ചഹലിന്റെ കാര്യത്തിൽ നടന്നത് എന്താണെന്ന് വെളിപ്പെടുത്തി ശ്രേയസ് അയ്യർ; കളിക്ക് ശേഷം തന്ത്രം വ്യക്തമാക്കി പഞ്ചാബ് നായകൻ

Curated byഗോകുൽ എസ് | Samayam Malayalam | Updated: 9 Apr 2025, 12:47 am

Samayam Malayalamചെന്നൈ - പഞ്ചാബ് മത്സരത്തിന് ശേഷം

2025 സീസൺ ഇന്ത്യൻ പ്രീമിയർ ലീഗിലെ മിന്നും ഫോം തുടർന്നിരിക്കുകയാണ് പഞ്ചാബ് കിങ്സ്. നാലാം മത്സരത്തിൽ ചെന്നൈ സൂപ്പർ കിങ്സിനെയാണ് അവർ വീഴ്ത്തിയിരിക്കുന്നത്. മത്സരത്തിൽ ആദ്യം ബാറ്റ് ചെയ്ത പഞ്ചാബ് കിങ്സ് നിശ്ചിത 20 ഓവറുകളിൽ 219/6 എന്ന കിടിലൻ സ്കോർ നേടിയപ്പോൾ, ചെന്നൈയുടെ മറുപടി 201/5 ൽ അവസാനിച്ചു. 103 റൺസ് നേടിയ പഞ്ചാബ് കിങ്സ് ഓപ്പണർ പ്രിയാൻഷ് ആര്യയാണ് കളിയിലെ കേമൻ‌.അതേ സമയം പഞ്ചാബ് കിങ്സിന്റെ ഏറ്റവും മികച്ച ബൗളർമാരിൽ ഒരാളായ യുസ്വേന്ദ്ര ചഹലിനെ പതിനേഴാം ഓവറിലാണ് ക്യാപ്റ്റൻ ശ്രേയസ് അയ്യർ ആദ്യം പന്തേൽപ്പിച്ചത്. ഈ ഒരോവർ മാത്രമാണ് കളിയിൽ അദ്ദേഹം എറിഞ്ഞതും. വിക്കറ്റുകളൊന്നും നേടാനായില്ലെങ്കിലും ആകെ ഒൻപത് റൺസ് മാത്രമേ താരം വിട്ടുകൊടുത്തുള്ളൂ. പതിനാറാം ഓവർ വരെ ചഹലിനെ ബൗളിങ്ങിൽ ഇറക്കാതിരുന്ന പഞ്ചാബ് കിങ്സിന്റെ നീക്കം ആരാധകരെ അമ്പരപ്പിച്ചിരുന്നു‌‌‌. എന്നാൽ കളിയിൽ വിജയിച്ചതിന് ശേഷം സംസാരിക്കവെ ഇതിന് പിന്നിലെ കാരണം പഞ്ചാബ് കിങ്സ് നായക‌ൻ ശ്രേയസ് അയ്യർ വെളിപ്പെടുത്തി.


ടീം തന്ത്രങ്ങളുടെ ഭാഗമായാണ് ചഹലിനെ 17 മത് ഓവർ വരെ ബൗളിങ്ങിൽ നിന്ന് മാറ്റി നിർത്തിയതെന്നാണ് ശ്രേയസ് അയ്യരിന്റെ വെളിപ്പെടുത്തൽ. സ്പിന്നിനെ നന്നായി കളിക്കുന്ന ശിവം ദുബെയും ഡെവോൺ കോൺ വെയും ക്രീസിലുണ്ടായിരുന്നതിനാൽ മനപൂർവം ചഹലിനെ കൊണ്ടു വരാതിരിക്കുകയായിരുന്നുവെന്നാണ് ശ്രേയസ് സൂചിപ്പിച്ചത്. ദുബെക്ക് എതിരെ പേസ് ആക്രമണമായിരുന്നു തങ്ങളുടെ ഉദ്ദേശമെന്നും ഇതിനൊപ്പം പഞ്ചാബ് കിങ്സ് നായകൻ കൂട്ടിച്ചേർത്തു.

Also Read: ഡെവോൺ കോൺവെയെ റിട്ടയേഡ് ഔട്ടാക്കി ചെന്നൈ ‌സൂപ്പർ കിങ്സ്, ഐപിഎല്ലിൽ വീണ്ടും നാടകീയ രംഗങ്ങൾ; നടന്നത് ഇങ്ങനെ

മത്സരം ഇങ്ങനെ: മത്സരത്തിൽ ടോസ് നേടിയ പഞ്ചാബ് കിങ്സ് ആദ്യം ബാറ്റ് ചെയ്യാൻ തീരുമാനിക്കുകയായിരുന്നു. ഒരു വശത്ത് വിക്കറ്റുകൾ വീണുകൊണ്ടിരുന്നെങ്കിലും മറുവശത്ത് ഓപ്പണർ പ്രിയാൻഷ് ആര്യ വെടിക്കെട്ട് ബാറ്റിങ് കാഴ്ച വെച്ചുകൊണ്ടിരുന്നു. വെറും 42 പന്തുകളിൽ 102 റ‌ൺസെടുത്താണ് പ്രിയാൻഷ് പുറത്തായത്. ഏഴ് ഫോറുകളും ഒൻപത് സിക്സറുകളും താരത്തിന്റെ ബാറ്റിൽ നിന്ന് പിറന്നു. അവസാന ഓവറുകളിൽ ശശാങ്ക് സിങ് ( 36 പന്തിൽ 52*) മാർക്കോ യാൻസൻ ( 19 പന്തിൽ 34*) എന്നിവർ തകർത്തടിച്ചതോടെ പഞ്ചാബ് കിങ്സ് 20 ഓവറിൽ 219/6 എന്ന സ്കോറിലെത്തി.

Also Read: പ്രിയാന്‍ഷിന്റെ മാസ്മരിക പ്രകടനത്തില്‍ സിഎസ്‌കെ തകര്‍ന്നു; തുടര്‍ച്ചയായ നാലാം തോല്‍വി

220 റൺസ് വിജയലക്ഷ്യം പിന്തുടർന്ന ചെന്നൈ സൂപ്പർ കിങ്സിന്റെ മറുപടി 201/5 ൽ അവസാനിച്ചു. 49 പന്തിൽ 69 റൺസ് നേടിയ ഡെവോൺ കോൺവെയാണ് അവരുടെ ടോപ് സ്കോറർ‌ ശിവം ദുബെ 27 പന്തിൽ 42 റൺസും, എം എസ്‌ ധോണി 12 പന്തിൽ 27 റൺസും നേടി.