‘ചെന്നായ്ക്കൾക്ക് മുന്നിലേക്ക് എറിഞ്ഞു കൊടുത്തോളൂ, പക്ഷേ..’! ഇത് ‘ഹിറ്റ്മാൻ’ ആണ് മക്കളെ; രോ-കോ ഇല്ലാതെ എന്ത് ഏകദിനം?

എട്ടു വർഷങ്ങൾക്ക് മുൻപ് ലണ്ടനിൽ വച്ച് രോഹിത് ശർമ തന്നിലെ പോരാളിയെക്കുറിച്ച് പറഞ്ഞ ഒരു വാക്കുകളുണ്ട്, ‘‘എന്നെ ചെന്നായ്ക്കൾക്ക് മുന്നിലേക്ക് എറിഞ്ഞു കൊടുത്തോളൂ, ഞാൻ ആ കൂട്ടത്തെ നയിച്ചുകൊണ്ട് തന്നെ തിരിച്ചുവരും.’’ കാലം മാറിയിട്ടും ആ വാക്കുകളിലെ വീര്യം ഒട്ടും ചോർന്നുപോയിട്ടില്ലെന്ന് ഒരിക്കൽക്കൂടി തെളിയിക്കുന്നതായിരുന്നു ലോഡ്സിൽ കണ്ട കാഴ്ചകൾ. ഇന്ത്യയുടെ ഇംഗ്ലണ്ട് പര്യടനത്തിലെ മൂന്നാം ഏകദിനത്തിന് മുന്നോടിയായി, 39 വയസ്സുകാരനായ രോഹിതിന്റെ വിരമിക്കലിനെക്കുറിച്ചുള്ള അഭ്യൂഹങ്ങൾ ക്രിക്കറ്റ് ലോകത്ത് വൻതോതിൽ പ്രചരിച്ചിരുന്നു. എന്നാൽ, വിമർശനങ്ങൾക്കും പുകമറകൾക്കും തന്റെ ബാറ്റ് കൊണ്ട് മറുപടി നൽകി, വിരമിക്കൽ വാർത്തകളെ അതിർവരമ്പുകൾക്ക് അപ്പുറത്തേക്ക് അടിച്ചകറ്റുകയാണ് ‘ഹിറ്റ്മാൻ’ ചെയ്തത്.

എന്നാൽ ഇതിൽ നിന്നെല്ലാം മാറി രോഹിത് ശർമ സൃഷ്ടിച്ചത് സ്വന്തമായ മറ്റൊരു പാരമ്പര്യമാണ്. ഇംഗ്ലിഷ് മണ്ണിൽ റൺസ് അടിച്ചു കൂട്ടുക എന്ന തന്റെ പതിവ് അദ്ദേഹം തെറ്റിച്ചില്ല. അവസാന ഏകദിനത്തിന് തൊട്ടുമുൻപ് വരെ രോഹിതിന്റെ അവസാന മത്സരമായിരിക്കും ഇതെന്ന് പല മാധ്യമങ്ങളും പ്രചരിപ്പിച്ചു. രോഹിതിന്റെ മാതാപിതാക്കൾ സ്റ്റേഡിയത്തിലുണ്ടെന്ന വാർത്തകൾ പോലും പുറത്തുവന്നു. അഭ്യൂഹങ്ങൾ അതിരുകടന്നപ്പോൾ ബിസിസിഐ സെക്രട്ടറി ദേവജിത് സെയ്കിയയ്ക്ക് തന്നെ സംഭവത്തിൽ ഔദ്യോഗിക വിശദീകരണവുമായി രംഗത്തെത്തേണ്ടി വന്നു – ‘‘ഇത് രോഹിതിന്റെ അവസാന മത്സരമല്ല.’’

പുറത്ത് വലിയ ബഹളങ്ങൾ നടക്കുമ്പോഴും, അതിനെയെല്ലാം ശാന്തതയോടെ സമീപിക്കാനുള്ള അപൂർവ ശേഷി രോഹിതിനുണ്ടായിരുന്നു. തന്റെ ജോലി ഗ്രൗണ്ടിലാണെന്നും പുറത്തെ ബഹളങ്ങൾ താൻ കാര്യമാക്കുന്നില്ലെന്നും അദ്ദേഹം പിന്നീട് തുറന്നുപറഞ്ഞു. ‘‘പുറത്ത് ബഹളമില്ലെങ്കിൽ പിന്നെന്ത് രസം? എന്റെ ജോലി കളത്തിനുള്ളിലാണ്, അവരുടെ ജോലി പുറത്താണ്’’, എന്നായിരുന്നു മത്സരശേഷം രോഹിതിന്റെ പ്രതികരണം.

ലോഡ്സിലെ 30 ശതമാനത്തോളം വരുന്ന ഈർപ്പമുള്ള അന്തരീക്ഷത്തിൽ ഓടിയെടുക്കുന്ന റൺസുകൾക്ക് പകരം, ബൗണ്ടറികളിലൂടെ റൺസ് നേടാനാണ് അദ്ദേഹം താൽപര്യപ്പെട്ടത്. സാം കറന്റെയും ജേക്കബ് ബെതേലിന്റെയും ഓവറുകളിൽ രോഹിത് പന്തിനെ ഗാലറിയിലേക്ക് സിക്സറുകളായി പറത്തിയപ്പോൾ ഇംഗ്ലിഷ് ബോളർമാരുടെ മുഖത്ത് നിസ്സഹായത മാത്രമാണ് ശേഷിച്ചത്. 107 പന്തിൽ 132 റൺസെടുത്ത് അവിചാരിതമായി സ്വീപ് ഷോട്ടിന് ശ്രമിക്കുന്നതിനിടെയാണ് രോഹിത് പുറത്തായത്. അന്ന് പത്തോളം റെക്കോർഡുകളാണ് രോഹിത് തകർത്തത്.

ഈ തകർപ്പൻ പ്രകടനത്തോടെ ചില വലിയ നാഴികക്കല്ലുകൾ കൂടി രോഹിതിനെ തേടിയെത്തി. കരിയറിലെ 34-ാം ഏകദിന സെഞ്ചറി, ഇംഗ്ലണ്ടിൽ മാത്രം നേടുന്ന എട്ടാം ഏകദിന സെഞ്ചറി, ലണ്ടനിലെ ലോഡ്സ് സ്റ്റേഡിയത്തിൽ ഏകദിന സെഞ്ചറി നേടുന്ന ആദ്യ ഇന്ത്യൻ താരം എന്നിങ്ങനെ പോകുന്നു നേട്ടങ്ങൾ.

‘‘ഞങ്ങൾ കരിയർ മുഴുവൻ ഒന്നിച്ച് കളിച്ചവരാണ്. മധ്യ ഓവറുകളിൽ വിരാടിനൊപ്പം ബാറ്റ് ചെയ്യുന്നത് എപ്പോഴും ആവേശകരമാണ്,’’ രോഹിത് പിന്നീട് പറയുകയുണ്ടായി. രോഹിത് മടങ്ങിയ ശേഷവും കോലി ഒറ്റയാൾ പോരാട്ടം തുടർന്നു. 60 പന്തിൽ 74 റൺസെടുത്ത് കോലി പുറത്തായതോടെ ഇന്ത്യയുടെ പ്രതീക്ഷകൾ അസ്തമിച്ചു. മത്സരത്തിൽ ഇന്ത്യ പരാജയപ്പെടുകയും പരമ്പര 1-2 ന് ഇംഗ്ലണ്ടിന് മുന്നിൽ അടിയറവ് വയ്ക്കുകയും ചെയ്തെങ്കിലും, ആ മത്സരത്തിലെ ഏറ്റവും തിളക്കമുള്ള അധ്യായം രോ–കോ സഖ്യത്തിന്റെ പ്രകടനം തന്നെയായിരുന്നു.