ഹർഷിത് റാണയും വരുൺ ചക്രവർത്തിയും ഇന്ത്യൻ ടീമിൽനിന്നു പുറത്ത്, പകരക്കാരെ പ്രഖ്യാപിച്ച് ബിസിസിഐയുടെ നീക്കം

ലണ്ടൻ∙ ഇംഗ്ലണ്ടിനെതിരായ ഏകദിന പരമ്പരയ്ക്കും സിംബാബ്‌വെയ്‌ക്കെതിരായ ട്വന്റി20 പരമ്പരയ്ക്കുമുള്ള ഇന്ത്യൻ ടീമിൽ മാറ്റങ്ങൾ വരുത്തി ബിസിസിഐ. രണ്ട് മാറ്റങ്ങളാണ് ബിസിസിഐ വരുത്തിയത്. പരുക്കേറ്റ ഹർഷിത് റാണ, വരുൺ ചക്രവർത്തി എന്നിവർക്ക് പകരക്കാരായി പ്രിൻസ് യാദവ്, രവി ബിഷ്‌ണോയി എന്നിവരെ ടീമിൽ ഉൾപ്പെടുത്തിയതായി ബിസിസിഐ അറിയിച്ചു. 

 2026 ലെ ഐപിഎല്ലിൽ ബോളിങ് മികവിലൂടെ ശ്രദ്ധേയനായ പ്രിൻസ് യാദവ്, ഇംഗ്ലണ്ടിനെതിരായ ട്വന്റി20 പരമ്പരയിൽ മികച്ച പ്രകടനം കാഴ്ചവച്ചിരുന്നു. പരമ്പരയിൽ ഇന്ത്യ ഒരു മത്സരം പോലും ജയിച്ചില്ലെങ്കിലും പ്രിൻസിന്റെ പ്രകടനം കയ്യടി നേടിയിരുന്നു. അതേസമയം, 2026 ലെ ട്വന്റി20 ലോകകപ്പിന് ശേഷം  വരുൺ ചക്രവർത്തി  തുടർച്ചയായ പരുക്കുകൾ നേരിടുകയാണ്. സിംബാബ്‌വെ ട്വന്റി20 മത്സരങ്ങളിൽ നിന്നും വരുൺ വിട്ടുനിൽക്കും.

‘‘ട്രെന്റ് ബ്രിഡ്ജിൽ ഇംഗ്ലണ്ടിനെതിരായ മൂന്നാം ട്വന്റി20 മത്സരത്തിനിടെ വലതുവശത്തെ ഹാംസ്ട്രിംഗിൽ പെട്ടെന്ന് അസ്വസ്ഥത അനുഭവപ്പെട്ടതായി റാണ അറിയിച്ചു.  തുടർന്നുള്ള സ്‌കാനുകളിൽ ഗ്രേഡ് 1 ഹാംസ്ട്രിംഗിന് പരിക്കേറ്റതായി കണ്ടെത്തി. ഇംഗ്ലണ്ടിനെതിരായ വരാനിരിക്കുന്ന ഏകദിന പരമ്പരയിൽ നിന്ന് അദ്ദേഹത്തെ ഒഴിവാക്കി.  ബിസിസിഐ സെന്റർ ഓഫ് എക്‌സലൻസിൽ (സിഒഇ) ഇത് സംബന്ധിച്ച് റിപ്പോർട്ട് ചെയ്യും. ഇംഗ്ലണ്ടിനെതിരായ മൂന്നാം മത്സരത്തിനിടെയാണ് വരുൺ ചക്രവർത്തിക്ക് പരുക്കേറ്റത്. തുടർന്ന് നടത്തിയ എംആർഐ സ്‌കാനിൽ താരത്തിനും ഹാംസ്ട്രിങ് പരുക്ക് കണ്ടെത്തി.’’– ബിസിസിഐ പ്രസ്താവനയിൽ വ്യക്തമാക്കി.

 ഇംഗ്ലണ്ടിനെതിരായ ഏകദിന പരമ്പരയ്ക്കുള്ള ഇന്ത്യൻ ടീം: ശുഭ്മൻ ഗിൽ (ക്യാപ്റ്റൻ), രോഹിത് ശർമ, വിരാട് കോലി, ശ്രേയസ് അയ്യർ (വൈസ് ക്യാപ്റ്റൻ), കെ.എൽ. രാഹുൽ (വിക്കറ്റ് കീപ്പർ), ഇഷാൻ കിഷൻ (വിക്കറ്റ് കീപ്പർ), വാഷിംഗ്ടൺ സുന്ദർ, അക്ഷർ പട്ടേൽ, ശിവം ദുബെ, കുൽദീപ് യാദവ്, ജസ്പ്രീത് ബുമ്ര, പ്രസിദ്ധ് കൃഷ്ണ, അർഷ്ദീപ് സിംഗ്, ഗുർനൂർ ബ്രാർ, പ്രിൻസ് യാദവ് 

സിംബാബ്​വെയ്ക്കെതിരായ  ‍ട്വന്റി20 പരമ്പരയ്ക്കുള്ള ടീം: ശ്രേയസ് അയ്യർ (ക്യാപ്റ്റൻ), വൈഭവ് സൂര്യവംശി, അഭിഷേക് ശർമ, തിലക് വർമ ( വൈസ് ക്യാപ്റ്റൻ), ഇഷാൻ കിഷൻ (വിക്കറ്റ് കീപ്പർ), ശിവം ദുബെ, സൂര്യൻഷ് ഷെഡ്‌ഗെ, റിങ്കു സിംഗ്, ഹർഷ് ദുബെ, പ്രിൻസ് യാദവ്, യാഷ് താക്കൂർ, അശോക് ശർമ, മയങ്ക് യാദവ്, പ്രഭ്‌സിമ്രാൻ സിങ് (വിക്കറ്റ് കീപ്പർ).