CSK IPL 2026: ചെന്നെെയില്‍ ഓപ്പണറായി സഞ്ജു, നാലാം നമ്പറില്‍ സര്‍പ്രൈസ് താരം; 12 അംഗ സിഎസ്കെ ടീമിനെ തെരഞ്ഞെടുത്ത് മുഹമ്മദ് കൈഫ്

മാര്‍ച്ച് 28-ന് ആരംഭിക്കുന്ന പുതിയ സീസണ്‍ ഇന്ത്യന്‍ പ്രീമിയര്‍ ലീഗിനുള്ള മുന്നൊരുക്കങ്ങളിലാണ് ടീമുകളെല്ലാം. ശക്തമായ ടീമിനെ തന്നെ കളത്തിലിറക്കി പ്ലേ ഓഫും പിന്നെ കിരീടവും സ്വന്തമാക്കുക എന്നതാണ് ടീമുകളുടെയെല്ലാം ലക്ഷ്യം. ചെന്നെെ സൂപ്പര്‍ കിങ്സും ഇതേ ലക്ഷ്യവുമായാണ് മുന്നോട്ട് പോകുന്നത്. പുതിയ സീസണ് മുമ്പ് മലയാളി വിക്കറ്റ് കീപ്പര്‍ ബാറ്റര്‍ സഞ്ജു സാംസണെ ടീമിലെത്തിച്ചതാണ് ചെന്നെെ നടത്തിയ ഏറ്റവും സുപ്രധാന നീക്കം. ചെന്നെെക്ക് വേണ്ടി സഞ്ജു ഏത് റോളില്‍ കളിക്കും? ചെന്നെെ പ്ലേയിങ് ഇലവന്‍ എങ്ങനെയായിരിക്കും? മുന്‍ ഇന്ത്യന്‍ മുഹമ്മദ് കൈഫ് തെരഞ്ഞെടുത്ത ചെന്നെെ ടീമില്‍ സഞ്ജു സാംസണ്‍ ഓപ്പണറായാണ് കളിക്കുക. സഞ്ജുവിനൊപ്പം റുതുരാജ് ഗെയ്ക്‌വാദാണോ അതോ ആയുഷ് മാത്രേയാണോ ഇന്നിങ്സ് ഓപ്പണ്‍ ചെയ്യുക എന്നതായിരിക്കും ആരാധകരുടെ മനസ്സിലുള്ള ചോദ്യം. മുഹമ്മദ് കൈഫ് സഞ്ജുവിന്റെ സഹ ഓപ്പണറായി തെരഞ്ഞെടുത്തിരിക്കുന്നത് അണ്ടര്‍ 19 ക്രിക്കറ്റിലെ വെടിക്കെട്ട് താരമായ ആയുഷ് മാത്രേയെയാണ്. റുതുരാജ് ഗെയ്ക്‌വാദ് മൂന്നാം നമ്പറില്‍ കളിക്കാനിറങ്ങും. കൈഫ് തെരഞ്ഞെടുത്ത 12 അംഗ ടീമിനെ വിശദമായി പരിചയപ്പെടാം.
IPL 2026: ഇനി സഞ്ജുവിന്റെ സിഎസ്കെ, വെെസ് ക്യാപ്റ്റൻസി ഉറപ്പിക്കാം; അനുകൂലമായി മൂന്ന് കാര്യങ്ങൾ, കട്ടക്ക് പിന്തുണച്ച് ധോണി
ചെന്നെെ ടീമിന് വേണ്ടി നാലാം നമ്പറില്‍ ആര് കളിക്കും എന്നത് വലിയൊരു ചോദ്യം തന്നെയാണ്. കഴിഞ്ഞ സീസണില്‍ നാലാം നമ്പറില്‍ സ്ഥിരമായൊരു താരം ചെന്നെെ ടീമിനുണ്ടായിരുന്നില്ല. ശിവം ദുബെ, രവിചന്ദ്ര അശ്വിന്‍ തുടങ്ങിയ പല താരങ്ങളും ആ റോളില്‍ കളിച്ചിട്ടുണ്ട്. ഡ്യുവാള്‍ഡ് ബ്രെവിസ്, ശിവം ദുബെ, കാര്‍ത്തിക് ശര്‍മ, ഉര്‍വില്‍ പട്ടേല്‍, സര്‍ഫറാസ് ഖാൻ തുടങ്ങിയ ഒരുപിടി ഓപ്ഷനുകള്‍ ടീമിന് ലഭ്യമാണ്. കൈഫിന്റെ അഭിപ്രായത്തില്‍ ഉര്‍വില്‍ പട്ടേല്‍ നാലാമത്തെ പൊസിഷനില്‍ കളിക്കാനാണ് സാധ്യത.

ഉര്‍വില്‍ പട്ടല്‍ സ്പിന്നര്‍മാരെ നന്നായി കൈകാര്യം ചെയ്യുമെന്നാണ് ഇതിന് കാരണമായി മുഹമ്മദ് കൈഫ് ചൂണ്ടിക്കാട്ടുന്നത്. കാര്‍ത്തിക് ശര്‍മ അല്ലെങ്കില്‍ ഉര്‍വില്‍ പട്ടേല്‍ ഇവരില്‍ ആരെങ്കിലും ഒരാള്‍ മാത്രമേ പ്ലെയിങ് ഇലവനില്‍ ഉണ്ടാകൂ എന്നാണ് കൈഫ് പറയുന്നത്. രണ്ട് പേരും ഒരുമിച്ച് ബെഞ്ചിലിരുന്നാലും അദ്ഭുതപ്പെടേണ്ടി വരില്ലെന്നും അദ്ദേഹം അഭിപ്രായപ്പെടുന്നുണ്ട്. അഞ്ചാം നമ്പറില്‍ ശിവം ദുബെ, ആറാം നമ്പറില്‍ ഡ്യൂവാള്‍ഡ് ബ്രെവിസ് എന്നിവരെയാണ് കൈഫ് തെരഞ്ഞെടുത്തത്.

ഏഴാം നമ്പറില്‍ രവീന്ദ്ര ജഡേജക്ക് പകരക്കാരനായി ചെന്നെെ വളര്‍ത്തിക്കൊണ്ട് വരാന്‍ ഉദ്ദേശിക്കുന്ന പ്രശാന്ത് വീറാണ് കളിക്കുക. ബോള്‍ കൊണ്ടും ബാറ്റ് കൊണ്ടും സംഭാവനകള്‍ നല്‍കുന്ന പ്രശാന്ത് വീര്‍ ടീമിന്‍റെ സന്തുലിതാവസ്ഥ നിലനിര്‍ത്തുന്നതില്‍ നിര്‍ണായക പങ്കുവഹിക്കുമെന്നാണ് കൈഫിന്റെ അഭിപ്രായം. മുന്‍ ചെന്നെെ നായകനും സീനിയര്‍ താരവുമായ എംഎസ് ധോണിയെ എട്ടാമനായാണ് കൈഫ് തെരഞ്ഞെടുത്തിരിക്കുന്നത്.
​ഗൗതം ​ഗംഭീറല്ല, എന്നെ ക്യാപ്റ്റനാക്കാൻ തീരുമാനിച്ചത് ആ 4 പേർ; ടി20 ലോകകപ്പിന് പിന്നാലെ വെളിപ്പെടുത്തലുമായി സൂര്യകുമാർ യാദവ്
നൂര്‍ അഹമ്മദ്, ഖലീല്‍ അഹമ്മദ്, നഥാന്‍ എല്ലിസ് എന്നിവരെ ടീമിലെ ബോളര്‍മാരായി തെരഞ്ഞെടുത്ത കൈഫ് ഇംപാക്ട് പ്ലെയറായി മാറ്റ് ഹെന്‍റിയെയും പരിഗണിച്ചിട്ടുണ്ട്. തകര്‍ത്തടിക്കാന്‍ കഴിവുള്ള ബാറ്റര്‍മാരില്ലാതെ പോയതാണ് കഴിഞ്ഞ സീസണില്‍ ചെന്നെെ നേരിട്ട പ്രധാന പ്രതിസന്ധി. ഇക്കുറി ആ പ്രശ്നങ്ങളെല്ലാം പരിഗണിച്ച് മികച്ചൊരു ടീമിനെ തന്നെ സ്വന്തം തട്ടകത്തിലെത്തിക്കാന്‍ ചെന്നെെ ടീമിന് കഴിഞ്ഞിട്ടുണ്ട്. മാര്‍ച്ച് 30-ന് രാജസ്ഥാന്‍ റോയല്‍സിനെതിരെയാണ് ചെന്നെെ സൂപ്പര്‍ കിങ്സിന്റെ ആദ്യ ഐപിഎല്‍ മത്സരം.