സഞ്ജു സാംസണിന്റെ തിരിച്ചുവരവ്, സുപ്രധാന സൂചന പുറത്ത്; രാജസ്ഥാൻ റോയൽസ് ആരാധകർ കാത്തിരിക്കുന്ന വാർത്ത

Curated byഗോകുൽ എസ് | Samayam Malayalam | Updated: 5 May 2025, 5:47 am

2025 സീസൺ ഇന്ത്യൻ പ്രീമിയർ ലീഗിലെ ( IPL 2025 ) മോശം ഫോം തുടർന്നിരിക്കുകയാണ് രാജസ്ഥാൻ റോയൽസ്. ഞായറാഴ്ച വൈകിട്ട് നടന്ന മത്സരത്തിൽ കൊൽക്കത്ത നൈറ്റ് റൈഡേഴ്സിനോട് ഒരു റൺസിന്റെ പരാജയമാണ് റോയൽസ് നേരിട്ടത്. മത്സരത്തിൽ ആദ്യം ബാറ്റ് ചെയ്ത കെകെആർ നിശ്ചിത 20 ഓവറുകളിൽ 206/4 എന്ന സ്കോർ നേടിയപ്പോൾ, രാജസ്ഥാന്റെ മറുപടി 205/8 ൽ അവസാനിച്ചു. സീസണിലെ 12 മത് കളിയിൽ റോയൽസ് തോൽവി നേരിടുന്ന ഒൻപതാമത്തെ മത്സരമാണ് ഇത്.

ഈ മാസം 12 ന് ചെന്നൈ സൂപ്പർ കിങ്സിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. ചെന്നൈയുടെ ഹോം ഗ്രൗണ്ടായ ചെപ്പോക്കിലാണ് ഈ കളി നടക്കുക. പരിക്കിനെ തുടർന്ന് കഴിഞ്ഞ കുറച്ച് മത്സരങ്ങളായി പുറത്തിരിക്കുന്ന മലയാളി സൂപ്പർ താരം സഞ്ജു സാംസൺ, ഈ മത്സരത്തിൽ ടീമിന്റെ ക്യാപ്റ്റനായി തിരിച്ചെത്തുമെന്നാണ്‌ സൂചനകൾ. ദയനീയ ഫോമിലൂടെ കടന്നുപോകുന്ന റോയൽസിന് വളരെയധികം ആശ്വാസം നൽകുന്ന കാര്യമായിരിക്കും ഇത്. റെവ്സ്പോർട്സാണ് ഇക്കാര്യത്തിൽ സൂചനകൾ പുറത്തുവിട്ടത്.

നേരത്തെ ഡെൽഹി ക്യാപിറ്റൽസിന് എതിരായ കളിയിൽ ബാറ്റ് ചെയ്യുന്നതിനിടെയായിരുന്നു സഞ്ജു സാംസണ് പരിക്കേറ്റത്. ഇതേ തുടർന്ന് അന്ന് ബാറ്റിങ്ങിനിടെ റിട്ടയേഡ് ഹർട്ടായ താരം പിന്നീട് ഇതു വരെ കളിക്കാൻ ഇറങ്ങിയിട്ടില്ല. കഴിഞ്ഞ അഞ്ച് കളികളും താരം പുറത്തിരുന്നു. ഈ കളികളിൽ ആകെ ഒരെണ്ണത്തിൽ മാത്രമാണ് അവർക്ക് വിജയിക്കാനായത്.

സഞ്ജുവിന്റെ അഭാവം ഈ കളികളിൽ ടീമിന്റെ കരുത്തിനെ ബാധിച്ചു. സഞ്ജുവിന് പകരം ടീമിന്റെ നായക സ്ഥാനം ഏറ്റെടുത്ത റിയാൻ പരാഗിനാകട്ടെ പ്രതീക്ഷിച്ച മികവിലേക്ക് ടീമിനെ നയിക്കാനായില്ല. അദ്ദേഹത്തിന്റെ ക്യാപ്റ്റൻസി പലപ്പോളും അബദ്ധ തീരുമാനങ്ങളാൽ നിറഞ്ഞുനിന്നു. സഹതാരങ്ങളെ പ്രചോദിപ്പിക്കുന്ന കാര്യത്തിലും പരാഗിന് മികവുകാട്ടാനായില്ല.

അടുത്ത കളിയിൽ രാജസ്ഥാൻ റോയൽസ് ടീമിൽ നിർണായക മാറ്റം വരും? വിദേശ താരം പുറത്തായേക്കും, രണ്ടും കൽപ്പിച്ച് പിങ്ക് പട
അതേ സമയം സഞ്ജു സാംസണെ സംബന്ധിച്ച് നിരാശാജനകമായ ഒരു സീസൺ തന്നെയാണ് 2025 ലേത്‌. ഫിറ്റ്നസ് പ്രശ്നങ്ങളെത്തുടർന്ന് സീസണിലെ ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായിട്ടാണ് താരം കളിച്ചത്. സീസണിൽ ആകെ ഏഴ് മത്സരങ്ങളിൽ രാജസ്ഥാൻ റോയൽസ് ജേഴ്സിയണിഞ്ഞ സഞ്ജു 37.33 ബാറ്റിങ്‌ ശരാശരിയിൽ 224 റൺസാണ് നേടിയത്.

രാജസ്ഥാൻ റോയൽസ് - കൊൽക്കത്ത നൈറ്റ് റൈഡേഴ്സ് മത്സരം ഇങ്ങനെ: സീസണിലെ 12 മത് മത്സരത്തിൽ കൊൽക്കത്ത നൈറ്റ് റൈഡേഴ്സിനോട് ഒരു റൺസിന്റെ തോൽവിയാണ് രാജസ്ഥാൻ റോയൽസ് ഏറ്റുവാങ്ങിയത്. മത്സരത്തിൽ ആദ്യം ബാറ്റ് ചെയ്ത കെകെആർ 206/4 എന്ന കൂറ്റൻ സ്കോറാണ് നേടിയത്. 25 പന്തിൽ 57 റൺസ് നേടി പുറത്താകാതെ നിന്ന ആന്ദ്രെ റസലാണ് കളിയിലെ കേമൻ‌. രഘുവംശി 44 റൺസും, അജിങ്ക്യ രഹാനെ 30 റൺസും നേടി.

സഞ്ജു ഏകദിന ടീമില്‍ തിരിച്ചെത്തിയേക്കും, ഇത് സുവര്‍ണാവസരം; 2027 ലോകകപ്പ് വരെ തുടരാന്‍ സന്നദ്ധരായി രോഹിതും കോഹ്‌ലിയും
കൂറ്റൻ വിജയലക്ഷ്യം പിന്തുടർന്ന രാജസ്ഥാൻ റോയൽസ് റിയാൻ പരാഗിന്റെ നേതൃത്വത്തിൽ ജയത്തിന് അരികെ വരെ എത്തിയെങ്കിലും ഒരു റൺസിന്റെ അകലത്തിൽ വീണു. പരാഗ് തന്നെയാണ് റോയൽസിന്റെ ടോപ് സ്കോറർ. 45 പന്തുകളിൽ ആറ് ഫോറുകളും എട്ട് സിക്സറുകളും അടക്കം 95 റൺസായിരുന്നു പരാഗ് നേടിയത്. യശസ്വി ജയ്സ്വാൾ 21 പന്തിൽ 34 റൺസ് നേടി. അവസാന ഓവറുകളിൽ 14 പന്തിൽ 25 റൺസെടുത്ത് ശുഭം ദുബെ പൊരുതിയെങ്കിലും വിജയം പക്ഷേ അകന്നുനിന്നു.