സഞ്ജു സാംസൺ ഇന്ത്യൻ ടീമിൽനിന്നു പുറത്ത്; പകരം വിക്കറ്റ് കീപ്പറായി പഞ്ചാബ് താരം, വൈഭവ് സൂര്യവംശിയും ടീമിൽ

മുംബൈ ∙ ഇന്ത്യയുടെ ട്വന്റി20 ടീമിൽനിന്ന് മലയാളി താരം സഞ്ജു സാംസൺ പുറത്ത്. സിംബാബ്‌വെയ്‌ക്കെതിരായ ട്വന്റി20 പരമ്പരയ്ക്കുള്ള ഇന്ത്യൻ ടീമിനെ പ്രഖ്യാപിച്ചപ്പോഴാണ് സഞ്ജു സാംസണെ ഒഴിവാക്കിയത്. ഇംഗ്ലണ്ടിനെതിരെ ഇപ്പോൾ നടക്കുന്ന ട്വന്റി20 പരമ്പരയിൽ സഞ്ജു ഉണ്ടെങ്കിലും രണ്ടാമത്തെ മത്സരത്തിൽ പ്ലേയിങ് ഇലവനിൽനിന്ന് ഒഴിവാക്കിയിരുന്നു. ഇതിനു പിന്നാലെയാണ് ഇപ്പോൾ ടീമിൽനിന്നു പുറത്താകുന്നത്. ജൂലൈ 23 മുതൽ 26 വരെ നടക്കുന്ന സിംബാബ്‌വെക്കെതിരായ ട്വന്റി20 പരമ്പരയിൽ ഇഷാൻ കിഷനാണ് ഇന്ത്യയുടെ പ്രധാന വിക്കറ്റ് കീപ്പർ. ബാക്അപ് വിക്കറ്റ് കീപ്പറായി പഞ്ചാബ് താരം പ്രഭ്സിമ്രാൻ സിങ്ങിനെ ടീമിലുൾപ്പെടുത്തി. പ്രഭ്സിമ്രാൻ ആദ്യമായാണ് ഇന്ത്യൻ ടീമിലെത്തുന്നത്. ഇംഗ്ലണ്ടിനെതിരെ അരങ്ങേറ്റം കുറിച്ച വൈഭവ് സൂര്യവംശി ഓപ്പണറായി ടീമിലുണ്ട്.

ഗു‌ജറാത്ത് ടൈറ്റൻസ് പേസർ അശോക് ശർമ, യഷ് ഠാക്കൂർ, ഹർഷ് ദുബെ എന്നിവർക്കും ട്വന്റി20 ടീമിലേക്ക് ആദ്യമായി വിളിയെത്തി. അയർലൻഡ്, ഇംഗ്ലണ്ട് പര്യടനങ്ങളിൽ ഒഴിവാക്കിയ ലോകകപ്പ് താരം റിങ്കു സിങ്, പേസർ മായങ്ക് യാദവ് എന്നിവർ ടീമിലേക്ക് മടങ്ങിയെത്തി. 2024നു ശേഷം ആദ്യമായാണ് മയാങ്ക് ടീമിലേക്ക് എത്തുന്നത്.

മുതിർന്ന കളിക്കാർക്ക് വിശ്രമം നൽകി പുതിയ കളിക്കാരെ പരീക്ഷിക്കുകയാണ് സിംബാബ്‍വെ പര്യടനങ്ങളിൽ പതിവ്. എന്നാൽ ടീമിൽ ഇടം നേടാനാകാത്ത ഒരേയൊരു സീനിയർ ബാറ്റർ സഞ്ജു സാംസൺ മാത്രമാണ്. 2024 ട്വന്റി20 ലോകകപ്പിനു പിന്നാലെ ഇന്ത്യൻ ടീമിൽ തുടർച്ചയായ കളിക്കുന്ന സഞ്ജു സാംസൺ രണ്ടു വർഷത്തിനു ശേഷമാണ് ടീമിൽനിന്നു പുറത്താകുന്നത്. 2026 ട്വന്റി20 ലോകപ്പിൽ പ്ലെയർ ഓഫ് ദ് ടൂർണമെന്റായ സഞ്ജു, അയർലൻഡ് പര്യടനത്തിലും, ഇംഗ്ലണ്ടിനെതിരായ ആദ്യ ട്വന്റി20യിലും പരാജയപ്പെട്ടിരുന്നു. 5,0,1 എന്നിങ്ങനെയായിരുന്നു സഞ്ജുവിന്റെ സ്കോർ.

ഇംഗ്ലണ്ടിനെതിരെയുള്ള ട്വന്റി20 പരമ്പരയിൽ കളിക്കുന്ന ക്യാപ്റ്റൻ ശ്രേയസ്സ് അയ്യർ, അഭിഷേക് ശർമ, തിലക് വർമ, ശിവം ദുബെ എന്നിവരെല്ലാം ടീമിലിടം നേടിയിട്ടുണ്ട്. ബോളിങ് നിരയിൽ, ചില സ്ഥിരം താരങ്ങളെ ഒഴിവാക്കിയിട്ടുണ്ട്. അർഷ്ദീപ് സിങ്, അക്ഷർ പട്ടേൽ, ഹർഷിത് റാണ, രവി ബിഷ്‌ണോയ് എന്നിവർ പുറത്തായപ്പോൾ ഇവർക്കു പകരമാണ് യഷ് ഠാക്കൂർ, അശോക് ശർമ, മയാങ്ക് യാദവ് എന്നിവർ ടീമിലെത്തിയത്. ഇംഗ്ലണ്ടിനെതിരെയുള്ള ഏകദിന പരമ്പരയ്ക്കുള്ള ഇന്ത്യൻ ടീമിൽ, നിതീഷ് കുമാർ റെഡ്ഡിക്ക് പകരം ശിവം ദുബെയെ ഉൾപ്പെടുത്തി.

സിംബാബ്‌വെ പരമ്പരയ്ക്കുള്ള ഇന്ത്യൻ ടീം: ശ്രേയസ് അയ്യർ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ, തിലക് വർമ (വൈസ് ക്യാപ്റ്റൻ), ഇഷാൻ കിഷൻ (വിക്കറ്റ് കീപ്പർ), ശിവം ദുബെ, സൂര്യൻഷ് ഷെഡ്ഗെ, റിങ്കു സിങ്, ഹർഷ് ദുബെ, വരുൺ ചക്രവർത്തി, പ്രിൻസ് യാദവ്, യഷ് ഠാക്കൂർ, അശോക് ശർമ, മായങ്ക് യാദവ്, പ്രഭ്സിമ്രാൻ സിങ് (വിക്കറ്റ് കീപ്പർ).

ഇംഗ്ലണ്ടിനെതിരെ ഇന്ത്യയുടെ പുതുക്കിയ ഏകദിന ടീം: ശുഭ്മാൻ ഗിൽ (ക്യാപ്റ്റൻ), രോഹിത് ശർമ, വിരാട് കോലി, ശ്രേയസ് അയ്യർ (വൈസ് ക്യാപ്റ്റൻ), കെ.എൽ. രാഹുൽ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), വാഷിങ്ടൻ സുന്ദർ, അക്ഷർ പട്ടേൽ, കുൽദീപ് യാദവ്, ജസ്പ്രീത് ബുമ്ര, പ്രസിദ്ധ് കൃഷ്ണ, ഹർഷിത് റാണ, അർഷ്ദീപ് സിങ്, ഗുർനൂർ ബ്രാർ, ശിവം ദുബെ.