സഞ്ജുവിന് അനുകൂലം ഈ കണക്കുകൾ; ഇന്നും തോറ്റാൽ രാജസ്ഥാൻ റോയൽസ് പിന്നെ നോക്കേണ്ട, ജീവൻ മരണ പോരാട്ടം ലക്നൗവിനെതിരെ

Authored byലിജിൻ കടുക്കാരം | Samayam Malayalam | Updated: 19 Apr 2025, 9:09 am

ജയ്പുർ: ഐപിഎല്ലില്‍ 18ാം സീസണിൽ സഞ്ജു സാംസണിന്‍റെ രാജസ്ഥാന്‍ റോയല്‍സിന് ഇന്ന് ജീവൻമരണ പോരാട്ടം. പോയൻ്റ് പട്ടികയിൽ അഞ്ചാം സ്ഥാനത്തുള്ള ലക്നൗ സൂപ്പര്‍ ജയന്‍റ്സാണ് എതിരാളികൾ. പ്ലേ ഓഫ് സാധ്യതകൾ നിലനിർത്തണമെങ്കിൽ ഇന്നത്തെ മത്സരം രാജസ്ഥാന് ജയിച്ചേ മതിയാകൂ. സീസണിൽ ആദ്യ ഏഴ് കളികളില്‍ രണ്ട് ജയം മാത്രമുള്ള രാജസ്ഥാന്‍ പോയന്‍റ് പട്ടികയില്‍ എട്ടാം സ്ഥാനത്താണ്. നാല് ജയം നേടിയ ലക്നൗ പട്ടികയിൽ അഞ്ചാമതും. ഇന്നത്തെ മത്സരത്തിനിറങ്ങുമ്പോൾ രാജസ്ഥാന് അനുകൂലം കടലാസിലെ കണക്കുകളാണ്.ഐപിഎൽ ചരിത്രത്തിൽ ഇതുവരെ അഞ്ച് തവണയാണ് ലക്നൗ സൂപ്പര്‍ ജയൻ്റ്സും രാജസ്ഥാൻ റോയൽസും ഏറ്റുമുട്ടിയിട്ടുള്ളത്. ഇതിൽ നാല് തവണയും ജയം രാജസ്ഥാന് ഒപ്പമായിരുന്നു. ഒരു തവണ മാത്രമേ ലക്നൗവിന് ജയിക്കാൻ കഴിഞ്ഞിട്ടുള്ളു. ലക്നൗവിനെതിരായ ഈ ആധിപത്യം ഇന്നത്തെ മത്സരത്തിലും രാജസ്ഥാന് തുടരാൻ കഴിയുമോയെന്നാണ് ആരാധകർ ഉറ്റുനോക്കുന്നത്.
സഞ്ജുവുമായി ഭിന്നതയുണ്ടോ? തുറന്ന് പറഞ്ഞ് രാജസ്ഥാന്‍ റോയല്‍സ് കോച്ച് രാഹുല്‍ ദ്രാവിഡ്
നിലവിൽ വലിയ തകർച്ചയെയാണ് സഞ്ജുവിൻ്റെ രാജസ്ഥാൻ അഭിമുഖീകരിക്കുന്നത്. ഡൽഹിക്കെതിരായ കഴിഞ്ഞ മത്സരത്തിൽ സൂപ്പർ ഓവറിലായിരുന്നു രാജസ്ഥാൻ പരാജയപ്പെട്ടത്. കഴിഞ്ഞ സീസണില്‍ ആദ്യ ഏഴ് കളികളില്‍ ആറിലും ജയിച്ച രാജസ്ഥാന്‍ ഇത്തവണ ആദ്യ ഏഴ് കളികളില്‍ അഞ്ചിലും തോറ്റു. അവശേഷിക്കുന്ന ഏഴ് മത്സരങ്ങളും ജയിച്ചാല്‍ മാത്രമേ രാജസ്ഥാന് പ്ലേ ഓഫ് ഉറപ്പിക്കാനാകൂ.

ഇനി അവേശഷിക്കുന്ന മത്സരങ്ങളിലെ ഓരോ തോൽവിയും രാജസ്ഥാന് പ്ലേ ഓഫിൽ നിന്ന് പുറത്തേക്കുള്ള വഴി കാണിക്കുമെന്നതിനാൽ ജയത്തിൽ കുറഞ്ഞതൊന്നും രാജസ്ഥാൻ്റെ ചിന്തയിൽ പോലും ഉണ്ടാകില്ല. ജയ്പൂരിലെ സവായ്മാന്‍സിങ് സ്റ്റേഡിയത്തിൽ രാത്രി 7:30നാണ് മത്സരം. തുടര്‍ച്ചയായി മൂന്ന് മത്സരങ്ങളിലെ തോൽവിയും സഞ്ജു സാംസണിൻ്റെ പരിക്കുമെല്ലാം ആരാധകരെ കനത്ത നിരാശയിലാഴ്ത്തിയിട്ടുണ്ട്. സഞ്ജു ഇന്ന് കളിക്കുമോയെന്നതിലും ആശങ്ക ബാക്കിയാണ്.
ലക്‌നൗവിനെ നേരിടാൻ സഞ്ജു ഉണ്ടാകുമോ; എൽഎസ്ജി - ആർആർ മത്സരത്തിൽ റോയൽസ് നേരിടുന്ന പ്രധാനവെല്ലുവിളികൾ
യശസ്വി ജയ്സ്വാള്‍ ഫോമിലേക്ക് മടങ്ങിയെത്തിയതും നിതീഷ് റാണയുടെ ഫോമുമാണ് രാജസ്ഥാന് പ്രതീക്ഷ നൽകുന്ന ഘടകങ്ങൾ. റിയാന്‍ പരാഗിന്‍റെയും മധ്യനിരയുടെയും മോശം പ്രകടനം ഇപ്പോഴും തലവേദനയായി തുടരുകയാണ്. മറുവശത്ത് കളിച്ച ഏഴ് കളികളില്‍ മൂന്നിലും 200 റണ്‍സിലേറെ നേടിയ ടീമാണ് ലക്നൗ. കഴിഞ്ഞ മത്സരത്തില്‍ ചെന്നൈയോട് തോറ്റെങ്കിലും ഏഴ് കളികളില്‍ നാലു ജയം നേടി. നിക്കോളാസ് പുരാനും മിച്ചല്‍ മാര്‍ഷും നടത്തുന്ന വെടിക്കെട്ട് തന്നെയാണ് ടീമിൻ്റെ പ്രധാന ബലം.