ഐപിഎൽ 2025 നിർത്തിവെക്കുമോ; നിർണായക വെളിപ്പെടുത്തൽ നടത്തി ഐപിഎൽ ചെയർമാൻ

Edited byഅനുഷ ഗംഗാധരൻ | Samayam Malayalam | Updated: 9 May 2025, 9:42 am

ഇന്ത്യ പാകിസ്ഥാൻ അതിർത്തിയിലെ സംഘർഷാവസ്ഥ നിലനിക്കുന്ന സാഹചര്യത്തിൽ ഇന്ത്യൻ പ്രീമിയർ ലീഗ് 2025 സീസൺ നിർത്തലാക്കുമോ എന്ന സംശയങ്ങൾ ഉയർന്നിരുന്നു. എന്നാൽ അത്തരം സംശയങ്ങൾക്ക് നിലവിൽ വ്യക്തത വരുത്തുകയാണ് ഐപിഎൽ ചെയർമാൻ അരുൺ ധുമാൽ. ഇന്ന് നടക്കാനിരിക്കുന്ന റോയൽ ചലഞ്ചേഴ്‌സ് ബെംഗളൂരു - ലക്‌നൗ സൂപ്പർ ജെയ്ന്റ്സ് മത്സരം നേരത്തെ തീരുമാനിച്ചത് പോലെ തന്നെ നടക്കും എന്നും അദ്ദേഹം വ്യക്തമാക്കി.
സഞ്ജു സാംസൺ അടക്കം പണി കിട്ടിയത് മൂന്ന് പേർക്ക്; രാജസ്ഥാൻ റോയൽസിന് ഇത് വമ്പൻ തിരിച്ചടി ലഭിച്ച സീസൺ
സുരക്ഷാ കാരണങ്ങളാൽ വ്യാഴാഴ്ച (മെയ് 8) പഞ്ചാബ് കിംഗ്‌സും ഡൽഹി ക്യാപിറ്റൽസും തമ്മിലുള്ള മത്സരം റദ്ദാക്കിയതിനെ തുടർന്ന് ഐപിഎൽ 2025 മാറ്റിവയ്ക്കാൻ സാധ്യതയുണ്ടെന്ന് അഭ്യൂഹങ്ങൾ ഉയർന്നിരുന്നു. പഞ്ചാബ് കിംഗ്‌സിന്റെ ഇന്നിംഗ്‌സിന്റെ 11-ാം ഓവറിലാണ് കളിക്കാർ മൈതാനം വിടാനും ആരാധകരോട് സ്റ്റേഡിയം വിടാനും ആവശ്യപ്പെട്ടത്. ഇതോടെ ഐപിഎൽ നിർത്തിവെക്കും എന്ന് സമൂഹമാധ്യങ്ങളിൽ ഉൾപ്പടെ പ്രചരിച്ചു. ഇതോടെയാണ് ഐപിഎൽ ചെയർമാൻ ഈ വിഷയത്തിൽ വ്യക്തത വരുത്തിയത്.

"അതെ, മുൻകരുതൽ നടപടിയുടെ ഭാഗമായാണ് മത്സരം റദ്ദാക്കിയത്, കാരണം ജമ്മുവിൽ ചില സംഭവങ്ങൾ നടന്നിട്ടുണ്ടെന്ന് ഞാൻ വിശ്വസിക്കുന്നു," എന്ന് ഐപിഎൽ ചെയർമാൻ അരുൺ ധുമാൽ പറഞ്ഞു.അതേസമയം പഞ്ചാബും ഡൽഹിയും തമ്മിലുള്ള മത്സരം റദ്ദാക്കിയ ഉടൻ തന്നെ ഐപിഎൽ ഗവേണിങ് കൗൺസിൽ അടിയന്തര യോഗം വിളിച്ചു എന്ന് ക്രിക്കറ്റ് അഡിക്റ്റർ റിപ്പോർട്ട് ചെയ്തു. ഐപിഎൽ ടീമുകൾ പരിഭ്രാന്തിയിലാണെന്നും ഇത് ഐപിഎൽ 2025 മാറ്റിവയ്ക്കുന്നതിലേക്ക് നയിച്ചേക്കാമെന്നും മാധ്യമ റിപ്പോർട്ടുകൾ പറയുന്നു.

എന്നാൽ, ടൂർണമെന്റ് മാറ്റിവയ്ക്കുന്നത് സംബന്ധിച്ച് ഒരു തീരുമാനവും എടുത്തിട്ടില്ലെന്ന് ഐപിഎൽ ചെയർമാൻ അരുൺ ധുമാൽ സ്ഥിരീകരിച്ചു. സർക്കാരിൽ നിന്ന് ഇതുവരെ ബിസിസിഐക്ക് ഒരു നിർദ്ദേശവും ലഭിച്ചിട്ടില്ലെന്ന് ധുമാൽ പറഞ്ഞു.

"ഞങ്ങൾ ഇപ്പോൾ സ്ഥിതിഗതികൾ അവലോകനം ചെയ്യുകയാണ്. ഇത് പരിണമിച്ചുവരുന്ന ഒരു സാഹചര്യമാണ്. സർക്കാരിൽ നിന്ന് ഞങ്ങൾക്ക് ഒരു നിർദ്ദേശവും ലഭിച്ചിട്ടില്ല. എല്ലാ ലോജിസ്റ്റിക്സും മനസ്സിൽ വെച്ചായിരിക്കും തീരുമാനം എടുക്കുക," ധുമൽ പിടിഐയോട് പറഞ്ഞു.

ലഖ്‌നൗവും ബെംഗളൂരുവും തമ്മിലുള്ള മത്സരം വെള്ളിയാഴ്ച (മെയ് 9) നടക്കുമെന്ന് ധുമൽ സ്ഥിരീകരിച്ചു. ലഖ്‌നൗവിലെ ഏകാന ക്രിക്കറ്റ് സ്റ്റേഡിയത്തിലാണ് മത്സരം നടക്കുക. എന്നിരുന്നാലും, വരും മണിക്കൂറുകളിൽ കാര്യങ്ങൾ മാറിയേക്കാമെന്നും ധുമൽ പറഞ്ഞു.