IPL 2026: 6, 7, 9, വീണ്ടും നിറം മങ്ങി സഞ്ജു സാംസൺ, സിഎസ്കെ ജഴ്സിയിൽ മികവ് കാട്ടാനാവുന്നില്ല; ഇനിയും ആരാധകർ കാത്തിരിക്കണം

ഇന്ത്യൻ പ്രീമിയർ ലീഗിന്റെ 2026 സീസണിൽ വലിയ പ്രതീക്ഷയോടെ കൂടുമാറ്റം നടത്തിയ താരങ്ങളിലൊരാളാണ് സഞ്ജു സാംസൺ‌. രാജസ്ഥാൻ റോയൽസിന്റെ ക്യാപ്റ്റൻ സ്ഥാനമടക്കം ഉപേക്ഷിച്ച് സിഎസ്കെയിലേക്കെത്തിയ സഞ്ജുവിന് ഈ സീസണിൽ പ്രതീക്ഷിച്ച നിലവാരം കാട്ടാനാവുന്നില്ല. മൂന്ന് മത്സരത്തിൽ നിന്ന് വെറും 22 റൺസാണ് സഞ്ജു നേടിയത്. 6, 7 എന്നിങ്ങനെയായിരുന്നു ആദ്യ രണ്ട് മത്സരത്തിലെ സഞ്ജുവിന്റെ സ്കോർ.എന്നാൽ മൂന്നാം മത്സരത്തിൽ ആർസിബിക്കെതിരേ തകർപ്പൻ പ്രകടനത്തോടെ സഞ്ജു സാംസൺ തിരിച്ചെത്തുമെന്നാണ് ആരാധകർ പ്രതീക്ഷിച്ചിരുന്നത്. എന്നാൽ അഞ്ച് പന്തിൽ ഒമ്പത് റൺസാണ് സഞ്ജുവിന് ആകെ നേടാനായത്. ഒരു സിക്സർ നേടിയെങ്കിലും വലിയ സ്കോറിലേക്കുയരാൻ സഞ്ജുവിന് സാധിക്കാതെ പോയി. തുടർച്ചയായ മൂന്നാം മത്സരത്തിലാണ് സഞ്ജു ഒറ്റ സംഖ്യയിൽ പുറത്താകുന്നത്.

സിഎസ്കെയിലെ സഞ്ജുവിന്റെ മോശം പ്രകടനം ഇതിനോടകം വലിയ ചർച്ചാ വിഷയമായിട്ടുണ്ട്. ടി20 ലോകകപ്പിൽ ഹാട്രിക് ഫിഫ്റ്റിയടക്കം നേടിയ സഞ്ജു സാംസണ് സിഎസ്കെയ്ക്കൊപ്പം വലിയ പ്രകടനം നടത്താൻ സാധിക്കുമെന്നാണ് ആരാധകരും ടീം മാനേജ്മെന്റും പ്രതീക്ഷിച്ചത്. ആദ്യ രണ്ട് മത്സരത്തിലെ സഞ്ജുവിന്റെ പ്രകടനത്തെ പല കാരണങ്ങളാൽ ന്യായീകരിക്കാം.

എന്നാൽ മൂന്നാം മത്സരത്തിലും സഞ്ജു നിറം മങ്ങുമ്പോൾ സിഎസ്കെയ്ക്കും ആരാധകർക്കും ആശങ്കകളേറെയാണ്. അതിവേഗം റൺസുയർത്താൻ സഞ്ജുവിന് സാധിക്കുന്നില്ലെന്ന് മാത്രമല്ല ആത്മവിശ്വാസം നഷ്ടപ്പെട്ട അവസ്ഥയിലാണ് സഞ്ജുവിനെ കാണപ്പെടുന്നത്. രാജസ്ഥാൻ റോയൽസ് വിട്ടുവന്നത് മണ്ടൻ തീരുമാനമായോ എന്ന സംശയം സഞ്ജുവിന് തോന്നിപ്പിക്കുന്ന തരത്തിലാണ് ഇപ്പോൾ താരത്തിന്റെ ബാറ്റിങ്.
IPL 2026: ഹീറോയായി തുഷാർ ദേശ്പാണ്ഡെ, ​ഗുജറാത്തിനെ പൂട്ടി രാജസ്ഥാൻ റോയൽസ്; അവസാന ഓവറിൽ ത്രില്ലിങ് ജയം
രാജസ്ഥാൻ റോയൽസിൽ സഞ്ജു രാജാവായിരുന്നു. സിഎസ്കെ യിലെ സഞ്ജുവിന്റെ വരവേൽപ്പ് കണ്ടപ്പോൾ പ്രതീക്ഷകൾ ഏറെയായിരുന്നു. എന്നാൽ ഇപ്പോൾ സഞ്ജുവിനെതിരേ ആരാധകർ വിമർശനം ഉയർത്തുന്ന നിലയിലേക്ക് കാര്യങ്ങൾ നീങ്ങുകയാണ്. സിഎസ്കെ ഇത്തവണ സഞ്ജുവിനെ ടീമിലെടുത്തത് ടോപ് ഓഡറിൽ അതിവേഗം റൺസുയർത്താനും പവർപ്ലേയിലെ പ്രശ്നങ്ങൾ പരിഹരിക്കാനുമാണ്.

എന്നാൽ സഞ്ജു ഇപ്പോൾ സിഎസ്കെയുടെ പ്രധാന തലവേദനയായി മാറുകയാണെന്ന് പറയാം. സഞ്ജു സാംസണിൽ വലിയ പ്രതീക്ഷ ഇത്തവണ സിഎസ്കെയ്ക്കുണ്ടായിരുന്നു. എന്നാൽ അതിനൊത്ത പ്രകടനം നടത്താൻ സാധിക്കുന്നില്ലെന്നതാണ് വസ്തുത. സാധാരണ ഒരു വിക്കറ്റ് കീപ്പർ ബാറ്റ്സ്മാൻ എന്നതിലുപരിയായി സഞ്ജു സാംസണിന്റെ ഇംപാക്ട് കാട്ടിക്കൊടുക്കാൻ ആദ്യ മൂന്ന് മത്സരത്തിലും മലയാളി താരത്തിന് സാധിക്കുന്നില്ല.
IPL 2026: ഫിലിപ്സ് പറഞ്ഞിട്ടും വിശ്വസിച്ചില്ല, ഹെറ്റ്മെയറുടെ റിവ്യു എടുക്കാതെ റാഷിദ്; ഡക്കിന് പുറത്താക്കാനുള്ള അവസരം നഷ്ടപ്പെടുത്തി
ഇത്തവണ സിഎസ്കെ വലിയ പ്രതീക്ഷയോടെ കൊണ്ടുവന്ന താരങ്ങളൊന്നും മികവ് കാട്ടുന്നില്ലെന്നതാണ് വസ്തുത. കാർത്തിക് ശർമ, പ്രശാന്ത് വീർ എന്നിവർക്ക് 14.2 കോടിയാണ് സിഎസ്കെ നൽകിയത്. എന്നാൽ ഈ രണ്ട് പേരും മികച്ച നിലവാരം കാട്ടുന്നില്ല. അതിവേഗം റൺസുയർത്താൻ സാധിക്കുന്നില്ലെന്ന് മാത്രമല്ല ആത്മവിശ്വാസത്തോടെ ഒരു ഷോട്ട് പോലും കളിക്കാൻ അദ്ദേഹത്തിന് സാധിക്കാത്ത അവസ്ഥയാണ്.

എന്തായാലും സഞ്ജുവിന്റെ ആരാധകർ ഇപ്പോഴും പ്രതീക്ഷയിലാണ്. കിടിലൻ ഫോമിൽ സ‍ഞ്ജു തിരിച്ചെത്തുമെന്നാണ് ആരാധക പക്ഷം. ഇതിലും വലിയ വെല്ലുവിളികൾ സഞ്ജു മറികടന്നിട്ടുണ്ട്. അതുകൊണ്ടുതന്നെ ഇത്തവണയും സഞ്ജു ഗംഭീരമായി തിരിച്ചെത്തുമെന്നാണ് ആരാധകർ പ്രതീക്ഷിക്കുന്നത്.