റെഡ് ബുൾസിനെതിരെ ഇരട്ട ഗോൾ, പെനൽറ്റിയിൽനിന്ന് അല്ലാതെ നേടിയ ഗോളുകളിൽ ക്രിസ്റ്റ്യാനോയെ മറികടന്ന് ലയണൽ മെസ്സി

ന്യൂജഴ്സി (യുഎസ്എ) ∙ പെനൽറ്റിയിൽനിന്ന് അല്ലാതെ നേടിയ ഗോളുകളുടെ എണ്ണത്തിൽ ക്രിസ്റ്റ്യാനോ റൊണാൾഡോയെ മറികടന്ന് ലയണൽ മെസ്സി. യുഎസ് മേജർ ലീഗ് സോക്കറിൽ, ന്യൂയോർക്ക് റെഡ് ബുൾസിനെ 5–1ന് ഇന്റർ മയാമി തോൽപിച്ച മത്സരത്തിൽ നേടിയ 2 ഗോളുകളോടെയാണ് മുപ്പത്തിയെട്ടുകാരൻ മെസ്സി പുതുചരിത്രം കുറിച്ചത്.

പെനൽറ്റിയിൽനിന്ന് അല്ലാതെയുള്ള മെസ്സിയുടെ ഗോൾനേട്ടം 764 ആയി. ക്രിസ്റ്റ്യാനോയെക്കാൾ ഒരു ഗോൾ ലീഡ്. എന്നാൽ, കരിയറിലെ ആകെ ഗോളുകളുടെ എണ്ണത്തിൽ ക്രിസ്റ്റ്യാനോയാണ് ഒന്നാമത്; 1281 കളികളിൽ 938 ഗോളുകൾ. മെസ്സിക്ക് 1114 മത്സരങ്ങളിൽ 874 ഗോൾ.

ഇന്റർ മയാമിക്കായി കഴി‍ഞ്ഞ 7ൽ 6 കളികളിലും ഒന്നിലേറ ഗോളുകൾ നേടിയ മെസ്സി മികച്ച ഫോമിലാണിപ്പോൾ. സൗദി പ്രൊ ലീഗ് ക്ലബ് അൽ നസ്‌റിന്റെ താരമായ ക്രിസ്റ്റ്യാനോ റൊണാൾഡോ കളത്തിൽ സജീവമായതിനാൽ ഈ റെക്കോർഡ് ഇനിയും പലവട്ടം തിരുത്തപ്പെടാം.