സ്റ്റമ്പുകള്‍ക്ക് പിന്നില്‍ ധോണിക്ക് ചരിത്രനേട്ടം; ആശ്വാസ ജയവുമായി സിഎസ്‌കെ, കെകെആറിന് വന്‍ പ്രഹരം

Authored byനിഷാദ് അമീന്‍ | Samayam Malayalam | Updated: 8 May 2025, 12:41 am

ഐപിഎല്‍ 2025ല്‍ പ്ലേ ഓഫ് പ്രതീക്ഷകള്‍ ദുര്‍ബലമായിരുന്ന കൊല്‍ക്കത്ത നൈറ്റ് റൈഡേഴ്‌സിന് മാരകമായ പ്രഹരം ഏല്‍പ്പിച്ച് ചെന്നൈ സൂപ്പര്‍ കിങ്‌സ്. നിലവിലെ ചാമ്പ്യന്‍മാരായ കെകെആറിനെ രണ്ട് വിക്കറ്റിന് സിഎസ്‌കെ കീഴടക്കി. നേരത്തെ തന്നെ പുറത്തായ സിഎസ്‌കെയ്ക്ക് ഇത് ആശ്വാസ ജയമാണ്. 12 മല്‍സരങ്ങളില്‍ നിന്ന് മൂന്ന് വിജയം മാത്രമുള്ള എംഎസ് ധോണിയുടെ സംഘം പോയിന്റ് പട്ടികയില്‍ ഏറ്റവും അവസാനത്ത് തുടരുന്നു. ഇത്രയും മല്‍സരങ്ങളില്‍ നിന്ന് 11 പോയിന്റോടെ ആറാം സ്ഥാനത്താണ് കെകെആര്‍.


ടോസ് നേടി ബാറ്റ് ചെയ്ത കെകെആര്‍ ആറിന് 179 റണ്‍സെടുത്തപ്പോള്‍ രണ്ട് പന്തുകള്‍ ശേഷിക്കെ സിഎസ്‌കെ എട്ട് വിക്കറ്റ് നഷ്ടത്തില്‍ ലക്ഷ്യംകാണുകയായിരുന്നു. ടീമിന്റെ വിജയത്തിനൊപ്പം സ്റ്റമ്പുകള്‍ക്ക് പിന്നില്‍ എംഎസ് ധോണി ചരിത്രനേട്ടവും കൈവരിച്ചു. ഒരു സ്റ്റമ്പിങും ഒരു ക്യാച്ചും നേടിയതോടെ ഐപിഎല്‍ ചരിത്രത്തില്‍ 200 വിക്കറ്റ് നേട്ടങ്ങളില്‍ പങ്കാളിയാവുന്ന ആദ്യ കളിക്കാരനായി മാറി.

ഞെട്ടിക്കുന്ന നീക്കം... രോഹിത് ശര്‍മ വിരമിച്ചു; പ്രഖ്യാപനം ക്യാപ്റ്റന്‍ സ്ഥാനത്തു നിന്ന് നീക്കിയെന്ന റിപോര്‍ട്ടിന് പിന്നാലെ
ധോണി 153 ക്യാച്ചുകളും 47 സ്റ്റമ്പിങുകളുമായാണ് 200 ഇരകള്‍ എന്ന നേട്ടം കൈവരിക്കുന്ന ആദ്യ വിക്കറ്റ് കീപ്പറായി റെക്കോഡിട്ടത്. ഐപിഎല്ലില്‍ സിഎസ്‌കെയ്ക്കു വേണ്ടി ധോണി 175 പുറത്താക്കലുകളിലും (135 ക്യാച്ചുകള്‍, 40 സ്റ്റമ്പിങുകള്‍), റൈസിങ് പൂനെ സൂപ്പര്‍ജയന്റിന് വേണ്ടി 25 പുറത്താക്കലുകളിലും (17 ക്യാച്ചുകള്‍, 7 സ്റ്റമ്പിങുകള്‍) പങ്കാളിയായിട്ടുണ്ട്.

ടി20 കരിയറില്‍ ധോണി 316 പുറത്താക്കലുകളില്‍ പങ്കാളിയായി ലോകത്ത് ഒന്നാമനായി തുടരുന്നു. 2008 മുതല്‍ സിഎസ്‌കെയുടെ ഭാഗമായ ധോണി 18 ഐപിഎല്‍ സീസണുകളിലും കളിച്ച നാല് പേരില്‍ ഒരാളാണ്.

വിരാട് കോഹ്‌ലി 'അറിയാതെ' ലൈക്ക് അടിച്ച നടിക്ക് വന്‍ നേട്ടം, ഇന്‍സ്റ്റ ഫോളോവേഴ്‌സ് 31.8 മില്യണ്‍, 12 പരസ്യ കരാര്‍
120 പന്തില്‍ 180 എന്ന വിജയലക്ഷ്യം പിന്തുടര്‍ന്ന സിഎസ്‌കെയ്ക്ക് വേണ്ടി ഡിവാള്‍ഡ് ബ്രെവിസ് (52), ശിവം ദുബെ (45), ഉര്‍വില്‍ പട്ടേല്‍ (31), രവീന്ദ്ര ജഡേജ (19), ധോണി (17*) എന്നിവര്‍ തിളങ്ങി.

നേരത്തെ കെകെആറിനായി ക്യാപ്റ്റന്‍ അജിങ്ക്യ രഹാനെ (48), ആേ്രന്ദ റസ്സല്‍ (38), മനീഷ് പാണ്ഡെ (36*), സുനില്‍ നരെയ്ന്‍ (26) എന്നിവരാണ് കൂടുതല്‍ റണ്‍സ് നേടിയത്. സിഎസ്‌കെയ്ക്ക് വേണ്ടി നൂര്‍ അഹ്‌മദ് നാല് ഓവറില്‍ 31 റണ്‍സിന് നാല് വിക്കറ്റ് വീഴ്ത്തി പ്ലെയര്‍ ഓഫ് ദി മാച്ച് പുരസ്‌കാരം നേടി.