ഓസ്ട്രേലിയൻ ഓപ്പണിൽ യാനിക് സിന്നറും മാഡിസൻ കീസും രണ്ടാം റൗണ്ടിൽ

മെൽബൺ ∙ ഓസ്ട്രേലിയൻ ഓപ്പൺ ടെന്നിസിൽ ഹാട്രിക് കിരീടം ലക്ഷ്യമിട്ടിറങ്ങിയ നിലവിലെ ചാംപ്യൻ യാനിക് സിന്നറിനു പുരുഷ സിംഗിൾസിൽ വിജയത്തുടക്കം. മത്സരത്തിനിടെ പരുക്കേറ്റ എതിരാളിയായ ഫ്രഞ്ച് താരം ഹ്യൂഗോ ഗാസ്റ്റൻ പിന്മാറിയതോടെ, 6-2, 6-1നു മുന്നിലായിരുന്ന ഇറ്റാലിയൻ താരം സിന്നർ രണ്ടാം റൗണ്ടിൽ കടന്നു. 68 മിനിറ്റിനുള്ളിലായിരുന്നു 2–ാം സീഡ് സിന്നറിന്റെ വിജയം.

തുടക്കത്തിൽ അൽപമൊന്നു പതറിയെങ്കിലും വനിതാ സിംഗിൾസിൽ നിലവിലെ ചാംപ്യനായ യുഎസിന്റെ മാഡിസൻ കീസ്, യുക്രെയ്നിന്റെ ഒലക്സാൻട്ര ഒലീനീകൊവയെ 7-6, 6-1നു കീഴടക്കി. തുടക്കത്തിൽ വന്ന 2 പിഴവുകളും ഒലീനീകൊവയുടെ തുടർച്ചയായ സ്മാഷുകളും തിരിച്ചടിയാകുമെന്നു കരുതിയെങ്കിലും ബിഗ് ഹിറ്റിങ് ഷോട്ടുകളുമായി ഫോമിലായ കീസ്, വിജയം തന്റെ കോർട്ടിലെത്തിച്ചു.

2 തവണ മെൽബൺ പാർക്കിൽ വിജയകിരീടം ഉയർത്തിയ ജപ്പാന്റെ നവോമി ഒസാക, ക്രൊയേഷ്യയുടെ അന്റോണിയ റുസിച്ചിനെ 6-3, 3-6, 6-4നു തോൽപിച്ച് രണ്ടാം റൗണ്ടിൽ കടന്നു.