ജോർജീനയുമായി 9 വർഷത്തെ ഡേറ്റിങ്, 4 മക്കൾ; 41–ാം വയസ്സിൽ സിആർ7ന് വിവാഹം! ഇന്നും വെളിപ്പെടുത്താതെ ആദ്യ മകന്റെ അമ്മയെ

ഫുട്ബോൾ മൈതാനത്ത് എതിരാളികളുടെ വലകുലുക്കുന്ന, ലോകമെമ്പാടും കോടിക്കണക്കിന് ആരാധകരുള്ള ക്രിസ്റ്റ്യാനോ റൊണാൾഡോയുടെ ജീവിതം കളിക്കളത്തിൽ മാത്രം ഒതുങ്ങുന്ന ഒന്നല്ല. പച്ചപ്പുൽമൈതാനങ്ങളിലെ റെക്കോർഡ് വേട്ടകൾക്കപ്പുറം, അഞ്ച് മക്കളെ വളർത്തുന്നതും കുടുംബത്തോടൊപ്പം ചെലവഴിക്കുന്ന നിമിഷങ്ങളുമാണ് തന്റെ ജീവിതത്തെ പ്രകാശ പൂർണമാക്കുന്നതെന്ന് ഈ പോർച്ചുഗീസ് ഇതിഹാസം പലപ്പോഴും പറയാറുണ്ട്. 41 വയസ്സുകാരനായ ക്രിസ്റ്റ്യാനോ റൊണാൾഡോയും 32 വയസ്സുകാരിയായ ജോർജീന റോഡ്രീഗ്‌സും ഒൻപതു വർഷമായി ഡേറ്റിങ്ങിലാണ്. ഇരുവരും വിവാഹത്തിന് ഒരുങ്ങുകയാണെന്ന വാർത്തയാണ് കഴിഞ്ഞദിവസമാണ് പുറത്തുവന്നത്.

∙ ജോർജീനയുമായുള്ള പ്രണയം2016ലാണ് റൊണാൾഡോയും ജോർജീനയും ആദ്യമായി കണ്ടുമുട്ടുന്നത്. മഡ്രിഡിലെ പ്രശസ്തമായ ഗോൾഡൻ മൈലിലെ ഗുച്ചി സ്റ്റോറിൽ സെയിൽസ് അസിസ്റ്റന്റായി ജോലി ചെയ്യുകയായിരുന്നു ജോർജീന. അന്ന് തുടങ്ങിയ ആത്മബന്ധം 2017ൽ ഇരുവരും സ്ഥിരീകരിച്ചു. ഇന്ന് 73 ദശലക്ഷത്തിലധികം ഇൻസ്റ്റഗ്രാം ഫോളോവേഴ്‌സുള്ള പ്രശസ്ത മോഡലും, ബിസിനസുകാരിയും, സ്നേഹനിധിയായ അമ്മയുമാണ് ജോർജീന. നെറ്റ്ഫ്ലിക്സ് പുറത്തിറക്കിയ ‘ഐ ആം ജോർജീന’ എന്ന മിനി സീരീസിലൂടെയാണ് ഇവരുടെ സ്വകാര്യജീവിതവും കുടുംബ വിശേഷങ്ങളും കൂടുതൽ ജനപ്രിയമായത്. ആദ്യ സീസണിന്റെ വൻ വിജയത്തിന് ശേഷം രണ്ടാമത്തെ സീസണും പ്രേക്ഷകരിലേക്ക് എത്തി. സീരീസിൽ ക്രിസ്റ്റ്യാനോ അപൂർവമായി മാത്രമേ പ്രത്യക്ഷപ്പെടുന്നുള്ളൂ. ജോര്‍ജീനയെ പരിചയപ്പെടുന്നതിനു മുൻപ്, റഷ്യൻ മോഡൽ ഐറിന ഷൈക്കുമായി റൊണാൾഡോ അഞ്ചു വർഷത്തോളം പ്രണയത്തിലായിരുന്നു.

സ്വന്തം അമ്മയല്ലെങ്കിലും, 2016ൽ റൊണാൾഡോയുടെ ജീവിതത്തിലേക്ക് വന്നതുമുതൽ ക്രിസ്റ്റ്യാനോ ജൂനിയറിനെ സ്വന്തം മകനെപ്പോലെയാണ് ജോർജീന വളർത്തുന്നത്. നിലവിൽ സ്‌പെയ്‌നിലെ മല്ലോർക്കയിൽ വേനൽക്കാല അവധി ആസ്വദിക്കുകയാണ് കുടുംബം. ഇതിന്റെ ചിത്രങ്ങളും വിഡിയോകളും ഇരുവരുടെ തങ്ങളുടെ സമൂഹമാധ്യമ അക്കൗണ്ടുകളിൽ പങ്കുവച്ചിട്ടുണ്ട്.

‘‘ഒരു വെള്ളച്ചാട്ടത്തിന് താഴെ കുളിക്കുക എന്നത് എന്റെ വലിയ സ്വപ്നമായിരുന്നു... ഇതു ശരിക്കും ഒരു ഫെയറിടെയിൽ സ്നാനമായിരുന്നു. ജൂനിയർ ശരിക്കും ഒരു ശിൽപിയെപ്പോലെയാണ്, ഏതു കാര്യത്തിലും അവന്റെ മിടുക്ക് അദ്ഭുതപ്പെടുത്തും. മനസ്സിൽ ഒരു കാര്യം തീരുമാനിച്ചിട്ടുണ്ടെങ്കിൽ അത് നടത്തിയെടുക്കാൻ മിടുക്കനാണ് ജൂനിയർ. അവൻ കുഞ്ഞായിരുന്നപ്പോൾ മുതൽ ഈ യാത്ര പതിവാണ്. അച്ഛനും അമ്മയും അവനും, കൂടെ കടലും. ഈ പ്രാവശ്യം ഞങ്ങൾ ഒട്ടേറെ മനോഹരമായ തീരങ്ങൾ കണ്ടെത്തി. ഇത്തവണ ഞങ്ങളുടെ ഇഷ്ടഭക്ഷണവും രുചിച്ചു.’’– അവധിക്കാല ചിത്രങ്ങൾ പങ്കുവച്ചു കൊണ്ട് ജോർജിന കുറിച്ചു.

അച്ഛന്റെ പാത പിന്തുടർന്ന് ഫുട്ബോളിൽ മിടുക്ക് തെളിയിക്കുന്ന ക്രിസ്റ്റ്യാനോ ജൂനിയർ നിലവിൽ സൗദി അറേബ്യൻ ക്ലബ്ബായ അൽ-നാസറിന്റെ യൂത്ത് ടീമിലാണ് കളിക്കുന്നത്. 2025 മേയിൽ ക്രൊയേഷ്യയിൽ നടന്ന ടൂർണമെന്റിനായി പോർച്ചുഗലിന്റെ യൂത്ത് ടീമിലേക്ക് ക്രിസ്റ്റ്യാനോ ജൂനിയർ തിരഞ്ഞെടുക്കപ്പെട്ടപ്പോൾ, ‘നിന്നിൽ അഭിമാനിക്കുന്നു മകനേ!’ എന്ന് റൊണാൾഡോ ഇൻസ്റ്റഗ്രാമിൽ കുറിച്ചിരുന്നു.

∙ മദീരയിൽ സ്വപ്ന വിവാഹം!

വർഷങ്ങളായി ഒരുമിച്ച് ജീവിക്കുന്ന ദമ്പതികൾ വിവാഹിതരാകുമോ എന്ന ചോദ്യത്തിന് പിയേഴ്സ് മോർഗനുമായുള്ള അഭിമുഖത്തിൽ റൊണാൾഡോ മറുപടി നൽകിയിരുന്നു, ‘‘വിവാഹം ഇപ്പോൾ എന്റെ പദ്ധതികളിൽ ഇല്ലായിരിക്കാം, പക്ഷേ ഭാവിയിൽ തീർച്ചയായും ഞാൻ ആഗ്രഹിക്കുന്നു.’’ ജോർജീനയും താനും വിവാഹത്തിന് തയാറാണെന്ന് റൊണാൾഡോ തുറന്നുപറഞ്ഞിരുന്നു.

കാത്തിരിപ്പുകൾക്കൊടുവിൽ, ഏറെക്കാലമായി കായികലോകം കാത്തിരിക്കുന്ന ആ ആഘോഷത്തിന് കളമൊരുങ്ങുകയാണ്! പോർച്ചുഗൽ ഇതിഹാസത്തിന്റെ ജന്മനാടായ മദീരയിലെ ഫഞ്ചലിലുള്ള കത്തീഡ്രലിൽ വച്ച് ഓഗസ്റ്റ് 8ന് റൊണാൾഡോയും ജോർജീനയും വിവാഹിതരാകുമെന്നാണ് വിവരം. തുടര്‍ന്ന് പഞ്ചനക്ഷത്ര ഹോട്ടലായ സാവോയ് പാലസിൽ നടക്കുന്ന ആഡംബര സൽക്കാരത്തിൽ കുടുംബാംഗങ്ങളും പ്രമുഖരും പങ്കുചേരും. പള്ളിക്കു സമീപത്തായുള്ള സവായ് പാലസിന്റെ രണ്ടു നിലകൾ പൂർണമായും ബുക്ക് ചെയ്തിട്ടുണ്ട്. വെള്ളി, ശനി ദിവസങ്ങളിൽ ഹോട്ടലിലെ ബാർ ഏരിയയും സ്വകാര്യ പരിപാടിക്കായി മാറ്റിവച്ചിട്ടുണ്ട്. സൂപ്പർ താരത്തിന്റെ വിവാഹ ആഘോഷങ്ങൾക്കു വേണ്ടിയാണ് ഇതെന്നാണ് അനൗദ്യോഗിക വിവരം.