സഞ്ജു സാംസണിന് 24 ലക്ഷം രൂപ പിഴ വിധിച്ച് ബിസിസിഐ; തോൽവിക്ക് പിന്നാലെ രാജസ്ഥാൻ റോയൽസ് നായകന് മറ്റൊരു തിരിച്ചടി

Curated byഗോകുൽ എസ് | Samayam Malayalam | Updated: 10 Apr 2025, 11:33 am

Samayam Malayalamസഞ്ജു സാംസൺ

2025 സീസൺ ഇന്ത്യൻ പ്രീമിയർ ലീഗിൽ മൂന്നാം തോൽവി ഏറ്റുവാങ്ങിയിരിക്കുകയാണ് രാജസ്ഥാൻ റോയൽസ്. ഇന്നലെ ഗുജറാത്ത് ടൈറ്റൻസിന് എതിരെ നടന്ന മത്സരത്തിൽ 58 റൺസിന്റെ കനത്ത പരാജയമാണ് റോയൽസ് നേരിട്ടത്. തുടർച്ചയായ രണ്ട് കളികളിൽ വിജയിച്ചതിന് ശേഷമാണ്‌ രാജസ്ഥാൻ വീണ്ടും പരാജയത്തിലേക്ക് വീണിരിക്കുന്നത്.അതേ സമയം തോൽവിയുടെ നിരാശക്ക് പിന്നാലെ രാജസ്ഥാൻ റോയൽസ് നായകൻ സഞ്ജു സാംസണ് മറ്റൊരു തിരിച്ചടി കൂടി ലഭിച്ചു. രാജസ്ഥാൻ റോയൽസ് ഓവർ നിരക്കിൽ വീഴ്ച വരുത്തിയതാണ് സഞ്ജുവിന് പണി വാങ്ങിക്കൊടുത്തത്. അനുവദിച്ച സമയത്ത് 20 ഓവറുകൾ പൂർത്തിയാക്കുന്നതിൽ രാജസ്ഥാൻ റോയൽസ് പരാജയപ്പെട്ടതോടെ ക്യാപ്റ്റൻ സഞ്ജു സാംസണ് 24 ലക്ഷം രൂപയാണ് ബിസിസിഐ പിഴയിട്ടത്.


2025 സീസൺ ഐപിഎല്ലിൽ ഇത് രണ്ടാം തവണയാണ് രാജസ്ഥാൻ റോയൽസ് ഓവർ നിരക്കിൽ വീഴ്ച വരുത്തുന്നത്. ചെന്നൈ സൂപ്പർ കിങ്സിന് എതിരെയായിരുന്നു ആദ്യത്തേത്. അന്ന് ടീമിന്റെ താൽക്കാലിക ക്യാപ്റ്റനായ റിയാൻ പരാഗിന് 12 ലക്ഷം രൂപയായിരുന്നു പിഴ ഒടുക്കേണ്ടി വന്നത്.

Also Read: തോൽവിക്ക് ശേഷം അക്കാര്യം തുറന്ന് സമ്മതിച്ച് സഞ്ജു സാംസൺ; രാജസ്ഥാൻ റോയൽസി‌ന് തിരിച്ചടി നൽകിയത് ഇക്കാര്യ‌ങ്ങൾ

അതേ സമയം സഞ്ജു സാംസണ് മാത്രമല്ല ടീമിലെ മറ്റ് കളിക്കാർക്കും ഓവർ നിരക്കിലെ വീഴ്ചക്ക് പിഴ ഒടുക്കേണ്ടതായുണ്ട്. മാച്ച് ഫീയുടെ 25 ശതമാനമോ അല്ലെങ്കിൽ ആറ് ലക്ഷം രൂപയോ ആണ് ഇമ്പാക്ട് പ്ലേയർ അടക്കമുള്ള കളിക്കാർ പിഴയായി നൽകേണ്ടത്.

Also Read: റിയാൻ പരാഗിനെ തേഡ് അമ്പയർ ചതിച്ചു? നടന്നത് ഇങ്ങനെ; രാജസ്ഥാൻ റോയൽസിന്റെ കളിക്കിടെ നാടകീയ രംഗങ്ങൾ

കനത്ത പരാജയമായിരുന്നു ഗുജറാത്ത് ടൈറ്റൻസിന് എതിരെ രാജസ്ഥാൻ റോയൽസ് നേരിട്ടത്. മത്സരത്തിൽ ആദ്യം ബാറ്റ് ചെയ്ത ഗുജറാത്ത് നിശ്ചിത 20 ഓവറിൽ 217/6 എന്ന കിടിലൻ സ്കോർ നേടിയപ്പോൾ, രാജസ്ഥാൻ റോയൽസിന്റെ മറുപടി 159 ൽ അവസാനിച്ചു. സീസണിലെ അഞ്ച് മത്സരങ്ങൾ കളിച്ചുകഴിയുമ്പോൾ പോയിന്റ് പട്ടികയിൽ ഏഴാം സ്ഥാനത്താണ് രാജസ്ഥാൻ റോയൽസ്. അഞ്ച് കളികളിൽ നിന്ന് നാല് പോയിന്റ് മാത്രമാണ് അവരുടെ സമ്പാദ്യം. ഈ മാസം 13 ന് കരുത്തരായ റോയൽ ചലഞ്ചേഴ്സ് ബംഗളൂരിന് എതിരെയാണ് റോയൽസിന്റെ അടുത്ത മത്സരം