പൊരുതിവീണ് രാജസ്ഥാന്‍, വീണ്ടും അവസാന ഓവറില്‍ തോല്‍വി; സൂപ്പര്‍ ത്രില്ലറില്‍ ആര്‍സിബിക്ക് 11 റണ്‍സ് ജയം

Authored byനിഷാദ് അമീന്‍ | Samayam Malayalam | Updated: 25 Apr 2025, 12:28 am

ഐപിഎല്‍ 2025ലെ ആവേശകരമായ പോരാട്ടത്തില്‍ രാജസ്ഥാന്‍ റോയല്‍സിനെ 11 റണ്‍സിന് കീഴടക്കി റോയല്‍ ചാലഞ്ചേഴ്‌സ് ബെംഗളൂരു. വിജയത്തോടെ ഒരു പടി കൂടി കടന്ന് ആര്‍സിബി മൂന്നാം സ്ഥാനത്തേക്ക് ഉയര്‍ന്നു. ഒമ്പത് മാച്ചുകളില്‍ ഏഴിലും പരാജയപ്പെട്ട ആര്‍ആറിന്റെ പ്ലേ ഓഫ് പ്രതീക്ഷകള്‍ ഏതാണ്ട് അസ്തമിച്ച് എട്ടാം സ്ഥാനത്ത് തുടരുന്നു. ഇനി അഞ്ച് മല്‍സരങ്ങളാണ് അവര്‍ക്ക് ബാക്കിയുള്ളത്. ആര്‍സിബി അഞ്ചിന് 205 റണ്‍സെടുത്തപ്പോള്‍ ആര്‍ആറിന് ഒമ്പതിന് 194 റണ്‍സെടുക്കാനേ കഴിഞ്ഞുള്ളൂ.


120 പന്തില്‍ 206 എന്ന വലിയ വിജയലക്ഷ്യം മുന്നില്‍ കണ്ട് ക്രീസിലിറങ്ങിയ ആര്‍ആറിനായി യശസ്വി ജയ്‌സ്വാള്‍ ആദ്യ പന്തില്‍ തന്നെ സിക്‌സറോടെ ഗംഭീര തുടക്കമിച്ചു. ഐപിഎല്ലില്‍ ഇത് മൂന്നാം തവണയാണ് അദ്ദേഹം ആദ്യ പന്തില്‍ സിക്‌സറടിക്കുന്നത്. ഒന്നില്‍ കൂടുതല്‍ തവണ ആരും ഈ നേട്ടം കൈവരിച്ചിട്ടില്ല. ജയ്‌സ്വാള്‍ 19 പന്തില്‍ 49 റണ്‍സെടുത്തു.

സഞ്ജു സാംസണിന് പകരം ഓപണറായ കൗമാര താരം വൈഭവ് സൂര്യവന്‍ഷി 12 പന്തില്‍ 16 റണ്‍സ് നേടി. നിതീഷ് റാണ 28 (22), റിയാന്‍ പരാഗ് 22 (10), ധ്രുവ് ജുറെല്‍ 47 (34), ഷിംറോണ്‍ ഹിറ്റ്‌മെയര്‍ 11 (8), ശിവം ദുബെ 12 (7) എന്നിവര്‍ പൊതിയെങ്കിലും വിജയത്തിന് അടുത്തെത്താനേ കഴിഞ്ഞുള്ളൂ.

സഞ്ജു സാംസണ്‍ എപ്പോള്‍ തിരിച്ചെത്തുമെന്ന് പറയാനാവില്ല; പരിക്കിനെക്കുറിച്ച് പുതിയ വിവരങ്ങള്‍ പങ്കുവച്ച് റിയാന്‍ പരാഗ്
അവസാന ഓവറില്‍ മൂന്ന് വിക്കറ്റ് ശേഷിക്കെ 17 റണ്‍സാണ് ആര്‍ആറിന് വേണ്ടിയിരുന്നത്. രണ്ട് വിക്കറ്റ് കൂടി നഷ്ടപ്പെടുത്തി നേടിയത് അഞ്ച് റണ്‍സ് മാത്രം. ആര്‍സിബിയുടെ ജോഷ് ഹേസില്‍വുഡ് നാല് ഓവറില്‍ 33 റണ്‍സിന് നാല് വിക്കറ്റെടുത്ത് പ്ലെയര്‍ ഓഫ് ദി മാച്ച് ആയി.

ഇത് മൂന്നാം വണയാണ് അവസാന ഓവറില്‍ ആര്‍ആറിന്റെ തോല്‍വി. ഡല്‍ഹി ക്യാപിറ്റല്‍സിനോടും (സൂപ്പര്‍ ഓവര്‍) ലഖ്നൗ സൂപ്പര്‍ ജയന്റ്സിനോടും ചെറിയ സ്‌കോറിനാണ് തോറ്റത്.

ടോസ് നഷ്ടപ്പെട്ട് ബാറ്റിങിനിറങ്ങിയ ആര്‍സിബിക്ക് വേണ്ടി ഓപണര്‍മാരായ ഫില്‍ സാള്‍ട്ടും വിരാട് കോഹ്‌ലിയും സ്വന്തം കാണികള്‍ക്ക് മുന്നില്‍ മികച്ച ഇന്നിങ്‌സിന് തുടക്കംകുറിച്ചു. ഇവരും ചേര്‍ന്ന് ഒന്നാം വിക്കറ്റില്‍ 6.4 ഓവറില്‍ 61 റണ്‍സെടുത്തു.

ഒത്തുകളി ആരോപണത്തിന് പിന്നിലെ ഞെട്ടിക്കുന്ന കാരണം വെളിപ്പെടുത്തി രാജസ്ഥാന്‍ റോയല്‍സ്; മുഖ്യമന്ത്രിക്ക് പരാതി നല്‍കി
ഫില്‍ സാള്‍ട്ട് 23 പന്തില്‍ 26 റണ്‍സെടുത്ത് പുറത്തായ ശേഷമെത്തിയ ദേവ്ദത്ത് പടിക്കല്‍ കിടിലന്‍ ഫോമിലായിരുന്നു. കോഹ്‌ലിക്ക് അദ്ദേഹം മികച്ച പിന്തുണ നല്‍കി.

കോഹ്‌ലി 42 പന്തില്‍ എട്ട് ഫോറുകളും രണ്ട് സിക്‌സറുകളും സഹിതം 70 റണ്‍സെടുത്ത് പുറത്തായി. ഈ വേദിയില്‍ 3,500 ടി20 റണ്‍സ് എന്ന നാഴികക്കല്ലും താണ്ടി. ടി20 ക്രിക്കറ്റില്‍ ഒരു വേദിയില്‍ ഇത്രയും റണ്‍സ് നേടുന്ന ലോകത്തിലെ ആദ്യ താരമാണ്.

ദേവ്ദത്ത് 27 പന്തില്‍ അര്‍ധ സെഞ്ചുറി തികച്ചയുടന്‍ പുറത്തായി. മൂന്ന് സിക്‌സറുകള്‍ പറത്തിയ അദ്ദേഹം നാല് ബൗണ്ടറികളും പായിച്ചു. ഈ ഘട്ടത്തില്‍ സ്‌കോര്‍ 16.1 ഓവറില്‍ 161ലെത്തിയിരുന്നു.

ടിം ഡേവിഡ് 15 പന്തില്‍ 23 റണ്‍സോടെ റണ്ണൗട്ടായി. അവസാന രണ്ട് ഓവറുകളില്‍ ആഞ്ഞടിച്ച ജിതേഷ് ശര്‍മ ടീം സ്‌കോര്‍ 200 കടത്തി. 10 പന്തില്‍ 20 റണ്‍സോടെ ജിതേഷ് പുറത്താവാതെ നിന്നു.