നാലാം മിനിറ്റിൽ വലകുലുക്കി അരങ്ങേറ്റക്കാരൻ റയാൻ വില്യംസ്; കൊച്ചിയിൽ ഹോങ്കോങ്ങിനെ കീഴടക്കി ഇന്ത്യ (2–1)

കൊച്ചി∙ എഎഫ്സി ഏഷ്യൻ കപ്പ് ഫുട്ബോൾ 3 –ാം യോഗ്യതാ റൗണ്ടിലെ അവസാന പോരാട്ടത്തിൽ ഇന്ത്യയ്ക്ക് ജയം. കലൂർ സ്റ്റേഡിയത്തിൽ നടന്ന മത്സരത്തിൽ ഹോങ്കോങ്ങിനെ ഒന്നിനെതിരെ രണ്ടു ഗോളുകൾക്കാണ് ഇന്ത്യ കീഴടക്കിയത്. അരങ്ങേറ്റക്കാരൻ റയാൻ വില്യംസ് (4+), ആകാശ് മിശ്ര (50+) എന്നിവരാണ് ഇന്ത്യയുടെ ഗോൾ വേട്ടക്കാർ. എവർട്ടൺ (65+) ആണ് ഹോങ്കോങ്ങിനു വേണ്ടി ആശ്വാസ ഗോൾ നേടിയത്.

ഇന്ത്യൻ പൗരത്വം സ്വീകരിച്ചു ‘സ്വദേശിയായി’ മാറിയ ഓസ്ട്രേലിയൻ ഫോർവേഡ് താരമാണ് റയാൻ വില്യംസ്. നാലാം മിനിറ്റിൽ ലക്ഷ്യം കണ്ടതോടെ ഇന്ത്യക്കായി ഒരു അരങ്ങേറ്റക്കാരന്റെ വേഗതയേറിയ ഗോൾ എന്ന റെക്കോർഡും റയാൻ വില്യംസ് സ്വന്തമാക്കി.

2027 ലെ ഏഷ്യൻ കപ്പിനു യോഗ്യത നേടാനാകാതെ നേരത്തേ തന്നെ പുറത്തായ ഇന്ത്യയ്ക്കു ഈ ജയം ആശ്വാസമാണ്. തോൽവിയോടെ ഹോങ്കോങ്ങിന്റെ സാധ്യതകളും അവസാനിച്ചു.