ഹാർദിക് പാണ്ഡ്യയെ ലക്ഷ്യമിട്ട് ഏഴ് ടീമുകൾ; സിഎസ്കെയും രം​ഗത്തേക്ക്, ലേലത്തിന് മുമ്പ് തന്നെ ഓൾറൗണ്ടറെ റാഞ്ചാൻ കടുത്ത മത്സരം

ഇന്ത്യൻ പ്രീമിയർ ലീഗിന്റെ 2027 സീസണിന് മുന്നോടിയായി പല തരം കൂടുമാറ്റ ചർച്ചകളും നടക്കുന്നുണ്ട്. ഋഷഭ് പന്ത് ലഖ്നൗ സൂപ്പർ ജയ്ന്റ്സ് വിട്ട് ഡൽഹി ക്യാപിറ്റൽസിലേക്ക് തിരികെ പോയതും കുൽദീപ് യാദവ് ലഖ്നൗവിലേക്ക് പോയതുമെല്ലാം ഇതിനോടകം എല്ലാവരും കണ്ടതാണ്. ഇനിയും ചില വമ്പൻ കൂടുമാറ്റങ്ങളുടെ റിപ്പോർട്ട് പുറത്തുവരുന്നുണ്ട്.

ഇതിൽ എടുത്തു പറയേണ്ടത് ഹാർദിക് പാണ്ഡ്യ യുടെ കൂടുമാറ്റങ്ങളെക്കുറിച്ചുള്ള റിപ്പോർട്ടാണ്. മുംബെെ ഇന്ത്യൻസ് ക്യാപ്റ്റനായ ഹാർദിക് പാണ്ഡ്യ ടീം വിടുമെന്നുറപ്പായിക്കഴിഞ്ഞു. മുംബെെയുടെ നായകനായി ഹാർദിക് വന്നപ്പോൾ പ്രതീക്ഷകളേറെയായിരുന്നെങ്കിലും കപ്പിലേക്കെത്താൻ പോയിട്ട് പ്ലേ ഓഫിൽ പോലും മുംബെെക്ക് ആത്മവിശ്വാസത്തോടെ എത്താൻ സാധിക്കാത്ത അവസ്ഥയായി. രോഹിത്തിന് കീഴിൽ ഉണ്ടായിരുന്ന മുംബെെയുടെ കരുത്ത് ഹാർദിക്കിന് കീഴിൽ എത്തിയപ്പോൾ ഇല്ലാതെയായെന്ന് പറയാം.

ഇതോടെ ഹാർദിക്കിനെ മുംബെെ കെെവിടാൻ തീരുമാനിക്കുകയായിരുന്നു. ഇത്തരമൊരു റിപ്പോർട്ട് പുറത്ത് വന്നതുമുതൽ പേസ് ഓൾറൗണ്ടർക്കായി പ്രധാന ടീമുകളെല്ലാം രംഗത്തെത്തിയെന്നതാണ് കൗതുകകരം. ഹാർദിക്കിനെ ടീമിലെത്തിക്കാൻ ഏഴ് ടീമുകൾ താൽപര്യം അറിയിച്ച് രംഗത്തെത്തിയിട്ടുണ്ടെന്നാണ് ടെെംസ് ഓഫ് ഇന്ത്യയുടെ റിപ്പോർട്ട് വ്യക്തമാക്കുന്നത്. ഏറ്റവും ഒടുവിലായി ചെന്നെെ സൂപ്പർ കിങ്സാണ് ഹാർദിക്കിനായി രംഗത്ത് വന്നതെന്നാണ് വിവരം.

ഹാർദിക് പാണ്ഡ്യയെപ്പോലൊരു താരത്തെ സിഎസ്കെയ്ക്ക് ആവശ്യമാണ്. കാരണം അവസാന സീസണിൽ മികച്ചൊരു പേസ് ഓൾറൗണ്ടറുടെ അഭാവം സിഎസ്കെയെ വേട്ടയാടിയിരുന്നു. സാം കറനെ രാജസ്ഥാൻ റോയൽസിന് കെെമാറിയതിന് ശേഷം ആ റോളിലേക്ക് മികച്ചൊരു താരത്തെ കണ്ടെത്താൻ സിഎസ്കെയ്ക്കായിട്ടില്ല. അതുകൊണ്ടുതന്നെ തന്നെ ഹാർദിക്കിനെ ആ റോളിലേക്ക് സിഎസ്കെ നോട്ടമിടുന്നു.
FIFA World Cup 2026: 74 മിനുട്ടുവരെ പിന്നിൽ, പിന്നെ രണ്ട് ​ഗോൾ മടക്കി ജയം; ഹാരി കെയ്ൻ മികവിൽ കോം​ഗോയെ വീഴ്ത്തി ഇം​ഗ്ലണ്ട് പ്രീ ക്വാർട്ടറിൽ
എന്നാൽ സിഎസ്കെയിൽ നായകസ്ഥാനം ഹാർദിക്കിന് ലഭിക്കില്ല. കാരണം നിലവിൽ റുതുരാജ് ഗെയ്ക് വാദ് നായകനായി അവർക്കൊപ്പമുണ്ട്. സഞ്ജു സാംസണും നായകസ്ഥാനം നോട്ടമിട്ട് അവിടെയുണ്ട്. ഈ സാഹചര്യത്തിൽ ഹാർദിക്കിനെ ക്യാപ്റ്റനാക്കാൻ സിഎസ്കെയ്ക്ക് സാധിക്കില്ല. നായകസ്ഥാനമില്ലാതെ ഇത്തരമൊരു കൂടുമാറ്റം നടത്താൻ ഹാർദിക്കും തയ്യാറായേക്കില്ല.

നിലവിലെ റിപ്പോർട്ട് പ്രകാരം റോയൽ ചലഞ്ചേഴ്സ് ബംഗളൂരു, സൺറെെസേഴ്സ് ഹെെദരാബാദ്, എന്നിവരൊഴികെ മറ്റുള്ളവരെല്ലാം ഹാർദിക്കിൽ താൽപര്യം പ്രകടിപ്പിച്ചിട്ടുണ്ട്. എന്നാൽ ഹാർദിക് കെകെആറിലേക്ക് പോകാനാണ് കൂടുതൽ സാധ്യതയെന്ന് പറയാം. നിലവിൽ കെകെആറിന് മികച്ചൊരു നായകനെ ആവശ്യമാണ്. അജിൻക്യ രഹാനെ പോകുമ്പോൾ ആ സ്ഥാനത്തേക്ക് നായകനായി എത്താൻ ഹാർദിക്കിന് സാധിക്കും.

IND vs ENG T20: 5, 0, 1, സഞ്ജുവിന് വീണ്ടും നിരാശ, തിളങ്ങാൻ ഇനി എത്ര അവസരം വേണം? ഇംഗ്ലണ്ടിനെതിരേ നിറം മങ്ങി മലയാളി താരം

മുംബെെ ഇന്ത്യൻസും കെകെആറുമായി ചർച്ചകൾ പുരോഗമിക്കുകയാണെന്ന് വിവരം. രാജസ്ഥാൻ റോയൽസും ഹാർദിക്കിനെ ഒപ്പം കൂട്ടാനുള്ള നീക്കം നടത്തുന്നുണ്ട്. അതുകൊണ്ടുതന്നെ എങ്ങോട്ടാവും ഹാർദിക് പോവുകയെന്നതാണ് കണ്ടറിയേണ്ടത്. ഗുജറാത്ത് ടെെറ്റൻസിലേക്ക് ഹാർദിക് തിരിച്ചുപോകാനുള്ള സാധ്യതയും നിലനിൽക്കുന്നുണ്ട്.

എന്നാൽ നായകസ്ഥാനം ലഭിക്കാതെ ഹാർദിക് കൂടുമാറ്റത്തിന് തയ്യാറായേക്കില്ല. ഹാർദിക്കിന് ഏറ്റവും അനുയോജ്യമായ ടീം കെകെആറാണെന്ന് തന്നെ പറയാം. ഡൽഹി ക്യാപിറ്റൽസിലേക്കുള്ള ഹാർദിക്കിന്റെ കൂടുമാറ്റ സാധ്യതയും തള്ളിക്കളയാനാവില്ല. എന്തായാലും റെക്കോഡ് തുകയ്ക്ക് ഹാർദിക്കിന്റെ കെെമാറ്റം നടക്കാനുള്ള സാധ്യതയാണ് ഇപ്പോൾ നിലനിൽക്കുന്നത്.