IPL 2026: അഭിഷേകിനെയല്ല, ഹെെദരാബാദ് ക്യാപ്റ്റനാക്കുന്നത് ഇഷാൻ കിഷനെ; ഇത് മികച്ച തീരുമാനമോ? പരിശോധിക്കാം

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ഈ മാസം 28നാണ് ഐപിഎൽ പോരാട്ടങ്ങൾക്ക് തുടക്കമാവുന്നതാണ്. എല്ലാ ടീമുകളും അവസാന ഘട്ട പിഴവുകളും തിരുത്തി കപ്പിനായുള്ള പടയൊരുക്കത്തിലേക്ക് കടക്കാൻ പോവുകയാണ്. ഐപിഎൽ പടിവാതുക്കൽ നിൽക്കവെ പല ടീമുകളും ക്യാപ്റ്റൻസി മാറ്റത്തെക്കുറിച്ച് ചിന്തിക്കുകയാണ്.ഇതിനോടകം ഇത് സംബന്ധിച്ചുള്ള പല റിപ്പോർ‌ട്ടുകളും പുറത്തുവന്നിട്ടുണ്ട്. ഏറ്റവും പുതിയ റിപ്പോർട്ട് അനുസരിച്ച് സൺറെെസേഴ്സ് ഹെെദരാബാദും നായക മാറ്റത്തെക്കുറിച്ചുള്ള സജീവ ചർച്ചയിലാണ്. പാറ്റ് കമ്മിൻസാണ് നിലവിലെ ഹെെദരാബാദ് ക്യാപ്റ്റൻ. എന്നാൽ ഓസ്ട്രേലിയൻ താരമായ കമ്മിൻസ് ഇത്തവണ ഐപിഎൽ കളിക്കുന്ന കാര്യം സംശയത്തിലാണ്. താരം ഫിറ്റ്നസ് പ്രശ്നം നേരിടുന്ന സാഹചര്യത്തിൽ ഐപിഎല്ലിൽ നിന്ന് വിട്ടുനിൽക്കാനാണ് സാധ്യത കൂടുതൽ.

അതുകൊണ്ടുതന്നെ ഹെെദരാബാദിന് ഇത്തവണ പുതിയ നായകനെ ആവശ്യമാണ്. രണ്ട് പേരുകളാണ് പ്രധാനമായും ഹെെദരാബാദിന് മുന്നിലുള്ളത്. അതിൽ ഒരാൾ അഭിഷേക് ശർമയും രണ്ടാമൻ ഇഷാൻ കിഷനുമാണ്. നിലവിലെ റിപ്പോർട്ട് പ്രകാരം ഇഷാൻ കിഷനെ ഹെെദരാബാദ് നായകനായി പ്രഖ്യാപിക്കാനുള്ള സാധ്യതയാണ് കൂടുതൽ. അഭിഷേക് ശർമക്ക് ഇപ്പോൾ ക്യാപ്റ്റൻ സ്ഥാനം നൽകേണ്ടെന്നാണ് ടീം മാനേജ്മെന്റിന്റെ തീരുമാനം. ഇഷാനെ ക്യാപ്റ്റനാക്കുന്നത് ഹെെദരാബാദിന് ഗുണം ചെയ്യുമോ?. സാധ്യതകൾ പരിശോധിക്കാം.

ജാർഖണ്ഡുകാരനായ ഇഷാൻ കിഷന് ക്യാപ്റ്റനെന്ന നിലയിൽ മോശമല്ലാത്ത കണക്കുകൾ അവകാശപ്പെടാനാവും. പ്രത്യേകിച്ച് സമീപകാലത്തെ സാഹചര്യത്തിൽ ഇഷാൻ കൂടുതൽ മികവ് കാട്ടുന്നു. ആഭ്യന്തര ക്രിക്കറ്റിലും അണ്ടർ 19 ക്രിക്കറ്റിലുമടക്കം നായകനായി അനുഭവസമ്പത്തുള്ള താരമാണ് ഇഷാൻ കിഷൻ . 2016ലെ ഐസിസി അണ്ടർ 19 ഏകദിന ലോകകപ്പിൽ ഇന്ത്യയെ നയിച്ചത് ഇഷാനായിരുന്നു. ഋഷഭ് പന്തും വാഷിങ്ടൺ സുന്ദറും സർഫറാസ് ഖാനും ആവേശ് ഖാനും ഖലീൽ അഹമ്മദും എല്ലാം ഉൾപ്പെട്ട ടീമിനെയാണ് ഇഷാൻ നയിച്ചത്.
IPL 2026: രാജസ്ഥാനെതിരേ ആദ്യമായി കളിക്കുന്നു, പക്ഷെ വെെകാരിക പ്രശ്നമില്ല; കാരണം വെളിപ്പെടുത്തി സഞ്ജു സാംസൺ
ടി20യിൽ 29 മത്സരങ്ങൾ നയിച്ച് 23ലും ജയം നേടിക്കൊടുത്ത നായകനാണ് ഇഷാൻ. 79.31 ആണ് ഇഷാന്റെ വിജയ ശതമാനം. ഇക്കഴിഞ്ഞ സയ്യിദ് മുഷ്താഖ് അലി ട്രോഫിയിൽ ജാർഖണ്ഡിനെ കിരീടത്തിലേക്കെത്തിക്കാൻ ഇഷാന് സാധിച്ചു. ചരിത്രത്തിലാദ്യമായാണ് ജാർഖണ്ഡ് ഈ കിരീടം നേടുന്നത്. അത് ഇഷാന്റെ ക്യാപ്റ്റൻസിക്ക് കീഴിലാണെന്നതാണ് എടുത്തു പറയേണ്ടത്.

ഹരിയാനക്കെതിരായ ഫെെനലിൽ 49 പന്തിൽ 101 റൺസും നേടി കസറാൻ ഇഷാന് സാധിച്ചു. സയ്യിദ് മുഷ്താഖ് അലി ട്രോഫി ഫെെനലിൽ സെഞ്ചുറി നേടുന്ന ആദ്യത്തെ നായകൻ കൂടിയാണ് ഇഷാൻ. ഇപ്പോൾ ഇന്ത്യൻ ടീമിലും ഇഷാന് നിർണ്ണായക സ്ഥാനമുണ്ട്. ഇക്കഴിഞ്ഞ ടി20 ലോകകപ്പിലെ ഇന്ത്യയുടെ റൺവേട്ടക്കാരിൽ രണ്ടാം സ്ഥാനത്താണ് ഇഷാനുണ്ടായിരുന്നത്.

ധോണി എന്നെങ്കിലും ഇന്ത്യയുടെ പരിശീലകനാവുമോ? ആഗ്രഹമുണ്ടെന്ന് ഗംഭീർ, പക്ഷെ നടന്നേക്കില്ല? തടസമാകുന്നത് ബിസിസിഐ നിയമം

സഞ്ജു സാംസണൊപ്പം ഇന്ത്യയുടെ കിരീട നേട്ടത്തിൽ സുപ്രധാന പങ്കുവഹിക്കാൻ ഇഷാൻ കിഷന് സാധിച്ചു. രണ്ട് വർഷത്തോളം ഇന്ത്യൻ ടീമിന് പുറത്ത് നിൽക്കേണ്ടി വന്ന ഇഷാൻ ഇപ്പോൾ ഇന്ത്യയുടെ സുപ്രധാന ടി20 താരങ്ങളിലൊരാളാണ്. ഐപിഎല്ലിലും മോശമല്ലാത്ത റെക്കോഡ് ഇഷാനുണ്ട്. 112 ഇന്നിങ്സിൽ നിന്ന് 2998 റൺസാണ് ഇഷാൻ നേടിയത്. 29.11 ശരാശരിയും 137.65 പ്രഹര ശേഷിയും ഇഷാനുണ്ട്. 17 അർധ സെഞ്ചുറികളും ഒരു സെഞ്ചുറിയും അദ്ദേഹം ഐപിഎല്ലിൽ നേടിയിട്ടുണ്ട്.

സൺറെെസേഴ്സ് ഹെെദരാബാദിനൊപ്പം അവസാന സീസണിൽ സെഞ്ചുറിയടക്കം നേടി ശോഭിക്കാൻ സഞ്ജുവിനായിരുന്നു. ഇപ്പോൾ മികച്ച ഫോമിലാണ് ഇഷാനുള്ളത്. ക്യാപ്റ്റൻ സ്ഥാനം തന്നെ ബാധിക്കില്ലെന്ന് ഇഷാൻ ഇതിനോടകം തെളിയിച്ചിട്ടുണ്ട്. അതുകൊണ്ടുതന്നെ ഹെെദരാബാദ് ഇഷാനെ ക്യാപ്റ്റനാക്കുന്നത് മികച്ച തീരുമാനം ആയിരിക്കുമെന്ന് തന്നെ പറയാം.