കിടിലൻ റാപ്പും അടിപൊളി ഡാൻസും; വാങ്കഡെയെ ഇളക്കിമറിച്ച് ബാദ്ഷായും നോറയും– വിഡിയോ/ചിത്രങ്ങൾ

മുംബൈ ∙ കണ്ണഞ്ചിപ്പിക്കുന്ന കലാവിരുന്നുമായി ട്വന്റി20 ലോകകപ്പിനെ വരവേറ്റ് മുംബൈ. പാട്ടും നൃത്തവും ചെണ്ടമേളവുമായി കലാകാരൻമാർ മൈതാനം നിറഞ്ഞപ്പോൾ ലേസർ ഷോയും ചെണ്ടമേളവും വെടിക്കെട്ടും അകമ്പടിയേകി. പഞ്ചാബി റാപ്പർ ബാദ്ഷാ ത്രസിപ്പിക്കുന്ന സംഗീതവുമായി ഗാലറികളെ ഇളക്കിമറിച്ചു. ബോളിവുഡ് താരം നോറ ഫത്തേഫിയുടെ നൃത്തവിരുന്നും ശിവമണിയുടെ ഡ്രംസ് മേളവും ഉദ്ഘാടനച്ചടങ്ങിനു കൊഴുപ്പേകി.

ശനിയാഴ്ച വൈകിട്ട് ആറിന് ശിവമണിയും സിതാർ വാദകൻ ഋഷഭ് ശർമയും ചേർന്നൊരുക്കിയ നിയോ-ക്ലാസിക്കൽ സംഗീതത്തോടെയാണ് ഉദ്ഘാടന ചടങ്ങുകൾ ആരംഭിച്ചത്. ഇന്ത്യൻ പാരമ്പര്യവും ആധുനികതയും ഒത്തുചേർന്ന വിസ്മയപ്രകടനം കാണികളെ ആവേശത്തിലാഴ്ത്തി. ജനപ്രിയ റാപ്പർ ബാദ്ഷാ തന്റെ ഹിറ്റ് ഗാനങ്ങളുമായി വേദി കീഴടക്കിയപ്പോൾ, ബോളിവുഡ് താരം നോറ ഫത്തേഹി ചടുലമായ നൃത്തച്ചുവടുകളുമായി സ്റ്റേഡിയത്തെ ഇളക്കിമറിച്ചു.

ഐസിസി ചെയർമാൻ ജയ് ഷായും ലോകകപ്പിന്റെ ബ്രാൻഡ് അംബാസഡറായ രോഹിത് ശർമയും ചേർന്നാണ് ട്രോഫി അവതരിപ്പിച്ചത്. ടൂർണമെന്റിൽ പങ്കെടുക്കുന്ന 20 രാജ്യങ്ങളെ പ്രതിനിധീകരിച്ച് 20 കുട്ടികളും ഇവർക്കൊപ്പം വേദിയിലുണ്ടായിരുന്നു. അനിരുദ്ധ് രവിചന്ദർ സംഗീതം നൽകിയ ‘ഫീൽ ദ് ത്രിൽ’ എന്ന ടൂർണമെന്റ് തീം സോങ്ങും ചടങ്ങിൽ അവതരിപ്പിച്ചു.