്ഥാന്‍ റോയല്‍സ് (Rajasthan Royals) പ്ലേ ഓഫ് കാണാതെ പുറത്ത്. മുംബൈ ഇന്ത്യന്‍സ് (Mumbai Indians) 100 റണ്‍സിന് റോയല്‍സിനെ തകര്‍ത്തു. ഐപിഎല്‍ ചരിത്രത്തിലെ അവരുടെ ഏറ്റവും വലിയ രണ്ടാമത്തെ തോല്‍വി (റണ്‍ അടിസ്ഥാനത്തില്‍) ആണിത്. മുംബൈ 20 ഓവറില്‍ രണ്ട് വിക്കറ്റിന് 217 റണ്‍സെടുത്തു. ആര്‍ആര്‍ 16.1 ഓവറില്‍ 117 റണ്‍സിന് ഓള്‍ഔട്ടായി. 11 മല്‍സരങ്ങളില്‍ എട്ടാം തോല്‍വിയാണിത്. ചെന്നൈ സൂപ്പര്‍ കിങ്‌സിന് പിന്നാലെ പുറത്താവുന്ന രണ്ടാമത്തെ ടീമാണ്. എംഐയുടെ സീസണിലെ തുടര്‍ച്ചയായ ആറാം വിജയമാണിത്. 2008, 2017 വര്‍ഷങ്ങളിലും എംഐ തുടര്‍ച്ചയായ ആറ് വിജയങ്ങള്‍ നേടിയിരുന്നു.


വിജയത്തോടെ 11 മാച്ചുകളില്‍ 14 പോയിന്റുമായി എംഐ ഒന്നാം സ്ഥാനത്തെത്തി. 120 പന്തില്‍ 218 എന്ന ഉയര്‍ന്ന വിജയലക്ഷ്യം പിന്തുടര്‍ന്ന റോയല്‍സിനായി എട്ടാമന്‍ ജോഫ്ര ആര്‍ച്ചര്‍ 30 (27) മാത്രമാണ് തിളങ്ങിയത്.

കഴിഞ്ഞ മാച്ചിലെ റെക്കോഡ് സെഞ്ചുറി വീരന്‍ വൈഭവ് സൂര്യവംശിയെ ആദ്യ ഓവറില്‍ തന്നെ ദീപക് ചാഹര്‍ പുറത്താക്കി. നേരിട്ട രണ്ടാം പന്തില്‍ അക്കൗണ്ട് തുറക്കുന്നതിന് മുമ്പ് വൈഭവ് വില്‍ ജാക്‌സിന്റെ കൈകളിലെത്തി. മൂന്നാം ഓവറില്‍ യശസ്വി ജയ്‌സ്വാളും (13) പുറത്തായി.

കോടതി കയറി ഐപിഎല്‍ നായ: 'ചമ്പക്' എന്ന് പേരിട്ടതിന് ബിസിസിഐക്കെതിരേ കേസ്; കോഹ്‌ലിയുടെ 'ചിക്കു'വും കോടതിയില്‍
നിതീഷ് റാണ (9), റിയാന്‍ പരാഗ് (16), ഷിംറോണ്‍ ഹെറ്റ്‌മെയര്‍ (0), ശുഭം ദുബെ (15), ധ്രുവ് ജുറെല്‍ (11) എന്നിങ്ങനെ ബാറ്റ്‌സ്മാന്‍മാരുടെ ഘോഷയാത്ര ആയിരുന്നു പിന്നീട്. ഇതോടെ ഏഴിന് 76 എന്ന നിലയിലേക്ക് കൂപ്പുകുത്തി. ജോഫ്ര ആര്‍ച്ചര്‍ പിടിച്ചുനിന്നതോടെയാണ് സ്‌കോര്‍ 100 കടന്നത്. 117ലെത്തിയപ്പോള്‍ ആര്‍ച്ചറുടെ ചെറുത്തുനില്‍പും അവസാനിച്ചു.

ടോസ് നഷ്ടപ്പെട്ട് ബാറ്റ് ചെയ്ത എംഐക്ക് ഗംഭീര തുടക്കമാണ് ലഭിച്ചത്. ഓപണര്‍മാരായ റയന്‍ റിക്കല്‍റ്റണും രോഹിത് ശര്‍മയും ചേര്‍ന്ന് സെഞ്ചുറി കൂട്ടുകെട്ടുണ്ടാക്കി. ഇരുവരും അര്‍ധസെഞ്ചുറി കുറിച്ച ശേഷമാണ് കളമൊഴിഞ്ഞ് കൊടുത്തത്.

സഞ്ജു നയിച്ച കേരളത്തിന്റെ ലോക റെക്കോഡിനൊപ്പമെത്തി രാജസ്ഥാന്‍ റോയല്‍സ്; 15.5 ഓവറില്‍ ചേസിങ് പൂര്‍ത്തിയാക്കി
12ാം ഓവറില്‍ ആദ്യ വിക്കറ്റ് വീഴുമ്പോള്‍ സ്‌കോര്‍ 116ലെത്തിയിരുന്നു. റിക്കല്‍റ്റണ്‍ 38 പന്തില്‍ മൂന്ന് സിക്‌സറുകളും ഏഴ് ബൗണ്ടറികളും സഹിതം 61 റണ്‍സെടുത്തു. രോഹിത് 36 പന്തില്‍ ഒമ്പത് ബൗണ്ടറികളോടെ 53 റണ്‍സെടുത്ത് വഴിമാറി. എംഐക്ക് വേണ്ടി 6,000 റണ്‍സ് തികയ്ക്കുന്ന ആദ്യ താരമെന്ന റെക്കോഡും രോഹിത് സ്വന്തമാക്കി.

വണ്‍ഡൗണായെത്തിയ സൂര്യകുമാര്‍ യാദവ് സ്ഥിരതയാര്‍ന്ന പ്രകടനം ആവര്‍ത്തിച്ചു. 23 പന്തില്‍ 48 റണ്‍സുമായി പുറത്താവാതെ നിന്നു. തുടര്‍ച്ചയായി 11 തവണ 25+ സ്‌കോറുകള്‍ നേടുന്ന ചരിത്രത്തിലെ ആദ്യ കളിക്കാരനെന്ന റെക്കോഡിനും സ്‌കൈ അര്‍ഹനായി. റോബിന്‍ ഉത്തപ്പ (10 തവണ) യുടെ 11 വര്‍ഷം പഴക്കമുള്ള റെക്കോഡ് പഴങ്കഥയായി. ഇന്ത്യന്‍ ടി20 ഐ ക്യാപ്റ്റനായ സ്‌കൈ ഈ വര്‍ഷം കളിച്ച 11 മത്സരങ്ങളിലും 25 റണ്‍സിലധികം നേടി.

മികച്ച ഫോം തുടരുന്ന ഹാര്‍ദിക് പാണ്ഡ്യയാണ് സൂര്യകുമാറിന് കൂട്ടായി ക്രീസിലുണ്ടായിരുന്നത്. 23 പന്തില്‍ പുറത്താവാതെ ഹാര്‍ദിക് 48 റണ്‍സെടുത്തതോടെ സ്‌കോര്‍ 200 കടന്നു. രണ്ട് വിക്കറ്റ് മാത്രം നഷ്ടപ്പെടുത്തി 217 എന്ന മികച്ച സ്‌കോറിലെത്തുകയും ചെയ്തു.