'ധോണി അക്കാര്യത്തെക്കുറിച്ച് ചിന്തിച്ച് തുടങ്ങിയെന്ന് ഉറപ്പുണ്ട്'; ആരാധകർക്കിടയിൽ ചർച്ചയായി ചെന്നൈ മുൻ താരത്തിൻ്റെ വാക്കുകൾ

Authored byലിജിൻ കടുക്കാരം | Samayam Malayalam | Updated: 26 Apr 2025, 8:31 pm

ചെന്നൈ: ഐപിഎല്ലിൽ ഏറ്റവും കൂടുതൽ ആരാധകരുള്ള ടീമുകളിൽ ഒന്ന് ചെന്നൈ സൂപ്പർ കിങ്സ് ആണെന്നതിൽ ആർക്കും ഒരു സംശയവും ഉണ്ടാകില്ല. പതിനെട്ടാം സീസണിൽ ആരാധകകരെ ഏറ്റവും കൂടുതൽ നിരാശപ്പെടുത്തിയ ടീമും സിഎസ്കെ തന്നെയാണ്. ഇന്ത്യൻ ക്രിക്കറ്റിലെ 'ക്യാപ്റ്റൻ കൂൾ' എംഎസ് ധോണിയാണ് നിലവിൽ ടീമിൻ്റെ നായകൻ റിതുരാജ് ഗെയ്ക്വാദിൽ നിന്ന് ധോണി ക്യാപ്റ്റൻസി ഏറ്റെടുത്തപ്പോൾ ആരാധകർ ഒരുപാട് പ്രതിക്ഷിച്ചെങ്കിലും ടീമിന് മുന്നോട്ട് പോകാൻ കഴിഞ്ഞില്ല. ഇപ്പോഴിതാ ടീമിനെക്കുറിച്ച് നിർണായക പ്രതികരണം നടത്തി രംഗത്തെത്തിയിരിക്കുകയാണ് ചെന്നൈയുടെ മുൻ താരമായ അമ്പാട്ടി റായിഡു. ധോണിയെക്കുറിച്ച് താരം പറഞ്ഞ വാക്കുകൾ ആരാധകർക്കിടയിൽ ചർച്ചയാവുകയാണ്. ഇന്നലെ ഹൈദരാബാദിനോടും തോറ്റതോടെ 9 മത്സരങ്ങളിൽ 4 പോയിൻ്റുമായി പട്ടികയിൽ ഏറ്റവും പിന്നിലാണ് സിഎസ്കെ നിലവിലുള്ളത്. ടീമിൻ്റെ പ്രകടനം വിലയിരുത്തിയാണ് മുൻ ഇന്ത്യൻ താരമായ അമ്പാട്ടി റായിഡു പ്രതികരണം നടത്തിയത്. ഇന്നലെ ടീമിൽ വളരെയധികം മാറ്റങ്ങൾ വരുത്തിയിട്ടും ചെന്നൈയ്ക്ക് വിജയ വഴിയിൽ തിരിച്ചെത്താൻ കഴിഞ്ഞിരുന്നില്ല. ഈ സാഹചര്യത്തിൽ ടി20 ക്രിക്കറ്റിനോടുള്ള സമീപനത്തിൽ ചെന്നൈ ശ്രദ്ധിക്കേണ്ടതുണ്ടെന്നാണ് താരം പറയുന്നത്.
ജഡേജയുടെ ബാറ്റ് മാറ്റണമെന്ന് അമ്പയര്‍; നിരാശയില്‍ ബാറ്റ് നിലത്ത് അടിച്ചു; ഐപിഎല്ലില്‍ വീണ്ടും 'ബാറ്റ് വിവാദം'
'ഏറ്റവും മോശം അവസ്ഥയിലാണ് ഇപ്പോഴെന്ന് അറിയാം. പക്ഷേ സി‌എസ്‌കെയ്ക്ക് ഇത് ഒരു മികച്ച പാഠം കൂടിയാണ്. നിങ്ങൾ നിങ്ങളുടെ നേട്ടങ്ങളെക്കുറിച്ച് പറഞ്ഞിരിക്കുകയും ഭാവിയിൽ ശ്രദ്ധിക്കാതിരിക്കുകയും ചെയ്താൽ, ഇതാണ് സംഭവിക്കാൻ സാധ്യത. ഇനി മുതൽ, കളിയ്‌ക്കൊപ്പം മുന്നോട്ടുപോകുന്നതിനെക്കുറിച്ച് അവർ വളരെ വളരെ ജാഗ്രത പാലിക്കും. കളി മുന്നോട്ട് പോയി എന്ന് എം‌എസ് ധോണി പോലും സമ്മതിച്ചിട്ടുണ്ട്, അടുത്ത വർഷത്തേക്ക് ഒരു ടീമിനെ കെട്ടിപ്പടുക്കുന്നതിനെക്കുറിച്ച് അദ്ദേഹം ഇതിനകം ചിന്തിച്ചുകൊണ്ടിരിക്കുകയാണെന്ന് എനിക്ക് ഉറപ്പുണ്ട്' റായിഡു പറഞ്ഞു.

സീസണിൽ പ്ലേ ഓഫ് സാധ്യതകൾ ഏറെക്കുറെ അസ്തമിച്ച് കഴിഞ്ഞ ചെന്നൈ അടുത്ത സീസണിലേക്കാകും ഇനി ശ്രദ്ധിക്കുകയെന്നാണ് റായിഡു പറയുന്നത്. ബാറ്റിങ് നിരയിൽ തിളങ്ങുന്ന ചില മികച്ച താരങ്ങളെ കാണുന്നുണ്ട്. പ്രത്യേകിച്ച് ബ്രെവിസും മാത്രെയും - അവരാണ് യഥാർഥ പോസിറ്റീവ് ഘടകങ്ങൾ. ചിലപ്പോൾ, ഇതുപോലുള്ള ഒരു സീസൺ ടീമിന് ചില തിരിച്ചറിവുകൾ നൽകിയേക്കും. ക്രിക്കറ്റാണ് എപ്പോഴും തങ്ങളേക്കാൾ വലുതെന്ന് ഓർമിപ്പിക്കുമെന്ന് അമ്പാട്ടി റായിഡു പറയുന്നു.

ടൂർണ്ണമെൻ്റിനിടയിൽ ചെന്നൈ നടത്തിയ മാറ്റങ്ങളെക്കുറിച്ച് സംസാരിച്ച റായിഡു ഇത് അടുത്ത സീസണിലേക്കുള്ള ഒരു പരീക്ഷണമാണെന്നും പറയുന്നു. 'മാറ്റങ്ങൾ ആവശ്യമായിരുന്നു. ഇപ്പോൾ നമ്മൾ കാണുന്നത് അടുത്ത സീസണിലേക്കുള്ള ഒരു പരീക്ഷണ നീക്കമാണ്. സി‌എസ്‌കെയ്ക്ക് അവരുടെ നിലവിലെ ടീമിലെ ഭൂരിഭാഗം താരങ്ങളെയും അടുത്ത സീസണിൽ നിലനിർത്തുമെന്ന് തോന്നുന്നില്ല. പരമാവധി, ഏഴോ എട്ടോ കളിക്കാരെ നിലനിർത്തിയേക്കാമെന്നും അദ്ദേഹം പറഞ്ഞു.
ധോണിയുടെ സിഎസ്‌കെയുടെ കാര്യം ഏതാണ്ട് തീരുമാനമായി; ഐപിഎല്‍ 2025ല്‍ ഏഴാം തോല്‍വി, എസ്ആര്‍ച്ചിന് 5 വിക്കറ്റ് ജയം
ഇതുവരെ കളിച്ച ഒൻപത് മത്സരങ്ങളിൽ ഏഴിലും ചെന്നൈ സൂപ്പർ കിങ്സ് പരാജയപ്പെട്ടിരുന്നു. സ്വന്തം ഗ്രൗണ്ടിൽ പോലും വലിയ തിരിച്ചടിയാണ് ടീമിന് നേരിടേണ്ടി വരുന്നത്. 15 വർഷത്തിനു ശേഷം ചെപ്പോക്കിൽ ഡിസി സിഎസ്‌കെയെ തോൽപ്പിച്ചു. 17 വർഷത്തിനു ശേഷം ചെപ്പോക്കിൽ ആർസിബി സിഎസ്‌കെയെ തോൽപ്പിച്ചു. ചെപ്പോക്കിൽ എസ്ആർഎച്ച് ആദ്യമായി സിഎസ്‌കെയെ തോൽപ്പിച്ചതും ഇത്തവണയായിരുന്നു.