‘ബാഡ്മിന്റൻ ഒഴികെ എല്ലാക്കാര്യങ്ങളിലും ഞങ്ങൾക്ക് രണ്ട് ഇഷ്ടം’: വിവാഹമോചനത്തിനു പിന്നാലെ വൈറലായി സൈനയുടെ പഴയ അഭിമുഖം

ന്യൂഡൽഹി∙ ഏഴു വർഷം നീണ്ട ദാമ്പത്യബന്ധം പരസ്പരധാരണയോടെ അവസാനിപ്പിക്കുന്നതായി അറിയിച്ചതിനു പിന്നാലെ, സമൂഹമാധ്യമങ്ങളിൽ വൈറലായി ഒളിംപിക് മെഡൽ ജേതാവു കൂടിയായ ബാഡ്മിന്റൻ താരം സൈന നെഹ്‌വാളും മുൻ ഭർത്താവ് പി.കശ്യപും ഒരുമിച്ചുള്ള പഴയ അഭിമുഖം. ബാഡ്മിന്റൻ ഒഴികെ മറ്റു കാര്യങ്ങളിലെല്ലാം തങ്ങൾക്ക് രണ്ട് ഇഷ്ടമാണെന്ന് സൈന വെളിപ്പെടുത്തുന്ന അഭിമുഖമാണ്, വിവാഹമോചന വാർത്തകൾക്കു പിന്നാലെ വ്യാപകമായി പ്രചരിക്കുന്നത്.

2021ൽ ഒരു മാഗസിന് നൽകിയ അഭിമുഖത്തിലാണ്, രണ്ടു പേർക്കും ഇടയിൽ പൊതുവായുള്ള ഇഷ്ടങ്ങളെക്കുറിച്ച് ചോദ്യം ഉയർന്നത്. ‘ബാഡ്മിന്റൻ മാത്രം’ എന്നായിരുന്നു കശ്യപിനെ സാക്ഷിയാക്കി സൈനയുടെ മറുപടി. ‘ഞങ്ങളുടെ മറ്റ് ഇഷ്ടങ്ങളും താൽപര്യങ്ങളുമെല്ലാം വ്യത്യസ്തമാണ്’ എന്നും സൈന കൂട്ടിച്ചേർത്തു.

2018 ഡിസംബറിലാണ് കശ്യപും സൈനയും വിവാഹിതരായത്. പത്തു വർഷത്തെ പ്രണയത്തിനുശേഷമായിരുന്നു വിവാഹം. 2012ലെ ലണ്ടന്‍ ഒളിംപിക്‌സില്‍ വെങ്കല മെഡല്‍ നേടിയ സൈന 2010, 2018 ലെ കോമണ്‍വെല്‍ത്ത്‌ ഗെയിംസിൽ സ്വർണ മെഡല്‍ ജേതാവായിരുന്നു. ഒളിംപിക്സ് ക്വാർട്ടറിലെത്തുന്ന ആദ്യ ഇന്ത്യൻ പുരുഷ ബാഡ്മിന്റൻ താരമാണ് പി.കശ്യപ്. 2012ൽ കശ്യപിനെ കേന്ദ്രസർക്കാർ അർജുന പുരസ്കാരം നൽകി ആദരിച്ചു. 2014 ഗ്ലാസ്‌ഗോ കോമൺവെൽത്ത് ഗെയിംസിൽ പുരുഷ സിംഗിൾസിൽ കശ്യപ് സ്വർണം നേടിയിരുന്നു.

‘‘ജീവിതം ചിലപ്പോഴൊക്കെ നമ്മളെ വ്യത്യസ്ത ദിക്കുകളിലേക്ക് കൊണ്ടുപോകും. ഒരുപാട് ആലോചനകൾക്കും ചിന്തകൾക്കും ശേഷം ഞാനും കശ്യപും രണ്ടു വഴിക്ക് പിരിയാം എന്ന തീരുമാനമെടുത്തു. ഞങ്ങൾ ഞങ്ങൾക്കുവേണ്ടിയും പരസ്പര സമാധാനത്തിനും ഉയർച്ചയ്ക്കും വേണ്ടി ഈ വഴി തിരഞ്ഞെടുക്കുന്നു. ഇതുവരെ നൽകിയ മികച്ച ഓർമകൾക്ക് നന്ദി.അതോടൊപ്പം മുന്നോട്ടുള്ള ജീവിതത്തിന് എല്ലാ ആശംസകളും നേരുന്നു. ഈ സമയത്ത് ഞങ്ങളുടെ സ്വകാര്യതയെ മാനിച്ചതിനും മനസ്സിലാക്കിയതിനും നിങ്ങൾക്കും നന്ദി.’’– വിവാഹമോചന വാർത്ത പരസ്യമാക്കി സൈന ഇൻസ്റ്റഗ്രാമിൽ കുറിച്ചു.