റിയാൻ പരാഗ് നാണംകെട്ടു, രാജസ്ഥാൻ റോയൽസിന്റെ പുതിയ ക്യാപ്റ്റന് മറക്കാൻ ആഗ്രഹിക്കുന്ന റെക്കോഡ് സ്വന്തം

Curated byഗോകുൽ എസ് | Samayam Malayalam | Updated: 27 Mar 2025, 11:29 am

Samayam Malayalamറിയാൻ പരാഗും അജിങ്ക്യ രഹാനെയും

2025 സീസൺ ഇന്ത്യൻ പ്രീമിയർ ലീഗിൽ ദയനീയ തുടക്കമാണ്‌ രാജസ്ഥാൻ റോയൽസിന് ലഭിച്ചിരിക്കുന്നത്. ആദ്യ കളിയിൽ സൺ റൈസേഴ്സ് ഹൈദരാബാദിനോട് തോറ്റ അവർ, ബുധനാഴ്ച രാത്രി നടന്ന മത്സരത്തിൽ കൊൽക്കത്ത നൈറ്റ് റൈഡേഴ്സിന് മുന്നിലും പരാജയപ്പെട്ടു. യുവതാരം റിയാൻ പരാഗായിരുന്നു ഈ രണ്ട് കളികളിലും രാജസ്ഥാ‌ൻ റോയൽസിനെ നയിച്ചത്. ഫിറ്റ്നസ് പ്രശ്നങ്ങളെ തുടർന്ന് സഞ്ജു സാംസൺ സ്പെഷ്യലിസ്റ്റ് ബാറ്റർ മാത്രമായി കളിക്കുന്നതിനാൽ പരാഗാണ് സീസണിലെ ആദ്യ മൂന്ന് കളികളിൽ റോയൽസിനെ നയിക്കുന്നത്.അസമിൽ നിന്ന് ഇന്ത്യക്കായി കളിച്ച ആദ്യ താരമായ റിയാൻ പരാഗ്, ഞായറാഴ്ച സൺറൈസേഴ്സ് ഹൈദരാബാദിനെതിരെ നടന്ന കളിയിൽ രാജസ്ഥാൻ റോയൽസിനെ നയിച്ചു കൊണ്ട് അസമിൽ നിന്നുള്ള ആദ്യ ഐപിഎൽ നായകനായും മാറിയിരുന്നു. രാജസ്ഥാൻ റോയൽസിന്റെ ക്യാപ്റ്റനാകുന്ന ഏഴാമത്തെ താരം കൂടിയാണ് പരാഗ് എന്നതും ശ്രദ്ധേയം. എന്നാൽ രാജസ്ഥാൻ റോയൽസ് ക്യാപ്റ്റനായി ഒരു വമ്പൻ നാണക്കേട് സ്വന്തമാക്കിയിരിക്കുകയാണ് ഇപ്പോൾ പരാഗ്.


രാജസ്ഥാൻ റോയൽസ് ക്യാപ്റ്റനായുള്ള ആദ്യ രണ്ട് കളികളിലും തോൽക്കുന്ന ആദ്യ നായകനെന്ന നാണക്കേടാണ് ഇപ്പോൾ റിയാൻ പരാഗിന്റെ പേരിലായിരിക്കുന്നത്. രാജസ്ഥാൻ റോയൽസിനെ നയിച്ചിട്ടുള്ള മറ്റ് കളിക്കാരെല്ലാം ആദ്യ രണ്ട് മത്സരങ്ങളിൽ ഒന്നിലെങ്കിലും ടീമിനെ വിജയത്തിലേക്ക് നയിച്ചിട്ടുണ്ട്. ഇതിൽ രാഹുൽ ദ്രാവിഡും സ്റ്റീവ് സ്മിത്തും രാജസ്ഥാൻ റോയൽസിനെ നയിച്ച ആദ്യ രണ്ട് കളികളിലും ടീമിന് വിജയം നേടിക്കൊടുത്തു. ഷെയ്ൻ വോൺ, ഷെയ്ൻ വാട്സൺ, അജിങ്ക്യ രഹാനെ, സഞ്ജു സാംസൺ എന്നിവർ ആദ്യ രണ്ട് കളികളിൽ ഒരു വിജയമാണ് ടീമിന് സമ്മാനിച്ചത്.

Also Read: സഞ്ജുവിന്റെ രാജസ്ഥാൻ റോയൽസിന് ഇരട്ട തലവേദന നൽകി ഇക്കാര്യം; ഈ മൂന്ന് താരങ്ങൾ ഫോമിലേക്ക് വന്നില്ലെങ്കിൽ തിരിച്ചടി

മാർച്ച് 30 ന് ചെന്നൈ സൂപ്പർ കിങ്സിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. ഈ കളിയിലും റിയാൻ പരാഗ് തന്നെയാകും ടീമിനെ നയിക്കുക. ഏപ്രിൽ അഞ്ചിന് പഞ്ചാബ് കിങ്സിന് എതിരെ നടക്കാനിരിക്കുന്ന മത്സരത്തിലാകും സഞ്ജു സാംസൺ രാജസ്ഥാൻ റോയൽസ് ക്യാപ്റ്റനായി തിരിച്ചെത്തുക. ഇതോടെ റിയാൻ പരാഗ് ടീമിന്റെ ഉപനായകനാകും.

അതേ സമയം സഞ്ജു സാംസണും ഷെയ്ൻ വോണുമാണ് രാജസ്ഥാൻ റോയൽസിനെ ഏറ്റവും കൂടുതൽ മത്സരങ്ങളിൽ വിജയത്തിലേക്ക് നയിച്ച ക്യാപ്റ്റന്മാർ. ഇവർക്ക് കീഴിൽ റോയൽസ് 31 മത്സരങ്ങളിൽ വിജയം നേടി. ഇതിൽ ഷെയ്ൻ വോൺ 2008 ൽ രാജസ്ഥാ‌ൻ റോയൽസിനെ ഐപിഎൽ കിരീടത്തിലേക്ക് നയിച്ചപ്പോൾ, സഞ്ജു 2022 ൽ ടീമിനെ ഫൈനലിൽ എത്തിച്ചു.

Also Read: രാജസ്ഥാ‌ൻ റോയൽസ് നടത്തിയ ആ പരീക്ഷണം വൻ ഫ്ലോപ്പായി; കട്ട കലിപ്പിൽ ആരാധകർ രംഗത്ത്, സഞ്ജുവിന്റെ ടീമിനെതിരെ വിമർശനം

2025 സീസണിലെ ആദ്യ രണ്ട് മത്സരങ്ങൾ കഴിയുമ്പോൾ പോയിന്റ് പട്ടികയിൽ അവസാന സ്ഥാനത്താണ് രാജസ്ഥാൻ റോയൽസ്. കളിച്ച രണ്ട് മത്സരങ്ങളും തോറ്റ ടീമിന്റെ നെറ്റ് റൺ റേറ്റ് -1.882 ആണ്.