‘ലൂണയ്ക്കു പകരക്കാരനെ കണ്ടെത്തുക എളുപ്പമല്ല; എനിക്കൊരു ‌ശൈലിയുണ്ട്, ആരാധകരെ തൃപ്തിപ്പെടുത്തും ’

കൊച്ചി ∙ തൃപ്പൂണിത്തുറയിലെ പുതിയ പരിശീലന ഗ്രൗണ്ടിന്റെ മനോഹാരിതയിൽ ഉല്ലസിച്ചിരിക്കുകയല്ല, കേരള ബ്ലാസ്റ്റേഴ്സിന്റെ സ്പാനിഷ് പരിശീലകൻ ദവീദ് കറ്റാല. അദ്ദേഹം തല പുകയ്ക്കുകയാണ്! കഴിഞ്ഞ ഐഎസ്എൽ സീസണു ശേഷം ടീമിന്റെ മുഖ്യ പരിശീലകനായെത്തിയ കറ്റാലയുടെ ആദ്യ ദൗത്യം സൂപ്പർ കപ്പായിരുന്നു. ട്രോഫി നേടാനായില്ലെങ്കിലും ടീം കളിച്ചതു ഭംഗിയുള്ള ഫുട്ബോൾ.

ഏറെ വൈകി ഇത്തവണ ഐഎസ്എൽ തുടങ്ങുമ്പോഴാകട്ടെ, അടിമുടി മാറിയ ടീമിനെ ചിട്ടപ്പെടുത്തുകയെന്ന ഭാരിച്ച ദൗത്യം. ഐഎസ്എൽ ഉദ്ഘാടന മത്സരത്തിൽ മോഹൻ ബഗാൻ സൂപ്പർ ജയന്റ്സാണു ബ്ലാസ്റ്റേഴ്സിന്റെ എതിരാളികൾ. മത്സരം 14നു കൊൽക്കത്തയിൽ. 12നു ടീം പുറപ്പെടാനിരിക്കെ, അദ്ദേഹം ‘മനോരമ സ്പോർട്സി’നോടു സംസാരിക്കുന്നു.

Qഅഡ്രിയൻ ലൂണ ഉൾപ്പെടെ വലിയ താരങ്ങൾ ടീം വിട്ടു. കളിയുടെ ശൈലി മാറുമോ?A പ്രധാന താരങ്ങളെ നഷ്ടമായെന്നതു ശരിയാണ്. എന്റെ ചിന്ത പക്ഷേ, നിലവിലുള്ള കളിക്കാരെ ഉപയോഗിച്ചു ടീം എങ്ങനെ മികച്ചതാക്കാമെന്നാണ്. അവരെല്ലാം ഉത്സാഹത്തോടെ കാത്തിരിക്കുകയാണ്. അവരുമായി ഒത്തിണങ്ങി മികച്ച പ്രകടനത്തിന് ഒരുക്കുകയാണ് എന്റെ ദൗത്യം. എനിക്കൊരു കേളീ ശൈലിയുണ്ട്. പക്ഷേ, ടീമിന്റെ മികച്ച പ്ര‌കടനത്തിന് ആവശ്യമാണെങ്കിൽ ശൈലി മാറ്റാനും തയാർ.