18 സീസണിൽ ഇതാദ്യം, വമ്പൻ നാണക്കേടുമായി ഡെൽഹി ക്യാപിറ്റൽസ്; ഇതുവരെ ഒരു ടീമിനും ഈ അവസ്ഥ വന്നിട്ടില്ല

Curated by: ഗോകുൽ എസ്|Samayam Malayalam•22 May 2025, 3:58 am

2025 സീസൺ ഐപിഎല്ലിലും പ്ലേ ഓഫിലെത്താതെ പുറത്തായിരിക്കുകയാണ് ഡെൽഹി ക്യാപിറ്റൽസ്‌. പ്ലേ ഓഫ് സാധ്യത നിലനിർത്താൻ വിജയം അനിവാര്യമായിരുന്ന കളിയിൽ മുംബൈ ഇന്ത്യൻസിനോട് അവർ പരാജയപ്പെടുകയായിരുന്നു. മുംബൈ ഇന്ത്യൻസിന്റെ ഹോം ഗ്രൗണ്ടായ വാംഖഡെയിൽ നടന്ന കളിയിൽ 59 റൺസിന്റെ പരാജയമാണ് ഡെൽഹി ഏറ്റുവാങ്ങിയത്. മത്സരത്തിൽ ആദ്യം ബാറ്റ് ചെയ്ത മുംബൈ നിശ്ചിത 20 ഓവറുകളിൽ 180/5 എന്ന മികച്ച സ്കോർ നേടിയപ്പോൾ, ഡെൽഹിയുടെ മറുപടി 121 റൺസിൽ അവസാനിച്ചു.ഉജ്ജ്വല ഫോമിൽ 2025 സീസണിൽ കളിച്ചു തുടങ്ങിയ ഡെൽഹി ക്യാപിറ്റൽസ്, പ്ലേ ഓഫിലെത്താതെ പുറത്തായത് ക്രിക്കറ്റ് പ്രേമികളെ ശരിക്കും ഞെട്ടിക്കുന്നതാണ്. 2025 സീസണിലെ ആദ്യ നാല് കളികളിലും ജയം നേടാൻ അക്സർ പട്ടേൽ നയിച്ച ഡെൽഹി ക്യാപിറ്റൽസിന് സാധിച്ചിരുന്നു. ഇതോടെ 2025 സീസണിൽ കിരീടം നേടാൻ ഏറ്റവും സാധ്യതകളുള്ള ടീമുകളിൽ ഒന്നായി ഡെൽഹിയെ എല്ലാവരും ഉയർത്തിക്കാട്ടി.


ആദ്യ എട്ട് മത്സരങ്ങൾ പൂർത്തിയാകുമ്പോൾ ആറ് ജയങ്ങളായിരുന്നു ഡെൽഹി ക്യാപിറ്റൽസിന്റെ അക്കൗണ്ടിൽ ഉണ്ടായിരുന്നത്. എന്നാൽ ഇതിന് ശേഷം കളിച്ച അഞ്ച് മത്സരങ്ങളിൽ ഒരു വിജയം പോലും അവർക്ക് നേടാനായില്ല. നാല് കളികളിൽ ടീം പരാജയപ്പെട്ടപ്പോൾ ഒരു മത്സരം മഴയെത്തുടർന്ന് ഉപേക്ഷിച്ചു.

Also Read: ചരിത്രം കുറിച്ച് സൂര്യകുമാർ യാദവ്; എലൈറ്റ് ക്ലബ്ബിൽ ഒന്നാമൻ

നാണക്കേടിന്റെ റെക്കോഡ് സ്വന്തം:

ഒരു ഐപിഎൽ സീസണിലെ ആദ്യ നാല് കളികളിലും വിജയിച്ചതിന് ശേഷം പ്ലേ ഓഫിലെത്താതെ പുറത്താകുന്ന ആദ്യ ടീമെന്ന നാണക്കേടും ഈ സീസണിൽ ഡെൽഹി ക്യാപിറ്റൽസ് സ്വന്തമാക്കി. 18 വർഷത്തെ ഐപിഎൽ ചരിത്രത്തിൽ ഇതുവരെ ഏഴ് ടീമുകളാണ് സീസണിലെ ആദ്യ നാല് മത്സരങ്ങളും ജയിച്ചിട്ടുള്ളത്.‌ ചെന്നൈ സൂപ്പർ കിങ്സ് ( 2008 ), ഡെക്കാൻ ചാർജേഴ്സ് ( 2009 ), കിങ്സ് ഇലവൻ പഞ്ചാബ് ( 2014 ), രാജസ്ഥാൻ റോയൽസ് ( 2015 ), റോയൽ ചലഞ്ചേഴ്സ് ബംഗളൂരു ( 2021 ), രാജസ്ഥാൻ റോയൽസ് ( 2024 ) എന്നിവരാണിത്. ഇതിൽ ഡെൽഹി ഒഴിച്ചുള്ള ടീമുകളെല്ലാം പ്ലേ ഓഫ് കളിച്ചു.

Also Read: പ്ലേ ഓഫ് ഉറപ്പിച്ച് മുംബൈ ഇന്ത്യൻസ്; ഐപിഎൽ 2025 സീസണിൽ നിന്ന് പുറത്തായി ഡൽഹി ക്യാപിറ്റൽസ്

ഐപിഎൽ ചരിത്രത്തിലെ എക്കാലത്തെയും വമ്പൻ നാണക്കേടുകളിലൊന്ന് ഇപ്പോൾ ഡെൽഹിക്ക് സ്വന്തമായിരിക്കുന്നത്. സ്വപ്ന ഫോമിൽ കളിച്ചു തുടങ്ങിയ സീസണിൽ ഇതുപോലൊരു അവസ്ഥയിലേക്ക് വീണതിൽ ടീമിന് സ്വയം പഴിക്കുകയേ നിവർത്തിയുള്ളൂ. നിലവിൽ 13 കളികളിൽ 13 പോയിന്റുമായി ലീഗിൽ അഞ്ചാമതാണ് അക്സർ പട്ടേലും സംഘവും. ഈ മാസം 24 ന് പഞ്ചാബ് കിങ്സിന് എതിരെയാണ് ടീമിന്റെ അവസാന ലീഗ് മത്സരം.