മെസ്സിക്ക് ശേഷം ഇനി ആര്? അർജന്റീന ടീമിൽ ഇനി എന്തൊക്കെ മാറ്റങ്ങൾ? എങ്കിലും ഒരുകാര്യം ‘മിസ്’ ചെയ്യും

അർജന്റീന ഫുട്ബോൾ ടീമിൽ ലയണൽ മെസ്സിയുടെ പിൻഗാമിയായി ഇനി ആര്? രാജ്യാന്തര ഫുട്ബോളിൽനിന്നു വിരമിക്കൽ പ്രഖ്യാപിച്ച മെസ്സി ബാക്കിവയ്ക്കുന്നത് ഉത്തരം കിട്ടാത്തൊരു ചോദ്യം. തുടർച്ചയായ രണ്ടു ലോകകപ്പുകളുടെ ഫൈനലിലേക്കു ടീമിനെ നയിച്ച മെസ്സിക്കു പകരം വയ്ക്കാൻ പോന്നൊരു പേര് അർജന്റീനയിലെന്നല്ല, ലോകത്തേതു ടീമിൽ തേടിയാലും കിട്ടാനിടയില്ല. അതിനാൽ, പുതിയ മെസ്സിയെ തേടുകയല്ല, പുതിയൊരു അർജന്റീനയെ സൃഷ്ടിക്കുകയാവും അർജന്റീന കോച്ച് ലയണൽ സ്കലോനിയുടെ ദൗത്യം.

ലയണൽ മെസ്സിയെ ചുറ്റിക്കറങ്ങുന്ന ഒന്നായിരുന്നു അർജന്റീനയുടെ ഗെയിം പ്ലാൻ. മെസ്സിക്കു കളത്തിൽ സ്വാതന്ത്ര്യം നൽകി, സഹതാരങ്ങളെ അതിനെ കേന്ദ്രീകരിച്ചു കളിപ്പിക്കുന്നതായിരുന്നു ലയണൽ സ്കലോനിയുടെ ശൈലി. മെസ്സിക്കു പന്ത് എത്തിക്കൂ, മെസ്സി തീരുമാനിക്കട്ടെ എന്ന എളുപ്പവഴിയിൽനിന്നു കൂട്ടുത്തരവാദിത്തത്തിന്റെ കളത്തിലേക്കാകും അർജന്റീന ഇനിയിറങ്ങുന്നത്.

കഴിഞ്ഞ ലോകകപ്പിലെ മിക്ക കളികളിലും മെസ്സിക്കൊപ്പം മുന്നേറ്റനിരയിൽ യൂലിയൻ അൽവാരസിനെയാണ് സ്‌കലോനി ആശ്രയിച്ചത്. അൽവാരസിന്റെ പ്രസ്സിങ് മികവായിരുന്നു മെസ്സി തക്കം പാർത്തിരിക്കുന്ന ആക്രമണത്തിലെ ടാക്ടിക്കൽ കോംബിനേഷൻ. അൽവാരസ് ഇനി ഗോൾവേട്ടയ്ക്കു ചുക്കാൻ പിടിക്കുമെന്നാണു വിലയിരുത്തൽ. വിങ്ങർമാരുടെയും മിഡ്‌ഫീൽഡർമാരുടെയും പ്രൈമറി ടാർഗറ്റ് എന്ന വലിയ റോളിലേക്കുള്ള യുവതാരത്തിന്റെ എൻട്രിയാണ് അർജന്റീനയുടെ തന്ത്രങ്ങളിൽ വരാൻ പോകുന്ന വലിയ മാറ്റം.

അൽവാരസും ലൗറ്റാരോ മാർട്ടിനെസും ആദ്യ ഇലവനിൽ ഒരുമിച്ചെത്തുന്ന അർജന്റീനയെയാകും ഇനി കാണാനാവുക. തിയാഗോ അൽമാഡയും നിക്കോ പാസും വിങ്ങുകളിലുള്ള ടീമിൽ സെൻട്രൽ സ്ട്രൈക്കർ റോളിൽ ലൗറ്റാരോ മാർട്ടിനെസ് കൂടി വരുന്നതോടെ അർജന്റീന അപകടകാരികളാകും. മധ്യത്തിലും മുന്നിലുമായി പഴുതുകളെല്ലാം അടച്ചാലും അർജന്റീന ‘മിസ്’ ചെയ്യുന്നൊരു ഘടകം ബാക്കിയാണ് – ഫൈനൽ തേഡിൽ മെസ്സിക്കു മാത്രം സാധ്യമായിരുന്ന ‘അസാധ്യകാര്യങ്ങൾ’ !