കിടിലൻ ജയത്തിന് പിന്നാലെ ഗ്ലെൻ മാക്സ്‌വെല്ലിന് പണി കിട്ടി, പിഴയും ഡീമെറിറ്റ് പോയിന്റും ചുമത്തി ബിസിസിഐ

Curated byഗോകുൽ എസ് | Samayam Malayalam | Updated: 9 Apr 2025, 12:04 pm

Samayam Malayalamഗ്ലെൻ മാക്സ്‌വെൽ

ഐപിഎല്ലിൽ ഇന്നലെ നടന്ന മത്സരത്തിൽ കിടിലൻ ജയമാണ് ചെന്നൈ സൂപ്പർ കിങ്സി‌ന് എതിരെ പഞ്ചാബ് കിങ്സ് നേടിയത്. മത്സരത്തിൽ ആദ്യം ബാറ്റ് ചെയ്ത പഞ്ചാബ് കിങ്സ് നിശ്ചിത 10 ഓവറുകളിൽ 219/6 എന്ന മികച്ച സ്കോർ നേടിയപ്പോൾ, ചെന്നൈ സൂപ്പർ കിങ്സിന്റെ മറുപടി 201/5 ൽ അവസാനിച്ചു. അതേ സമയം കിടിലൻ ജയം നേടിയതിന് പിന്നാലെ പഞ്ചാബ് കിങ്സ് താരം ഗ്ലെ‌ൻ മാക്സ്‌വെല്ലിന് പണി കിട്ടി. മത്സരത്തിനിടെ പെരുമാറ്റചട്ടം ലംഘിച്ച താരത്തിന് പിഴയും ഡീമെറിറ്റ് പോയിന്റുമാണ് ശിക്ഷ ലഭിച്ചിരിക്കുന്നത്.
മത്സര ഫീയുടെ 25 ശതമാനം തുക പിഴയും, ഒരു ഡീമെറിറ്റ് പോയിന്റുമാണ് മാക്സ്‌വെല്ലിന് ശിക്ഷ ലഭിച്ചിരിക്കുന്നത്. ഡീമെറിറ്റ് പോയിന്റ് നാലാകുന്ന ഒരു കളിക്കാരന് ഒരു കളിയിൽ നിന്ന്‌ വിലക്ക് ലഭിക്കും. മൈതാനത്തെയും ഡ്രസ്സിങ് റൂമിലെയും സാധനങ്ങളിൽ മനപൂർവം അടിക്കുക പരസ്യ ബോർഡ്, ബൗണ്ടറി ഫെൻസ് എന്നിവ കേടുവരുത്തുക തുടങ്ങിയ കാര്യങ്ങൾക്ക് ലഭിക്കുന്ന‌ ശിക്ഷയാണ് ഇപ്പോൾ മാക്സ്‌വെല്ലിനും ലഭിക്കുന്നത്. എന്നാൽ താരം ചെയ്ത തെറ്റ് എന്താണെന്ന കൃത്യമായ വിവരം വിവരം പുറത്തു വന്നിട്ടില്ല. തനിക്ക് എതിരെ മാച്ച് റഫറി ചുമത്തിയ കുറ്റം മാക്സ്‌വെൽ അംഗീകരിച്ചിട്ടുണ്ട്.

Also Read: അടുത്ത കളിക്ക് മുൻപ് രാജസ്ഥാൻ റോയൽസിനെ പേടിപ്പിക്കുന്നത് ഇക്കാര്യം; സഞ്ജുവിന്റെ ടീമിന് ആശങ്കയായി ഈ കണക്കുകൾ

അതേ സമയം 2025 സീസൺ ഇന്ത്യൻ പ്രീമിയർ ലീഗിൽ അത്ര മികച്ച ഫോമിലല്ല‌ ഗ്ലെൻ മാക്സ്‌വെൽ. ആദ്യ നാല് കളികളിൽ നിന്ന് ആകെ 31 റൺസ് മാത്രമാണ് മാക്സ്‌വെല്ലിന് നേടാനായത്. ഗുജറാത്ത് ടൈറ്റൻസിന് എതിരെ പൂജ്യത്തിന് പുറത്തായ മാക്സ്‌വെൽ, രാജസ്ഥാൻ റോയൽസിന് എതിരെ 30 റൺസാണ് നേടിയത്. ഇന്നലെ ചെന്നൈ സൂപ്പർ കിങ്സിന് എതിരെ ഒരു റൺസിന് മാക്സ്‌വെൽ വീണു.

Also Read: ചഹലിന്റെ കാര്യത്തിൽ നടന്നത് എന്താണെന്ന് വെളിപ്പെടുത്തി ശ്രേയസ് അയ്യർ; കളിക്ക് ശേഷം തന്ത്രം വ്യക്തമാക്കി പഞ്ചാബ് നായകൻ

ഗ്ലെൻ മാക്സ്‌വെൽ ഫോമൗട്ടാണെങ്കിലും താരത്തിന്റെ ടീമായ പഞ്ചാബ് കിങ്സ് ഇത്തവണ കിടിലൻ ഫോമിലാണ്. കളിച്ച നാല് മത്സരങ്ങളിൽ മൂന്നെണ്ണത്തിലും അവർ ജയിച്ചു. നിലവിൽ പോയിന്റ് പട്ടികയിൽ നാലാം സ്ഥാനത്താണ് ശ്രേയസ് അയ്യർ നയിക്കുന്ന സംഘം.