സ്വപ്നം കണ്ടതെല്ലാം സ്വന്തമാക്കി: 10 വർഷത്തിനു ശേഷം വീണ്ടും ആ വാക്കുകൾ, ലവ് യു ലിയോ...

ഒരു പന്തിലേക്ക് ലോകത്തിന്റെ മുഴുവൻ കണ്ണുകളെയും തളച്ചിടാൻ കഴിഞ്ഞ അപൂർവ പ്രതിഭ... കഴിഞ്ഞ രണ്ടു പതിറ്റാണ്ടുകളായി ഫുട്ബോൾ മൈതാനങ്ങളിൽ അദ്ഭുതങ്ങൾ രചിച്ച ലയണൽ ആന്ദ്രെസ് മെസ്സി ഒടുവിൽ ആ തീരുമാനം പ്രഖ്യാപിച്ചിരിക്കുന്നു – രാജ്യാന്തര ഫുട്ബോളിൽ നിന്നുള്ള വിടവാങ്ങൽ. നീലയും വെള്ളയും വരയുള്ള കുപ്പായത്തിൽ ഇനി ആ പത്താം നമ്പറുകാരൻ ഉണ്ടാകില്ലെന്ന വാർത്ത ലോകമെമ്പാടുമുള്ള ദശലക്ഷക്കണക്കിന് ആരാധകരുടെ ഹൃദയങ്ങളിൽ എന്നും ഒരു നൊമ്പരമായി നിലനിൽക്കും. 207 മത്സരങ്ങൾ, 125 ഗോളുകൾ, ആഗ്രഹിച്ചതെല്ലാം നേടിക്കൊടുത്ത ഒരു ലോകകപ്പും രണ്ടു കോപ്പ അമേരിക്ക കിരീടങ്ങളും... വിജയത്തിന്റെ കൊടുമുടിയിൽ നിൽക്കുമ്പോഴും സ്വന്തം നെഞ്ചകം പിടയുന്ന വേദനയോടെയാണ് അയാൾ വിടപറയുന്നത്. ‘‘ഇത് എന്റെ ഹൃദയത്തെ ആഴത്തിൽ മുറിവേൽപ്പിക്കുന്ന തീരുമാനമാണ്, എങ്കിലും മുന്നോട്ട് പോകാൻ ഇതാണ് ശരിയായ സമയം’’ എന്ന് മെസ്സി കുറിച്ചപ്പോൾ ഒരു കളിക്കാരന്റെ വിരമിക്കലിനപ്പുറം ഒരു യുഗത്തിനാണ് ഇവിടെ അവസാനമാകുന്നത്.

∙ ഒരു കണ്ണീരിൽ തുടങ്ങിയ യാത്രമെസ്സിയുടെ രാജ്യാന്തര കരിയർ ഒരു സുന്ദരമായ കെട്ടുകഥയായിരുന്നില്ല. മറിച്ച്, വീഴ്ചകളിൽനിന്നു വീണ്ടും ഉയർന്നുവന്ന ഒരു മനുഷ്യന്റെ പോരാട്ടമായിരുന്നു. 2005ൽ ഹംഗറിക്കെതിരെ 18-ാം വയസ്സിൽ ആദ്യ മത്സരത്തിൽതന്നെ ചുവന്ന കാർഡ് വാങ്ങി കണ്ണീരോടെ മൈതാനം വിട്ട ആ ചെറുപ്പക്കാരനിൽ ഒരു ലോകം മുഴുവൻ പ്രതീക്ഷയർപ്പിച്ചിരുന്നു, അന്ന് മെസ്സി കളിച്ചത് കേവലം കേവലം 47 സെക്കൻഡ്. എന്നാൽ പില്‍ക്കാലം പീപ്പിൾസ് ഗെയിം എന്നറിയപ്പെടുന്ന ഫുട്ബോളിലെ ദൈവത്തിന്റെ അനന്തരാവകാശിയായി അയാളെ ആരാധകർ വാഴ്ത്തി. എന്നാൽ, പ്രതിഭയുടെ കൊടുമുടിയിലായിരുന്നപ്പോഴും വിധിയും കളിമൈതാനങ്ങളും അയാളോട് നിരന്തരം ക്രൂരത കാണിച്ചുകൊണ്ടേയിരുന്നു.

2014 ലോകകപ്പ് ഫൈനലിൽ ജർമനിക്ക് മുന്നിൽ തകർന്നുവീണ നിമിഷം, 2015ലും 2016ലും കോപ്പ അമേരിക്ക ഫൈനലുകളിലെ ദാരുണമായ തോൽവികൾ... രാജ്യത്തിനായി കിരീടമൊന്നുമില്ല എന്ന സങ്കടം ഒരു മുറിവായി മെസ്സിയുടെ നെഞ്ചിൽ കിടന്നു നീറി. 2016ലെ കോപ്പ ഫൈനലിലെ തോൽവിക്ക് ശേഷം, മനംനൊന്ത് ‘‘എനിക്ക് ഇനി ഇത് സാധിക്കില്ല’’ എന്ന് പറഞ്ഞ് മെസ്സി രാജ്യാന്തര ഫുട്ബോളിൽ നിന്ന് വിരമിക്കൽ പ്രഖ്യാപിച്ച നിമിഷം ഫുട്ബോൾ പ്രേമികൾക്ക് ഒരിക്കലും മറക്കാനാവില്ല. അന്ന് റൊസാരിയോയിലെ തെരുവുകളിൽ കുഞ്ഞുങ്ങൾ പോലും കരഞ്ഞു, ഒരു രാജ്യം മുഴുവൻ അയാളോട് തിരിച്ചുവരാൻ യാചിച്ചു.

∙ തോൽവിയിൽ നിന്നുള്ള തിരിച്ചുവരവ്

തോൽവിയെ ഭയന്ന് ഓടിയൊളിക്കാനല്ല, മറിച്ച് അതിനെ അതിജീവിച്ച് കൊടുമുടി കയറാനാണ് ഇതിഹാസങ്ങൾ ജനിക്കുന്നത്. ആരാധകരുടെ സ്നേഹത്തിന് മുന്നിൽ മനസ്സ് മാറി മെസ്സി തിരിച്ചെത്തി. അർജന്റീന എന്ന രാജ്യത്തിന് വേണ്ടി, അവിടുത്തെ സാധാരണക്കാരായ ജനങ്ങൾക്ക് വേണ്ടി ഒരു കിരീടം നേടുക എന്നത് മെസ്സിയുടെ മാത്രം സ്വപ്നമായിരുന്നില്ല, അയാളുടെ ജീവിത ദൗത്യമായിരുന്നു.

2021ലെ കോപ്പ അമേരിക്ക ഫൈനൽ അതിനുള്ള ഉത്തരമായിരുന്നു. ബ്രസീലിന്റെ മണ്ണിൽ, റിയോ ഡി ജനീറോയിലെ ചരിത്രപ്രസിദ്ധമായ മരക്കാന സ്റ്റേഡിയത്തിൽ ബ്രസീലിനെ തകർത്ത് അർജന്റീന കിരീടമുയർത്തിയപ്പോൾ, മൈതാനത്ത് മുട്ടുകുത്തിനിന്ന് കരഞ്ഞ മെസ്സിയെ ലോകം കണ്ടു. 28 വർഷത്തെ അർജന്റീനയുടെ കാത്തിരിപ്പ് അവസാനിച്ച നിമിഷം! ‘‘എന്റെ ഹൃദയത്തിൽ തറച്ചിരുന്ന മുള്ളാണ് ഞാൻ എടുത്തുമാറ്റിയത്,’’ എന്ന് വിതുമ്പലോടെ മെസ്സി അന്ന് പറഞ്ഞു. അവിടെ തുടങ്ങി മെസ്സിയുടെയും അർജന്റീനയുടെയും സുവർണ്ണ കാലഘട്ടം.

പന്തുകൊണ്ട് മൈതാനത്ത് കവിത രചിച്ച മാന്ത്രികനാണ് മെസ്സി. ഡ്രൈബിളിങ്ങിലൂടെ എതിരാളികളെ കാഴ്ചക്കാരാക്കിയും, കാണാൻ പോലും കഴിയാത്ത കോണുകളിലേക്ക് പാസുകൾ നൽകിയും ഫ്രീക്കിക്കുകളിലൂടെ വല കുലുക്കിയും അയാൾ കഴിഞ്ഞ രണ്ടു പതിറ്റാണ്ടായി നമ്മെ അമ്പരപ്പിച്ചു. മെസ്സി എന്നത് ഒരു കളിക്കാരന്റെ മാത്രം പേരായിരുന്നില്ല, കളി കാണുന്ന ഓരോ മനുഷ്യനും ലഭിച്ച ആനന്ദമായിരുന്നു.

ഇനിയും അർജന്റീനയുടെ നീലയും വെള്ളയും കുപ്പായത്തിൽ ആ പത്താം നമ്പർ ഉണ്ടായേക്കാം. പക്ഷേ, അതിൽ ആ മാന്ത്രികസ്പർശം ഇനി ഉണ്ടാകില്ല. മെസ്സി ഇല്ലാത്ത അർജന്റീന ദേശീയ ടീമിനെക്കുറിച്ച് ചിന്തിക്കാൻ പോലും ആരാധകർക്ക് പ്രയാസമാണ്. എങ്കിലും, കണ്ണീരോടെയല്ലാതെ ഈ ഇതിഹാസത്തിന് വിട നൽകാനാവില്ല. കളിമൈതാനങ്ങളിൽ നിങ്ങൾ നൽകിയ അളവറ്റ സന്തോഷങ്ങൾക്ക്, അവിസ്മരണീയമായ ഓർമകൾക്ക്, തോറ്റയിടത്തുനിന്ന് എങ്ങനെ ജയിച്ചു കയറണമെന്ന് പഠിപ്പിച്ചതിന്... നന്ദി ലയണൽ ആന്ദ്രെസ് മെസ്സി! ഫുട്ബോൾ ഉള്ളടത്തോളം കാലം നിങ്ങളുടെ പേര് ലോകത്തിന്റെ ഹൃദയമിടിപ്പായി നിലനിൽക്കും.