സഞ്ജു സാംസണ്‍ മികച്ച ക്യാപ്റ്റനും ബാറ്റ്‌സ്മാനും; അദ്ദേഹത്തിന്റെ അഭാവം ആര്‍ആറിനെ തളര്‍ത്തിയെന്ന് ടീമംഗം സന്ദീപ് ശര്‍മ

Authored byനിഷാദ് അമീന്‍ | Samayam Malayalam | Updated: 25 Apr 2025, 5:09 pm

ഐപിഎല്ലിന്റെ ചരിത്രത്തിലെ ഏറ്റവും ദയനീയമായ പ്രകടനമാണ് രാജസ്ഥാന്‍ റോയല്‍സ് (Rajasthan Royals) 2025 സീസണില്‍ (IPL 2025) കാഴ്ചവച്ചത്. ഒമ്പത് മല്‍സരങ്ങളില്‍ ഏഴിലും പരാജയപ്പെട്ട അവര്‍ എട്ടാം സ്ഥാനത്താണ്. കഴിഞ്ഞ ദിവസം തുടര്‍ച്ചയായ അഞ്ചാം തോല്‍വി വഴങ്ങിയതോടെ പ്ലേ ഓഫ് പ്രതീക്ഷകള്‍ ഏതാണ്ട് അസ്തമിച്ചുകഴിഞ്ഞു. സീസണിന്റെ തുടക്കം മുതല്‍ പരിക്കിന്റെ പിടിയിലായ ക്യാപ്റ്റന്‍ സഞ്ജു സാംസണിന്റെ (Sanju Samson) സേവനം വേണ്ടവിധത്തില്‍ അവര്‍ക്ക് ലഭിച്ചില്ല. കഴിഞ്ഞ സീസണില്‍ മികച്ച പ്രകടനം നടത്തിയ ജോസ് ബട്‌ലറെ പോലുള്ള താരങ്ങളെ നിലനിര്‍ത്താത്തതും ലേലത്തില്‍ അവര്‍ക്ക് പകരംവയ്ക്കാവുന്ന താരങ്ങളെ കണ്ടെത്താത്തതും തിരിച്ചടികള്‍ക്ക് കാരണമായി. മികച്ച താരങ്ങളെ കൈവിട്ട ആര്‍ആറിന്റെ നടപടിയില്‍ സഞ്ജുവും നിരാശ തുറന്നു പ്രകടിപ്പിച്ചിരുന്നു.


കഴിഞ്ഞ ദിവസം റോയല്‍ ചാലഞ്ചേഴ്‌സ് ബെംഗളൂരുവിനോട് അവസാന ഓവറില്‍ 11 റണ്‍സിന് കീഴടങ്ങി. സീസണില്‍ ഇത് മൂന്നാം തവണയാണ് അവസാന ഓവറില്‍ ആര്‍ആര്‍ തോല്‍വി സമ്മതിക്കുന്നത്. നേരത്തേ ഹോം മാച്ചില്‍ ആര്‍സിബിയോട് ഒമ്പത് വിക്കറ്റിനും തോറ്റിരുന്നു. ബാറ്റര്‍മാരുടെ പരാജയവും നിര്‍ണായക ക്യാച്ചുകള്‍ നഷ്ടപ്പെടുത്തിയതുമാണ് ഇത്തവണ തോല്‍വിക്ക് കാരണം.

ഇംഗ്ലണ്ടിനെതിരായ ടി20 മല്‍സരത്തില്‍ ബാറ്റിങിനിടെ പന്ത് തട്ടി വിരലിന് പൊട്ടലുണ്ടായതിനെ തുടര്‍ന്ന് സഞ്ജു ശസ്ത്രക്രിയക്ക് വിധേയനായിരുന്നു. ഇത് കാരണം ഐപിഎല്ലിലെ ആദ്യ മൂന്ന് മാച്ചുകളില്‍ ഫീല്‍ഡ് ചെയ്യാന്‍ അനുമതി ലഭിക്കാത്തിനാല്‍ സഞ്ജുവിന് വിക്കറ്റ് കീപ്പര്‍ ഗ്ലൗസ് അണിയാനായില്ല. ഈ മാച്ചുകളില്‍ ബാറ്റ്‌സ്മാന്‍ ആയി മാത്രം കളിച്ച സഞ്ജുവിന് ക്യാപ്റ്റന്‍ സ്ഥാനം റിയാന്‍ പരാഗിനെ ഏല്‍പ്പിക്കേണ്ടി വന്നു.

ഒത്തുകളി ആരോപണത്തിന് പിന്നിലെ ഞെട്ടിക്കുന്ന കാരണം വെളിപ്പെടുത്തി രാജസ്ഥാന്‍ റോയല്‍സ്; മുഖ്യമന്ത്രിക്ക് പരാതി നല്‍കി
സഞ്ജു ക്യാപ്റ്റനായി തിരിച്ചെത്തിയ ആദ്യ മല്‍സരത്തില്‍ ആര്‍ആര്‍ വിജയം നേടിയിരുന്നു. സീസണില്‍ ഒമ്പത് മാച്ചുകളില്‍ രണ്ട് ജയം മാത്രമാണുള്ളത്. റിയാന്‍ നയിച്ച മൂന്നാം മാച്ചിലായിരുന്നു മറ്റൊരു ജയം. ഏഴാം മാച്ചില്‍ ഡല്‍ഹി ക്യാപിറ്റല്‍സിനെതിരേ മികച്ച ബാറ്റിങ് നടത്തുന്നതിനിടെ സഞ്ജുവിന് പരിക്കേറ്റ് കളംവിടേണ്ടിവന്നു. സമനിലയില്‍ അവസാനിച്ച ഈ മാച്ചില്‍ സൂപ്പര്‍ ഓവറില്‍ ഡിസി ജയിച്ചുകയറി. എട്ടാമത്തേയും ഒമ്പതാമത്തേയും മാച്ചുകളില്‍ സഞ്ജു കളിച്ചിരുന്നില്ല. ഇനി അഞ്ച് മല്‍സരങ്ങള്‍ മാത്രമാണ് ശേഷിക്കുന്നത്.

അഞ്ച് മാച്ചുകളില്‍ സഞ്ജുവിന് പകരം റിയാന്‍ ആയിരുന്നു നായകന്‍. സൈഡ് സ്‌ട്രെയില്‍ കാരണം ബുദ്ധിമുട്ടുന്ന സഞ്ജു ഇനി എപ്പോള്‍ തിരിച്ചെത്തുമെന്ന കാര്യം ആര്‍ആര്‍ സ്ഥിരീകരിച്ചിട്ടില്ല. ഈ സീസണില്‍ ഏഴ് മത്സരങ്ങള്‍ മാത്രമാണ് സഞ്ജു കളിച്ചത്.

സഞ്ജുവിന് ഒളിമ്പിക്‌സ് മെഡല്‍ നേടാന്‍ സുവര്‍ണാവസരം...! 2028 ഒളിമ്പിക്‌സില്‍ ടി20 ക്രിക്കറ്റും; ഉള്‍പ്പെടുത്തിയത് 128 വര്‍ഷങ്ങള്‍ക്ക് ശേഷം
സഞ്ജുവിന്റെ സേവനം വേണ്ടവിധത്തില്‍ ലഭിക്കാത്തത് ടീമിനെ തളര്‍ത്തിയെന്ന് പേസര്‍ സന്ദീപ് ശര്‍മ ചൂണ്ടിക്കാട്ടി. സഞ്ജു വളരെ പരിചയസമ്പന്നനായ ക്യാപ്റ്റനും കളിക്കാരനുമാണ്. ഒരു ബാറ്റ്‌സ്മാന്‍ എന്ന നിലയില്‍ അദ്ദേഹം വളരെ മിടുക്കനാണ്. അതിനാല്‍ അദ്ദേഹത്തിന്റെ അഭാവം തീര്‍ച്ചയായും അനുഭവപ്പെട്ടു- മത്സരത്തിന് ശേഷമുള്ള പത്രസമ്മേളനത്തില്‍ സന്ദീപ് പറഞ്ഞു.

'ആദ്യ മൂന്ന് മത്സരങ്ങളില്‍ അദ്ദേഹം ക്യാപ്റ്റനായിരുന്നില്ല. അതിനുശേഷം അദ്ദേഹത്തിന് സൈഡ് ഇന്‍ജുറി കാരണം വീണ്ടും കളിക്കാന്‍ സാധിക്കാതെ വന്നു. വ്യക്തമായും, ഇതെല്ലാം ഞങ്ങള്‍ക്ക് നഷ്ടമുണ്ടാക്കുന്നു. ഇതെല്ലാം ഒത്തുചേര്‍ന്ന് ടീമിനെ തളര്‍ത്തുകയാണ്- സന്ദീപ് കൂട്ടിച്ചേര്‍ത്തു.

പ്ലെയിങ് ഇലവനിലേക്കുള്ള സഞ്ജുവിന്റെ തിരിച്ചുവരവിന് വ്യക്തമായ സമയപരിധി ഇപ്പോള്‍ പറയാനാവില്ലെന്നാണ് കഴിഞ്ഞ മാച്ചിന് മുമ്പ് റിയാന്‍ പരാഗ് പറഞ്ഞത്. പോയിന്റ് പട്ടികയില്‍ ഒന്നാം സ്ഥാനത്തുള്ള ഗുജറാത്ത് ടൈറ്റന്‍സിനെയാണ് അടുത്ത മാച്ചില്‍ ആര്‍ആറിന് നേരിടാനുള്ളത്.