സഞ്ജുവിന്റെ രാജസ്ഥാൻ റോയൽസിന് പുതിയ തിരിച്ചടി; അവസാന കളികളിൽ ആ രണ്ട് പേരും ടീമിനൊപ്പം കാണില്ല

Curated byഗോകുൽ എസ് | Samayam Malayalam | Updated: 14 May 2025, 12:42 am

2025 സീസൺ ഇന്ത്യൻ പ്രീമിയർ ലീഗിൽ നിരാശാജനകമായ പ്രകടനമാണ് രാജസ്ഥാൻ റോയൽസിന്റേത്. ആദ്യ 12 മത്സരങ്ങളിൽ മൂന്ന് കളികളിൽ മാത്രം വിജയിക്കാനായ അവർ, പോയിന്റ് പട്ടികയിൽ ഒൻപതാം സ്ഥാനത്താണ്. നിലവിൽ പ്ലേ ഓഫിലെത്താതെ പുറത്തായിക്കഴിഞ്ഞ മൂന്ന് ടീമുകളിൽ ഒന്നുകൂടിയാണ് റോയൽസ്. ഇന്ത്യ - പാക് സംഘർഷങ്ങളുടെ പശ്ചാത്തലത്തിൽ നിർത്തിവെച്ചിരിക്കുന്ന 2025 സീസൺ ഐപിഎല്ലിൽ ഇനി രണ്ട് മത്സരങ്ങൾ കൂടിയാണ് രാജസ്ഥാൻ റോയൽസിന് ബാക്കിയുള്ളത്. ഈ കളികളിൽ വിജയം നേടി മികച്ച രീതിയിൽ സീസൺ അവസാനിപ്പിക്കുക യാണ് ഇനി ടീമിന്റെ ലക്ഷ്യം. ഐപിഎല്ലിലെ പുതുക്കിയ ഫിക്സ്ചർ പ്രകാരം രാജസ്ഥാൻ റോയൽസിന്റെ അടുത്ത മത്സരം ഈ മാസം 18 ന് പഞ്ചാബ് കിങ്സിന് എതിരെയാണ്. ഇപ്പോളിതാ ഈ കളിക്ക് മുൻപ് ടീമിന് ആശങ്ക സമ്മാനിക്കുന്ന വാർത്തകളാണ് പുറത്തുവരുന്നത്.


നിലവിൽ നാട്ടിലുള്ള വെസ്റ്റിൻഡീസ് താരം ഷിംറോൺ ഹെറ്റ്മെയർ രാജസ്ഥാൻ റോയൽസിന്റെ അവസാന രണ്ട് മത്സരങ്ങൾക്കായി ഇന്ത്യയിലേക്ക് തിരിച്ചെത്തിയേക്കില്ലെന്നാണ് റിപ്പോർട്ട്. ഇതിന് പുറമെ ടീമിന്റെ ബൗളിങ് പരിശീലകനായ ഷെയിൻ ബോണ്ടും അവസാന മത്സരങ്ങൾക്കായി ഇന്ത്യയിലേക്ക് തിരിച്ചെത്താൻ സാധ്യത കുറവാണെന്ന് റിപ്പോർട്ടുകൾ സൂചിപ്പിക്കുന്നു. ഹെറ്റ്മെയർ തിരിച്ചെത്തിയില്ലെങ്കിൽ രാജസ്ഥാൻ റോയൽസിന്റെ ബാറ്റിങ് കരുത്ത് കുറയുമെന്ന കാര്യം ഉറപ്പ്.

ഐപിഎല്‍ 2025 മെയ് 17ന് പുനരാരംഭിക്കും; ഫൈനല്‍ ജൂണ്‍ മൂന്നിന്
2025 സീസൺ ഐപിഎല്ലിന് മുൻപ് നടന്ന മെഗാ താരലേലത്തിൽ രാജസ്ഥാൻ റോയൽസ് ടീമിൽ നിലനിർത്തിയ താരമാണ് ഷിംറോൺ ഹെറ്റ്മെയർ. 11 കോടി രൂപക്കായിരുന്നു വിൻഡീസ് വെടിക്കെട്ട് ബാറ്ററെ അവർ റിട്ടെയിൻ ചെയ്തത്. എന്നാൽ വലിയ പ്രതീക്ഷകളോടെ എത്തിയ ഹെറ്റി 2025 സീസണിൽ വൻ ഫ്ലോപ്പായി. 12 കളികളിൽ നിന്ന് 21.60 ബാറ്റിങ് ശരാശരിയിൽ 216 റൺസ് മാത്രമാണ് ഈ ഇടം കൈയ്യൻ ബാറ്റർക്ക് ഇക്കുറി നേടാനായത്.

2025 സീസണിൽ രാജസ്ഥാൻ റോയൽസിന് ഒപ്പമുള്ള എക വിദേശ സ്പെഷ്യലിസ്ററ് ബാറ്ററാണ് ഹെറ്റ്മെയർ. അതുകൊണ്ടു തന്നെ തുടർച്ചയായി നിരാശപ്പെടുത്തിയിട്ടും ഹെറ്റ്മെയറിന് ടീമിൽ അവസരം ലഭിച്ചുകൊണ്ടേയിരുന്നു. ഹെറ്റ്മെയർ തിരിച്ചുവരാത്ത സാഹചര്യത്തിൽ അവസാന കളികളിൽ റോയൽസിന്റെ ബാറ്റിങ് ഡെപ്ത് കുറയും. രാജസ്ഥാൻ റോയൽസിന്റെ മറ്റൊരു പ്രധാന ബാറ്ററായ നിതീഷ് റാണ പരിക്കിനെ തുടർന്ന് ഈ സീസണിൽ നിന്ന് പുറത്തായിക്കഴിഞ്ഞു. ഹെറ്റിയും സെലക്ഷന് ലഭ്യമാകാതെ വന്നാൽ ഇന്ത്യൻ താരങ്ങൾ മാത്രമുള്ള ബാറ്റിങ് ലൈനപ്പുമായി അവസാന കളികൾക്ക് സഞ്ജുവും ടീമും ഇറങ്ങിയേക്കും.

സഞ്ജു സാംസൺ തന്നെ പ്രധാനി, രാജസ്ഥാൻ റോയൽസിൽ ഇത്തവണ പണി കിട്ടിയത് ഈ മൂന്ന് പേർക്ക്; ടീമിന്റെ പ്രകടനത്തെയും ബാധിച്ചു
ഇനി രണ്ട് മത്സരങ്ങൾ മാത്രമാണ് 2025 സീസൺ ഐപിഎല്ലിൽ രാജസ്ഥാൻ റോയൽസിന് ബാക്കിയുള്ളത്‌. 18 ന് പഞ്ചാബ് കിങ്സിന് എതിരെയാണ് ഇതിൽ ആദ്യത്തേത്. ഹോം ഗ്രൗണ്ടായ ജയ്പൂരിലെ സവായ് മാൻസിങ് സ്റ്റേഡിയത്തിലാണ് ഈ മത്സരം. സീസണിലെ അവസാന കളിയിൽ ചെന്നൈ സൂപ്പർ കിങ്സാണ് സഞ്ജുവിന്റെയും ടീമിന്റെയും എതിരാളികൾ. മെയ് 20 ന് ഡെൽഹിയിലെ അരുൺ ജയ്റ്റ്ലി സ്റ്റേഡിയത്തിലാണ് ഈ മത്സരം നടക്കുക.

2025 സീസൺ ഐപിഎല്ലിൽ രാജസ്ഥാൻ റോയൽസിന്റെ സ്ക്വാഡ് ഇങ്ങനെ: സഞ്ജു സാംസൺ ( ക്യാപ്റ്റൻ ), യശസ്വി ജയ്സ്വാൾ, വൈഭവ് സൂര്യവംശി, ഷിംറോൺ ഹെറ്റ്മെയർ, ശുഭം ദുബെ, റിയാൻ പരാഗ്, വനിന്ദു ഹസരംഗ, ധ്രുവ് ജൂറൽ, കുനാൽ സിങ് റാത്തോർ, ലുവാൻ ഡി പ്രിട്ടോറിയസ്, യുധ്വീർ സിങ് ചരക്, തുഷാർ ദേഷ്പാണ്ടെ, കുമാർ കാർത്തികേയ, ആകാശ് മധ്വാൽ, ക്വെന മഫാക്ക, മഹീഷ് തീക്ഷണ, ഫസൽഹഖ് ഫാറൂഖി, അശോക് ശർമ, ജോഫ്ര ആർച്ചർ, നാന്ദ്രെ ബർഗർ.