പരിശീലകന്റെ ചിത്രം ടാറ്റു ചെയ്ത് കുക്കുറെയ്യ, തലയിൽ പിങ്ക് അടിച്ച് ഗാവി; അടുത്ത ഊഴം യമാലിന്റേത്, താടിയും മീശയും വളർത്തുമോ?

മഡ്രിഡ്∙ സ്പെയിൻ ചരിത്രത്തിലെ രണ്ടാം ലോകകപ്പ് വിജയിച്ച് ദിവസങ്ങളായെങ്കിലും സ്പാനിഷ് താരങ്ങള്‍ തിരക്കിലാണ്. ലോകകപ്പ് ജയിച്ചാല്‍ നടപ്പാക്കുമെന്നു പ്രഖ്യാപിച്ച കാര്യങ്ങൾക്കു പിന്നാലെയാണ് സ്പാനിഷ് താരങ്ങള്‍. ലോകകപ്പ് ജയിച്ചാല്‍ പരിശീലകൻ ലുയി ഡെ ലാ ഫ്യുന്തെയുടെ ചിത്രം ടാറ്റു ചെയ്യുമെന്നായിരുന്നു പ്രതിരോധ താരം മാർക്ക് കുക്കുറെയ്യയുടെ പ്രഖ്യാപനം. സ്പെയിൻ‍ കിരീടമുർത്തിയതിനു പിന്നാലെ കുക്കുറെയ്യ ടാറ്റു വാഗ്ദാനം പാലിച്ചു. തലയിൽ പിങ്ക് നിറം അടിക്കുമെന്നു പറഞ്ഞ മിഡ്ഫീൽഡർ പാബ്ലോ ഗാവി അതും പാലിച്ചു.

എന്നാൽ സ്പെയിനിന്റെ യുവസ്ട്രൈക്കർ ലമീൻ യമാലിന്റെ പ്രഖ്യാപനമായിരുന്നു സ്പെയിന്‍ ആരാധകർ ഏറ്റെടുത്തത്. മൂന്നാഴ്ചത്തേക്ക് മീശയും താടിയും വളർത്തുമെന്നായിരുന്നു യമാലിന്റെ ഉറപ്പ്. 2023 പ്രൊഫഷനൽ ഫുട്ബോളിൽ അരങ്ങേറിയതു മുതൽ ‘ക്ലീൻ ഷേവ്’ ലുക്കിലാണ് യമാൽ കളിക്കാനിറങ്ങിയിട്ടുള്ളത്. ലോകകപ്പ് നേടിയതിനാൽ താരം ലുക്ക് മാറ്റുമോയെന്നാണ് ആരാധകർ കാത്തിരിക്കുന്നത്. ലോകകപ്പ് വിജയത്തിനു ശേഷം ലമീൻ യമാലും ഗാവിയും സ്പാനിഷ് ക്ലബ്ബ് ബാർസിലോനയുടെ ട്രെയിനിങ് ക്യാംപിൽ ചേർന്നിട്ടുണ്ട്.

ഫിഫ ലോകകപ്പ് ഫൈനലിൽ ലയണൽ മെസ്സിയുടെ അർജന്റീനയെ 1–0ന് തോൽപിച്ചാണ് സ്പെയിൻ കിരീടമുയർത്തിയത്. എക്സ്ട്രാ ടൈമിലേക്കു നീണ്ട മത്സരത്തിന്റെ 106–ാം മിനിറ്റിൽ ഫെറാൻ ടോറസാണു സ്പെയിനിന്റെ വിജയ ഗോൾ നേടിയത്. മത്സരത്തിന്റെ 90+3–ാം മിനിറ്റിൽ അർജന്റീന താരം എൻസോ ഫെർണാണ്ടസ് ചുവപ്പു കാർഡ് കണ്ടു പുറത്തായത് മത്സരത്തിൽ നിര്‍ണായകമായി.