സെയ്‌ലേഴ്സിനെ വീഴ്ത്തി റോയൽസ്; കെസിഎൽ രണ്ടാം സീസണിൽ ആദ്യ വിജയവുമായി ട്രിവാൻഡ്രം റോയൽസ്

തിരുവനന്തപുരം∙ കെസിഎലിൽ ഏരീസ് കൊല്ലം സെയ്‌ലേഴ്സിനെ നാലു വിക്കറ്റിന് തോൽപ്പിച്ച് അദാനി ട്രിവാൻഡ്രം റോയൽസ്. ആദ്യം ബാറ്റ് ചെയ്ത കൊല്ലം സെയ‌്ലേഴ്സ് 20 ഓവറിൽ 9 വിക്കറ്റ് നഷ്ടത്തിൽ 164 റൺസെടുത്തു. മറുപടി ബാറ്റിങ്ങിന് ഇറങ്ങിയ റോയൽസ് ഒരോവർ ബാക്കി നിൽക്കെ ലക്ഷ്യത്തിലെത്തി. അർധസെഞ്ചറിയുമായി റോയൽസിന് വിജയമൊരുക്കിയ റിയ ബഷീറാണ് കളിയിലെ താരം.

ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ കൊല്ലം സെയ്‌ലേഴ്സിന്റെ തുടക്കം തകർച്ചയോടെയായിരുന്നു. തുടർച്ചയായ രണ്ടാം മത്സരത്തിലും വെടിക്കെട്ട് ബാറ്ററായ വിഷ്ണു വിനോദ് ചെറിയ സ്കോറിൽ പുറത്തായി. ഒരു റണ്ണെടുത്ത വിഷ്ണു വിനോദിനെ ഫാനൂസ് ഫായിസ് റണ്ണൗട്ടാക്കുകയായിരുന്നു. സ്കോർ 28ൽ നിൽക്കെ പത്ത് റൺസെടുത്ത സച്ചിൻ ബേബിയെ ടി.എസ്.വിനിലും പുറത്താക്കി. എന്നാൽ അഭിഷേക് ജെ.നായരും വത്സൽ ഗോവിന്ദും ചേർന്ന മൂന്നാം വിക്കറ്റ് കൂട്ടുകെട്ട് സെയ്‌ലേഴ്സിന് തുണയായി .കൂറ്റൻ ഷോട്ടുകൾ പായിച്ച് അഭിഷേക് സ്കോർ ഉയർത്തിയപ്പോൾ നിലയുറപ്പിച്ചുള്ള ഇന്നിങ്സായിരുന്നു വത്സൽ ഗോവിന്ദിന്റേത്.

മികച്ച ഫോമിൽ കളിച്ച അഭിഷേകിനെ, വി.അജിത് പുറത്താക്കിയത് സെയ്‌ലേഴ്സിന് തിരിച്ചടിയായി. 36 പന്തുകളിൽ ഒരു ഫോറും അഞ്ച് സിക്സും അടക്കം 53 റൺസാണ് അഭിഷേക് നേടിയത്. തുടർന്നെത്തിയ എം.എസ്.അഖിലിനെ കിടിലൻ യോർക്കറിലൂടെ അഭിജിത് പ്രവീൺ മടക്കി. മൂന്നു റൺസ് കൂടി കൂട്ടിച്ചേർക്കുന്നതിനിടെ എൻ.എം.ഷറഫുദ്ദീന്റെ വിക്കറ്റും കൊല്ലത്തിന് നഷ്ടമായി. തുടർന്നെത്തിയവരും കാര്യമായ സംഭാവനകളില്ലാതെ മടങ്ങി. എന്നാൽ മറുവശത്ത് ഉറച്ചുനിന്ന വത്സൽ ഗോവിന്ദിന്റെ പ്രകടനമാണ് കൊല്ലത്തിനെ ഭേദപ്പെട്ട സ്കോറിലെത്തിച്ചത്. 47 പന്തുകളിൽ മൂന്ന് ഫോറും മൂന്ന് സിക്സുമടക്കം 63 റൺസാണ് വത്സൽ ഗോവിന്ദ് നേടിയത്. ട്രിവാൻഡ്രം റോയൽസിന് വേണ്ടി അഭിജിത് പ്രവീൺ മൂന്നും ബേസിൽ തമ്പി രണ്ടും വിക്കറ്റുകൾ വീഴ്ത്തി.

മറുപടി ബാറ്റിങ്ങിനിറങ്ങിയ റോയൽസിന് തുടക്കത്തിൽ തന്നെ എസ്.സുബിന്റെ വിക്കറ്റ് നഷ്ടമായി. എന്നാൽ റിയ ബഷീറും കൃഷ്ണപ്രസാദും ചേർന്ന് അതിവേഗത്തിൽ ഇന്നിങ്സ് മുന്നോട്ട് നീക്കി. എന്നാൽ ക്യാപ്റ്റൻ കൃഷ്ണപ്രസാദിനെ (24) ഏദൻ ആപ്പിൾ ടോമിന്റെ പന്തിൽ ഷറഫുദ്ദീൻ ഉജ്ജ്വലമായൊരു ക്യാച്ചിലൂടെ പുറത്താക്കി. തുടർന്ന് ഗോവിന്ദ് ദേവ് പൈയ്ക്കും എം.നിഖിലിനുമൊപ്പം റിയ ബഷീർ തീർത്ത കൂട്ടുകെട്ടുകളാണ് മത്സരത്തിൽ റോയൽസിന് നിർണായകമായത്.

ഗോവിന്ദ് ദേവ് പൈ 27ഉം നിഖിൽ 26ഉം റൺസെടുത്ത് പുറത്തായെങ്കിലും, മറുവശത്ത് ഉറച്ചുനിന്ന റിയ ബഷീർ, 45 പന്തുകളിൽനിന്ന് ആറു ഫോറും രണ്ടു സിക്സുമടക്കം 62 റൺസ് നേടി. കളി അവസാനത്തോട് അടുക്കെ റിയ ബഷീറിനെയും അഭിജിത് പ്രവീണിനെയും പുറത്താക്കി എം.എസ്.അഖിൽ സെയ്‌ലേഴ്സിന് പ്രതീക്ഷ നൽകിയെങ്കിലും മനസാന്നിധ്യത്തോടെ ബാറ്റ് വീശിയ അബ്ദുൾ ബാസിദിന്റെ പ്രകടനം കളി റോയൽസിന് അനുകൂലമാക്കി. 11 പന്തുകളിൽ 20 റൺസുമായി പുറത്താകാതെ നിന്ന അബ്ദുൾ ബാസിദിന്റെ മികവിൽ 19ാം ഓവറിൽ റോയൽസ് ലക്ഷ്യത്തിലെത്തി. കൊല്ലത്തിന് വേണ്ടി ബിജു നാരായണനും എം.എസ് അഖിലും രണ്ട് വിക്കറ്റ് വീതം വീഴ്ത്തി. ജയത്തോടെ രണ്ടു പോയിന്റുമായി റോയൽസ് അക്കൗണ്ട് തുറന്നു.