ദക്ഷിണാഫ്രിക്ക വിക്കറ്റ് നഷ്ടം കൂടാതെ 140, അടുത്ത 121 റൺസിനിടെ 10 വിക്കറ്റും പിഴുത് ഇന്ത്യൻ വനിതകൾ; 15 റൺസ് വിജയം!

കൊളംബോ∙ ത്രിരാഷ്ട്ര ഏകദിന ടൂർണമെന്റിലെ തുടർച്ചയായ രണ്ടാം മത്സരത്തിലും നാടകീയ വിജയവുമായി ഇന്ത്യൻ വനിതകൾ. ദക്ഷിണാഫ്രിക്കയ്‌ക്കെതിരായ മത്സരത്തിൽ 15 റൺസിനാണ് ഇന്ത്യൻ വനിതകൾ ജയിച്ചുകയറിയത്. മത്സരത്തിൽ ടോസ് നേടി ബാറ്റിങ് തിരഞ്ഞെടുത്ത ഇന്ത്യ നിശ്ചിത 50 ഓവറിൽ ആറു വിക്കറ്റ് നഷ്ടത്തിൽ നേടിയത് 276 റൺസ്. മറുപടി ബാറ്റിങ്ങിൽ ഒരു ഘട്ടത്തിൽ വിക്കറ്റ് നഷ്ടം കൂടാതെ 140 റൺസെന്ന നിലയിലായിരുന്ന ദക്ഷിണാഫ്രിക്ക, അവസാന ഓവറുകളിൽ നാടകീയ ബാറ്റിങ് തകർച്ച നേരിട്ടാണ് 49.2 ഓവറിൽ 261 റൺസിന് പുറത്തായത്.

ഇന്ത്യയ്ക്കായി സ്നേഹ് റാണ 10 ഓവറിൽ 43 റൺസ് മാത്രം വഴങ്ങി അഞ്ച് വിക്കറ്റ് വീഴ്ത്തി. ആദ്യ മത്സരത്തിൽ ആതിഥേയരായ ശ്രീലങ്കയേയും ഇന്ത്യ തോൽപ്പിച്ചിരുന്നു.

ഓപ്പണർ ടാസ്മിൻ ബ്രിട്സിന്റെ സെഞ്ചറിക്കരുത്തിലായിരുന്നു റൺചേസിൽ ദക്ഷിണാഫ്രിക്കയുടെ കുതിപ്പ്. ബ്രിട്സ് 107 പന്തിൽ 13 ഫോറും മൂന്നു സിക്സും സഹിതം 109 റൺസെടുത്ത് പുറത്തായി. ക്യാപ്റ്റൻ കൂടിയായ സഹ ഓപ്പണർ ലോറ വോൾവാർത്ത് 75 പന്തിൽ മൂന്നു ഫോറുകളോടെ 43 റൺസെടുത്തു. ഓപ്പണിങ് വിക്കറ്റിൽ 177 പന്തിൽ 140 റൺസ് അടിച്ചുകൂട്ടിയ ഇരുവരും ദക്ഷിണാഫ്രിക്കയ്‌ക്ക് അനായാസ ജയം സമ്മാനിക്കുമെന്ന് കരുതിയിരിക്കെയായിരുന്നു ഇന്ത്യയുടെ ശക്തമായ തിരിച്ചുവരവ്.

ഇവർക്കു ശേഷം വന്നവരിൽ രണ്ടക്കത്തിലെത്തിയത് സുൻ ലൂസ് (34 പന്തിൽ 28), ക്ലോയ് ട്രിയോൺ (22 പന്തിൽ 28), അനറി ഡെർക്സൻ (20 പന്തിൽ മൂന്നു ഫോറും ഒരു സിക്സും സഹിതം 30) എന്നിവർ മാത്രം. ഇന്ത്യയ്ക്കായി 10 ഓവറിൽ 43 റൺസ് വഴങ്ങി അഞ്ച് വിക്കറ്റെടുത്ത സ്നേഹ റാണയ്ക്കു പുറമേ ഓരോ വിക്കറ്റ് വീഴ്ത്തിയ അരുദ്ധതി റെഡ്ഡി, എൻ.ചരണി, ദീപ്തി ശർമ എന്നിവരും തിളങ്ങി.

നേരത്തെ, അർധസെഞ്ചറി നേടിയ ഓപ്പണർ പ്രതിക റാവലിന്റെ നേതൃത്വത്തിലാണ് ഇന്ത്യ ശക്തമായ സ്കോറിലേക്ക് എത്തിയത്. പ്രതിക 91 പന്തിൽ ഏഴു ഫോറും ഒരു സിക്സും സഹിതം 78 റൺസുമായി ഇന്ത്യയുടെ ടോപ് സ്കോററായി. സ്മൃതി മന്ഥന 54 പന്തിൽ അഞ്ച് ഫോറുകളോടെ 36 റൺസെടുത്തു. ഓപ്പണിങ് വിക്കറ്റിൽ ഇരുവരും 83 റൺസ് കൂട്ടുകെട്ട് തീർത്തു.

ക്യാപ്റ്റൻ ഹർമൻപ്രീത് കൗർ 48 പന്തിൽ നാലു ഫോറുകൾ സഹിതം 41 റൺസുമായി പുറത്താകാതെ നിന്നു. ഹർലീൻ ഡിയോൾ (47 പന്തിൽ നാലു ഫോറുകളോടെ 29), ജമീമ റോഡ്രിഗസ് (32 പന്തിൽ നാലു ഫോറുകളോടെ 41), റിച്ച ഘോഷ് (14 പന്തിൽ മൂന്നു ഫോറും ഒരു സിക്സും സഹിതം 24) എന്നിവരും തിളങ്ങി. ദക്ഷിണാഫ്രിക്കയ്ക്കായി നോൻകുലുലേകോ എംലാബ രണ്ടു വിക്കറ്റ് വീഴ്ത്തി.